Yesu nyiso Pilato ratiro ni en e ruoth. Kata ka en kamano, loch mar Jo-Rumi ok onego oluor Pinyruodh Yesu. Yesu wacho kama: “Pinyruodha ok en mar pinyni. Ka da bed ni Pinyruodha en mar pinyni, joga dine okedo mondo kik chiwa e lwet Jo-Yahudi. To adier Pinyruodha ok en moa kae.” (Johana 18:36) Ee, Yesu nigi Pinyruoth, to ok en mar pinyni.

Dwokono ok rom Pilato, omiyo openjo Yesu niya: “Kuom mano, kare in ruoth?” Yesu konyo Pilato fwenyo ni paro ma en-gono ni kare, kowachone kama: “In iwuon isewacho ni an ruoth. Mano e momiyo nonyuola, kendo mano e momiyo ne abiro e piny, ni mondo achiw neno e wi adiera. Ng’ato ka ng’ato man kor adiera winjo dwonda.”​—Johana 18:37.

Noyudo Yesu osewacho motelo ne Thoma niya: “An e yo, kendo an e adiera, kendo an e ngima.” Koro sani, kata mana Pilato fwenyo ni gimomiyo ne oor Yesu e piny en ni mondo ochiw neno e wi “adiera,” to ahinya ahinya wuon, adiera e wi Pinyruodhe. Yesu dwaro ni omakre motegno gi adierano kata ka mano biro miyo onege. Pilato penje ni, “Adiera en ang’o?” to ok orit mondo omiye dwoko mar penjono. Oneno ni osewinjo weche morome ng’ado bura ne Yesu.​—Johana 14:6; 18:38.

Pilato dok ir oganda mochung’ ka rito oko e laru mar od ruoth. Nenore ni Yesu ni e bathe sama owacho ne jodong-jodolo kod joma ni kodgi niya: “Ok ayudo ketho moro amora kuom ng’atni.” Ogandano ok mor gi bura monga’dono, omiyo giramone kama: “Okelo tungni e kind oganda kopuonjo e Judea duto, to kata mana chakre Galili nyaka kae.”​—Luka 23:4, 5.

Nyaka bed ni paro ma ok kare ma Jo-Yahudi nigono miyo Pilato wuoro sidang’. Sama jodong-jodolo gi jodongo mag oganda dhi nyime gi kok, Pilato penjo Yesu niya: “Be iwinjo weche mang’eny ma gidonjonigo?” (Mathayo 27:13) Yesu ok tem dwoke. Kata obedo ni ihangone weche kamano, chuny mokue ma Yesu nyiso mako dho Pilato ahinya.

Jo-Yahudi owacho ni Yesu osebedo ka kelo tungni ‘chakre Galili.’ Mano konyo Pilato fwenyo ni kare Yesu en Ja-Galili. Kuom mano, omanyo yo ma dologgo lwete e wach Yesu mondo kik en e ma onga’dne bura. Herode Antipa (wuod Herode Maduong’) e jatelo mar Galili, to nikech en sap Pasaka, en bende en Jerusalem kanyo. Omiyo, Pilato chiko mondo oter Yesu ir Herode. Herode Antipa nogono e jal ma nochiko mondo ong’ad wi Johana Jabatiso. Bang’e, ka nowinjo ni Yesu timo honni, Herode noparore ahinya ni mita dibed ni Yesu en Johana ma koro osechier!​—Luka 9:7-9.

Omiyo, koro Herode mor ni oyudo thuolo mar romo gi Yesu. To morneno ok en nikech odwaro konyo Yesu kata ni doher ng’eyo kabe nitie ketho madier ma odonjnego. Herode ni mana gi riyo mar neno Yesu kogeno “neno ranyisi motimo.” (Luka 23:8) Kata kamano, Yesu ok lone riyo ma en-gono. Bende kata ka Herode penje penjo, Yesu ok dwoke gimoro amora. Nikech mano, Herode kaachiel gi askechene timo ne Yesu “timbe achaya.” (Luka 23:11) Jogo rwakone nanga moro maber kendo gijare. Kae to Herode chiko mondo oduok Yesu ir Pilato. Herode kod Pilato osebedoga jowasigu, to sani koro gin osiepe ma thiring’inyi.

Ka Yesu chopo ir Pilato, Pilato luongo jodong-jodolo duto, jotelo mag Jo-Yahudi, kaachiel gi oganda kae to owachonegi niya: “Asenone e nyimu to ok ayudo kuome ketho moro amora e weche mudonjonegogi. To adier, kata mana Herode ok oyudo ketho e wechego nimar oseduoke  irwa, to neuru! onge gimoro amora mosetimo mowinjore gi tho. Omiyo, abiro kume kae to agonye.”​—Luka 23:14-16.

Pilato dwaro ahinya ni ogony Yesu nimar ofwenyo ni ich-lit e ma omiyo jodolo ochiwo Yesu e lwete. Sama Pilato ni e kome mar ng’ado bura kotemo mondo ogony Yesu, oyudo wach moro koa kuom chiege ma miyo omedo bedo gi chuny mar gonyo Yesu. Chiegeno orone wach niya: “Kik idonjri e wach ng’at makareno nimar kawuono nachandora ahinya e lek [nenore ni lekno oa kuom Nyasaye] nikech ng’atno.”​—Mathayo 27:19.

Ere kaka Pilato nyalo gonyo ng’at ma onge kethoni, kaka owinjore otim?