Jesu hapateli Pilato kuli ki mulena luli. Kono Mubuso wahae hauami Maroma. Jesu uli: “Mubuso waka haki wa lifasi le. Kambe Mubuso waka ki wa lifasi le, likombwa zaka nelika nilwanela kuli nisike nafiwa kwa Majuda. Kono cwale, sina mokuinezi, Mubuso waka hauzwi mwa lifasi le.” (Joani 18:36) Kaniti, Jesu unani Mubuso kono haki wa lifasi le.

Pilato hafelezi fo. Ubuza kuli: “Hakulicwalohe, kana u mulena?” Jesu ubonisa kuli Pilato ubulezi niti, uli: “Ubulezi wena muñi kuli ni mulena. Kakuli senipepezwi, ni senitezi mwa lifasi, kikuli nipake niti. Mutu kaufela ya kwa lineku la niti uteeleza kwa linzwi laka.”—Joani 18:37.

Kwamulaho, Jesu naabulelezi Tomasi kuli: “Ki na nzila ni niti ni bupilo.” Cwale Pilato ni yena uutwa mulelo walumezwi Jesu fa lifasi kuli ki kuto paka “niti,” sihulu niti ka za Mubuso. Jesu uikatulezi kupaka niti yeo ka busepahali nihaikaba kuli ukabulaiwa kabakala kueza cwalo. Pilato ubuza kuli: “Niti kiñi?” kono halibeleli kuli atalusezwe kalabo. Uikutwa kuli uutwile litaba zeñata zemutusa kuatula muuna yo.—Joani 14:6; 18:38.

Pilato ukutela kwa sicaba sesilibelezi fande. Mwendi Jesu ni yena uinzi bukaufi ni Pilato, yena Pilato habulelela baprisita babapahami ni babali ni bona kuli: “Hanifumani mulatu ku mutu yo.” Ka kunyemiswa ki katulo yeo, buñata bupihelela kuli: “Mutu yo utisa mifilifili mwa sicaba ka kuluta batu mwa Judea kaufela, kukalela kwa Galilea mane kuto fita ni kwanu.”—Luka 23:4, 5.

Mwendi Pilato ukomokiswa ki Majuda babapihelela taba yesautwahali ye. Baprisita babahulu ni babahulu ba sicaba habanze bazwelapili kuhuwaka, Pilato ubuza Jesu kuli: “Kana hauutwi litaba zeñata zebasweli kukutama ka zona?” (Mateu 27:13) Jesu hamualabi. Pilato ukomokiswa ki taba ya kuli Jesu ukuzize feela hanze hatamelezwa litaba zeo.

Majuda babulezi kuli Jesu ukalezi ‘kuluta batu mwa Galilea.’ Kabakaleo, Pilato ulemuha kuli Jesu uswanela ku ba Mugalilea. Pilato ufumana nzila yakupicuka ka yona kuatula Jesu. Heroda Antipasi (mwanaa Heroda Yomutuna) ki yena mubusi wa Galilea, mi utile mwa Jerusalema kwa mukiti wa Paseka. Ka mukwa ocwalo, Pilato ulumela Jesu ku Heroda. Heroda Antipasi ki yena yanaalaezi kuli Joani Mukolobezi apumiwe toho. Hamulaho, Heroda hanaautwile kuli Jesu naasweli kueza limakazo, naabilaezi kuli mwendi Jesu ki yena Joani yazuhile kwa bafu.—Luka 9:7-9.

Heroda cwale utabiswa ki taba ya kuli ukabona Jesu. Hatabi kabakala kuli ubata kutusa Jesu kamba kuli unani takazo ya kubatisisa kuli azibe haiba litaba zatamelezwa Jesu ki za niti. Heroda ubata feela kubona Jesu, mi ‘usepa kuli uka mubona inze aeza makazo yeñwi.’ (Luka 23:8) Nihakulicwalo, Jesu haezi zabata Heroda. Mane Heroda hamubuza puzo, Jesu hamualabi. Bakeñisa maswabi, Heroda ni masole bahae ‘bashubula’ Jesu. (Luka 23:11) Bamuapesa siapalo sesinde ni kumusheununa. Cwale Heroda kihona alumela Jesu ku Pilato hape. Heroda ni Pilato nebasa utwani, kono cwale baba balikani babatuna.

Jesu hakutile, Pilato ukopanya baprisita babahulu, babusi ba Sijuda, ni sicaba mi uli: “Nimubuzize fapilaa mina kono hanisika fumana mulatu mwa lika zemu mutama ka zona. Mane, ni yena Heroda hasika fumana mulatu ku yena, kakuli umukutiselize ku luna, mi hamubone! Hakuna  saezize salukela kubulaelwa. Hakulicwalo nika mufa koto ni kumulukulula.”—Luka 23:14-16.

Pilato ubata kulukulula Jesu, kakuli ulemuhile kuli baprisita bamuisize ku yena kabakala muna. Pilato hanze abata kulukulula Jesu cwalo, uamuhela taba yemususueza hahulu kuli amulukulule. Hanze ali mwa sipula sa katulo, musalaa hae umulumela liñusa lelili: “Usiye muuna yalukile yo, kakuli ninyandile hahulu kacenu busihu mwa tolo [kusina kukakanya izwa ku Mulimu] kabakala hae.”—Mateu 27:19.

Pilato ukona kulukulula cwañi muuna yasina mulato yo, sina ka mwaswanela kuezeza?