Jesus madah iya siku raja. Iya enda ngelalaika pekara nya ari Pilate. Taja pia, Perintah Jesus enda ngenataika penusah ngagai perintah Rome, laban iya madahka: “Perintah aku ukai sebagi ari dunya tu. Enti Perintah aku sebagi ari dunya tu, bala murid aku tentu ngetanka aku ngambika aku enda diserahka ngagai orang Judah. Tang Perintah aku ukai ari dunya tu.” (John 18:36) Nyadi, jaku Jesus nunjukka iya bisi Perintah, tang nya enda sebagi ari dunya tu.

Nya alai Pilate nanya iya: “Enti pia, kati nuan tu raja?” Jesus lalu nyaut iya: “Nuan empu ke nyebut aku tu raja. Aku patut besaksi pasal pemendar. Laban ketegal nya meh aku ada lalu datai ke dunya. Tiap iku orang ke nyukung pemendar ningaka nyawa aku.”—John 18:37.

Sebedau tu Jesus kala madah ngagai Thomas: “Aku tu meh jalai, pemendar, enggau pengidup.” Lalu diatu, indah Pilate empu pan ninga ari Jesus pasal tuju iya dikirumka ngagai dunya, iya nya meri saksi pasal “pemendar,” kelebih agi pemendar pasal Perintah Petara. Jesus bebendar deka ngetanka pemendar nya taja pan iya deka dibunuh. Nya alai Pilate nanya: “Nama pemendar nya?” Taja pia, iya enda meri Jesus peluang nerangka mayuh agi pasal pekara tu. Tu ketegal iya ngumbai diri udah nemu semua utai ke diguna kena ngakim Jesus.—John 14:6; 18:38.

Pengudah nya, Pilate pansut lalu betemu enggau bala orang mayuh ke nganti ba luar istana iya. Lalu maya nya Jesus engka bediri ngimbai iya. Iya madah ngagai bala tuai imam enggau sida ke bukai ke bisi ba dia: “Aku nadai tetemuka penyalah lelaki tu.” Ketegal nya, orang mayuh balat ringat lalu madah: “Iya ngajar ari Galili nyentuk ngagai endur tu. Lalu ngasuh orang ba serata Judea begau.”—Luke 23:4, 5.

Reaksi orang Judah ngasuh Pilate alit ati. Lebuh bala tuai imam enggau bala tuai bansa orang Judah terus manjung enggau nyawa ti inggar, Pilate nanya Jesus: “Kati nuan enda ninga jaku tuduh sida ngagai nuan?” (Matthew 27:13) Tang Jesus seleka pan enda nyaut. Taja pan bisi mayuh jaku tuduh ke disebut sida pasal Jesus, tang iya mengkang tenang. Utai tu ngasuh Pilate berasai amat tekenyit.

Orang Judah madah Jesus ngajar berengkah “ari Galili.” Ketegal jaku sida, Pilate nanya Jesus sekalika iya orang Galili tauka enda. Pengudah nemu Jesus orang Galili, Pilate nemu iya ulih ngelepaska tanggungjawap iya ngambika iya enda ibuh ngakim Jesus. Maya nya Herod Antipas, iya nya anak lelaki Herod ti tebilang merintah nengeri Galili. Lalu iya bisi ba Jerusalem lebuh orang benung ngintu Pengerami Paska. Ketegal nya, Pilate nganjung Jesus ngagai Herod. Iya ke amat, Herod Antipas meh ke udah munuh John Pemaptisa. Lalu pengudah iya ninga Jesus kala ngereja mayuh pengawa ti luar biasa, Herod berasai irau enggaika Jesus nya John ti udah diangkatka ari mati.—Luke 9:7-9.

Herod amat gaga ati laban iya bisi peluang betemu enggau Jesus. Taja pia, iya ukai amat deka nulung Jesus. Lalu iya ukai amat-amat deka tentuka jaku tuduh ke dikena ngelaban Jesus nya betul tauka enda. Iya “ngarapka diri ulih meda Jesus ngaga kereja ajih.” (Luke 23:8) Tang, Jesus enda ngereja nya. Kebendar iya, lebuh Herod nanya iya, Jesus enda bemunyi. Ketegal nya Herod berasai asa ati. Nyadi, iya enggau bala soldadu iya berengkah “ngeleseka Jesus.” (Luke 23:11) Sida ngerasukka baju jubah ti manah ba Jesus kena ngemelika iya. Udah nya, Herod nganjung Jesus pulai baru ngagai Pilate. Taja pan sebedau tu Herod enggau Pilate bemunsuh enggau pangan diri, tang diatu seduai iya nyadi kaban.

Lebuh Jesus pulai baru ngagai iya, Pilate ngempuruka bala tuai imam, bala tuai bansa  orang Judah, enggau orang mayuh. Ku Pilate ngagai sida: “Aku udah nasat iya ba mua kita. Tang aku nadai tetemuka iya udah ngereja penyalah baka ke disebut kita. Herod pan nadai tetemuka penyalah orang tu. Nya alai, Herod nganjung iya pulai baru ngagai kami. Iya nadai ngereja utai ti tau ngasuh iya diukum bunuh. Nya alai, aku deka ngukum iya lalu ngelepaska iya.”—Luke 23:14-16.

Pilate nemu bala imam nyerahka Jesus laban sida kepapaska iya. Nya alai, Pilate bebendar deka ngelepaska Jesus. Lalu Pilate mega bisi kebuah bukai deka ngelepaska Jesus. Lebuh Pilate benung duduk ba kerusi hakim, bini iya ngirumka pesan ngagai iya: “Anang bisi sangkut-paut enggau pekara orang ke lurus nya, laban aku bisi mimpi [ke tentu datai ari Petara] pasal iya, lalu mimpi nya ngasuh aku balat merinsa.”—Matthew 27:19.

Tang baka ni Pilate ulih ngelepaska Jesus ti enda ngereja penyalah?