Yezu m’a ɲini k’a dogo Pilati la ko ale ye masacɛ ye. Nka, a ka Masaya tɛ farati ye Ɔrɔmu masacɛ fɛ. Yezu ko: “Ne ka masaya te diɲɛ nin ta ye. Ni ne ka masaya tun ye diɲɛ ta ye, ne kɔmɔgɔw tun bena kɛlɛ kɛ ne kosɔn, janko zuwifuw kana ne minɛ, nga ne ka masaya te diɲɛ nin ta ye.” (Zan 18:36). Tiɲɛn lo, Masaya be Yezu fɛ. Nka, a ka Masaya tɛ nin duniɲa ta ye.

Pilati ma dan o ma. A ye Yezu ɲininga ko: “E ye masa ye kɛ?” Yezu y’a to Pilati k’a faamu ko a be min fɔra, o yɛrɛ lo jati. O kama, a y’a jaabi ko: ‘Ele lo b’a fɔra ko ne ye masa ye. Ne wolola o le kama. Ka na diɲɛ na janko ka tiɲɛ fɔ. Mɔgɔ o mɔgɔ, min lɔnin be tiɲɛ kan, o tigi be mɛnni kɛ ne fɛ.’—Zan 18:37.

Yezu tun y’a fɔ Toma ye wagati dɔ la ko: “Ne de ye sira ye, ani tiɲɛ, ani ɲɛnamaya.” Sisan, Yezu b’a fɔra Pilati yɛrɛ ye ko ale nana dugukolo kan walisa ka seereya kɛ ‘tiɲɛn’ koo la ka ɲɛsin a ka Masaya koo ma. Yezu cɛsirinin lo k’o tiɲɛn fɔ ni kantigiya ye hali n’a niin bena to a la. Pilati y’a ɲininga ko: “Mun le ye tiɲɛ ye?” Nka, a m’a to Yezu y’o ɲɛfɔ a ye. Ale fɛ, a ye min mɛn ka ban, o be bɔri kɛ ka se ka Yezu kiti tigɛ.—Zan 14:6, ABM; 18:38.

Jama tun be kɔnɔni kɛra kɛnɛma. Pilati segira ka bɔ ka taga jama yɔrɔ. A be komi Yezu tun b’a gɛrɛfɛ tuma min na a b’a fɔra sarakalasebagaw kuntigiw ni jama ye ko: “Ne ma kuun ye cɛɛ nin be se ka jalaki min na.” O kuma ye jama kɔnɔ gwan, u segira k’a fɔ ko: “A be mɔgɔw kalan an ka jamana yɔrɔ bɛɛ la. O le b’a to mɔgɔw be muruti. A y’a daminɛ Galile mara la fɔɔ ka na se yan Zude mara la.”—Luka 23:4, 5.

Yahutuw ka diinankow y’a dama tɛmɛ fɔɔ ka Pilati kabakoya. K’a to sarakalasebagaw kuntigiw ni cɛkɔrɔbaw b’a la ka kule, Pilati ye Yezu ɲininga ko: “Mɔgɔ nunu be minw fɔra i ka koo la, i t’o mɛnna wa?” (Matiyo 27:13). Yezu ma foyi fɔ. U be kulera ka ngalon tigɛ ka la Yezu kan, nka Yezu tɛ fɛɛn fɔra. O koo ye Pilati kabakoya.

Yahutuw ko Yezu y’a daminɛ “Galile mara la.” O kuma y’a to Pilati y’a faamu ko Yezu ye Galileka ye. A miirila fɛɛrɛ dɔ la walisa k’a yɛrɛ niin bɔ Yezu kitiko la. Erɔdi Antipasi (Erɔdiba dencɛ) lo be mara kɛra Galile kun na ani a be Zeruzalɛmu Tɛmɛnkan seli wagati nin na. O kama, Pilati ye Yezu bila ka taga Erɔdi fɛ. Ale Erɔdi Antipasi lo tun y’a to u ye Zan batizelikɛla kuun tigɛ. Kɔfɛ, tuma min na Erɔdi y’a mɛn ko Yezu be kabakow kɛra, a siranna ko n’a sɔrɔ Zan lo kununa ka bɔ suuw cɛma.—Luka 9:7-9.

Erɔdi ye Yezu ye minkɛ, o diyara a ye kosɔbɛ. O kɔrɔ tɛ ko a tun b’a fɛ ka Yezu dɛmɛ wala ko a b’a fɛ k’a lɔn ni Yezu jalakibagaw be tiɲɛn lo fɔra wala ni tiɲɛn tɛ. Erɔdi b’a fɛ ka Yezu ye dɔrɔn le ani “a tun be miiri fana ko Yezu bena kabako dɔ kɛ ale ɲana.” (Luka 23:8). Nka, Yezu ma sɔn ka kabako si kɛ. Erɔdi be Yezu ɲiningara tuma min na, Yezu yɛrɛ ma kuma a fɛ. Erɔdi n’a ka sɔrɔdasiw jigi tigɛra ani u ye Yezu “dɔgɔya.” (Luka 23:11, ABM). U ye dereke ɲuman dɔ don a kaan na ani k’a lɔgɔbɔ. O kɔ, Erɔdi ko u ka segi ka taga n’a ye Pilati fɛ. Erɔdi ni Pilati tun tɛ bɛn, nka kabi o tuma, u kɛra teri ɲumanw ye.

Yezu senin kɔ Pilati fɛ, Pilati ye sarakalasebagaw kuntigiw, ni Yahutuw ka kuntigiw ani jama weele k’a fɔ u ye ko: “Ayiwa, ne y’a ɲininga aw ɲana. Aw ye koo minw fɔ k’olu y’a jalakikun ye, ne y’a ye ko jalakita tɛ. Erɔdi fana m’a jalakikun ye, bari a segira k’a bila ka na anw fɛ. O la, ne ma koo si ye cɛɛ nin ka kan ka faga min kama. O la, ne ben’a to u b’a bugɔ  ni golokami ye. O kɔ, ne ben’a bila ka taga.”—Luka 23:14-16.

Pilati kɔrɔtɔnin lo ka Yezu bila ka taga sabu a y’a faamu ko ɲangoya le y’a to u y’a minɛ ka na n’a ye ale fɛ. K’a sɔrɔ Pilati b’a ɲinina ka Yezu labila, a ye dalilu wɛrɛ sɔrɔ min y’a lasun k’o kɛ. K’a to kititigɛyɔrɔ la, a muso ye mɔgɔ ci k’a fɔ a ye ko: “I kana i niin don mɔgɔtilennin nin ka koo la, bari kunun sufɛ ne ye sikojugu kɛ [a be komi o tun bɔra Ala yɔrɔ] a ka koo la.”—Matiyo 27:19.

Pilati ka ɲi k’o cɛɛ jalakibali labila. Nka a be se k’o kɛ cogo di?