Yesu alwezele Pilatu hatoma ngwenyi ikiye mwangana. Chipwe ngocho, Wangana wenyi kawapwile nakole navaLomako. Yesu ambile ngwenyi: “Wangana wami kaweshi wamukaye kanoko. Kachi nge Wangana wami wapwanga wamukaye kano, kachi vaka-kungukafwa vanalu mangana vazeneke kungutwala kuli vaYuleya. Olozenyi Wangana wami kaweshi wamukaye kanoko.” (Yowano 18:36) Chikupu vene, Yesu apwile naWangana, oloze keshi wamukaye kanoko.

Pilatu kakuminyinyine kaha ahako. Amuhulishile ngwenyi: “Chamwaza, jino ove umwangana tahi?” Yesu alwezele Pilatu atachikize ngwenyi nakukulula mwakwoloka, ambile ngwenyi: “Ove yove unambemo ngwove ngumwangana. Mwomwo echi chikiko vene ngwasemukilile ami, kahechi chikiko nawa ngwejililile muno mukaye, mangana nguhane unjiho wakuvuluka muchano. Weshowo eji kukavangizanga muchano eji kwivwililanga kulizu lyami.”—Yowano 18:37.

Hakavanga, Yesu alwezele Tomase ngwenyi: “Ami yami jila, yami muchano, yami kuyoya.” Ngocho naPilatu atachikijile jino vyuma ejilile Yesu hano hamavu ngwenyi mangana ahane unjiho wakuvuluka “muchano,” muchano kana wakuvuluka Wangana. Yesu afwililile kupwa lika wakushishika hakuhanjika muchano kanou, chamokomoko numba nge atelele kufwa. Pilatu ahulishile ngwenyi: “Muchano chuma muka?” Oloze kavandaminyine vamukumbululeko. Ashinganyekele ngwenyi vyuma evwile vyatelemo jino kuvatula chihande hali ou mutu.—Yowano 14:6; 18:38.

Pilatu ahilukile kulizavu lize lyapwile haweluka wanganda. Omu Pilatu alovokele, Yesu apwile kusali yenyi, kaha alwezele vapilishitu vavakulwane navosena vaze vapwileko ngwenyi: “Ami ou mutu kangwamuwanyine namulongako.” Vatu hakwivwa mazu kana vapihililile, kaha vambile ngwavo: “Eji kusowangizanga vatu hakuvanangula muYuleya mwosena, kufuma kuNgalileya mbwe nakuno.”—Luka 23:4, 5.

Mazu amapi vahanjikile vaYuleya akomwesele Pilatu. Omu vapilishitu vavakulwane navakulwane javatu vapwile nakutambakana, Pilatu ahulishile Yesu ngwenyi: “Uno evi vyuma vyavivulu ngana vali nakukuvulukila kawavivwileko tahi?” (Mateu 27:13) Oloze Yesu kamukumbulwileko. Omu Yesu aholele kulu chakuzeneka kukumbulula, Pilatu alikomokelele.

VaYuleya vahanjikile ngwavo Yesu aputukile kusowangiza vatu “kuNgalileya.” Hakuwana mashina namasongo hachihande kanechi, chalingishile Pilatu atachikize ngwenyi chikupu vene Yesu apwile wakuNgalileya. Echi chalingishile Pilatu awane jila yakulipekelamo mulonga wakusopesa Yesu. Helote Andepa (mwanaHelote Wamunene) ikiye ayulilenga muNgalileya, kaha halwola kanelu apwile muYelusalema kuchiwanyino chaPaseka. Ngocho Pilatu alwezele vatu vatwale Yesu kuli Helote. Helote Andepa ikiye avatwile mutwe waYowano Muka-kumbapachisa. Kutwala muze, evwile ngwavo Yesu apwile nakulinga vyuma vyakukomwesa, ngocho Helote alizakaminyine ngwenyi Yesu pamo ikiye vene Yowano uze vanasangula kuvafu.—Luka 9:7-9.

Helote jino awahililile hakusaka kumona Yesu. Helote kapwile nakusaka kumona Yesu mangana amukafwe chipwe amone numba nge unjiho wavyuma vapwile nakumusopesa wapwile wamuchano nyi chiku. Helote afwililile chikuma kumona Yesu nakufwelela “ngwenyi mwamona chinjikizo chimwe chakufuma kuli Yesu.” (Luka 23:8) Oloze Yesu kalingile vyuma vize Helote afwililile kumonako. Omu Helote ahulishile Yesu vihula, ikiye kamukumbulwileko. Ngocho Helote namaswalale jenyi vevwile kupihya, kaha “vamulumbilishile.” (Luka 23:11) Vamuvwikile uvwalo uvyakuma nakuputuka kumuhenda. Ngocho Helote akindulwishile cheka Yesu kuli Pilatu. Helote naPilatu kavalinwishilenga meyako, oloze halwola kana vapwile jino himasepa.

Omu Yesu vamukindulwishile, Pilatu asanyikile vapilishitu vavakulwane navaka-kuyula vavaYuleya, navatu veka, kaha ambile ngwenyi: “Mwangunehelanga ou mutu ngwenu ali nakusowangiza vatu valikange. Jino ivwenu! Ngwamwihwojolanga kumeso enu, oloze kangwamuwananga namilonga muli nakumuhanako. NaHelote nawa kayiwanyineko, mwomwo namukindulwisa cheka kuli etu, ngocho kavulumwine  mulonga numba umwe wakutela kufwilako. Shikaho nangumuzangamisa nakumukasununa.”—Luka 23:14-16.

Pilatu asakile kwecha Yesu mwomwo atachikijile ngwenyi vapilishitu vevwile kaha lwiso vikiko vamunehelele kuli ikiye. Omu Pilatu apwile nakusaka kusuula Yesu, kwejile nawa unjiho weka uze wasolwele nge vyuma apwile nakusaka kulinga vyapwile vyakwoloka. Omu Pilatu atwamine hachitwamo chakusopela, pwevo lyenyi atumine mazu kuli ikiye ngwenyi: “Kanda ulinga chuma chimwe hali ou mutu wakwolokako, mwomwo lelo ngunaloto chilota [pamo chafumine kuli Kalunga] chachipi mwomwo yaikiye.”—Mateu 27:19.

Uno Pilatu ahashile kusuula ngachilihi mutu wakuzeneka chuma chakumuhanyina mulonga?