Zvokadi kamare, Jesu ndi mambo zve iyena aaeji kuzviviga kuna Pirato. Asi Umambo hwake asipi hwokuphikizana no hwo Roma. Jesu anoti: “Umambo hwangu asipi hwo pasi pano. Kudari umambo hwangu no hwainga hwo pasi, varanda vangu vaizovangirira bzokadi, kuti nditame kupuwa mu simba ro vaJuda. Kaveta umambo hwangu asipi hwo pasi pano.” (Johani 18:36) Umambo hwa Jesu asipi hwo pasi pano.

Asi kuna Pirato, shwiro iyi aito ikapera. Anobvunjisa kuti: “Ngokudaro iwewe ndiwe mambo?” Jesu anovonesa kuti Pirato wananga zvokadi kamare, eciti: “Watobzinanga. Inini ndiri mambo. Ndakabarihwa bzondhobzo, no kuza pasi pano: kuti ndiite ufakazi hwo bzokadi. Mundhu wese anoda bzokadi, anopurukira izwi rangu.”—Johani 18:37.

Jesu wainga akabvunja Tomasi kuti: “Ndini gwanja, bzokadi no uhomi.” Wari pikija Pirato watozivavo kuti Jesu wakaviya pasi pano kuti apekeje ucapupu hwo ‘zvokadi,’ asi maningi-ningi zvokadi yo Umambo. Jesu anoda kuramba akagondeka nee zvecidika kuti afe anotendera kufa. Pirato anobvunjisa kuti: “Mbzinyi bzokadi?” Asi iyena aaveteri kuti adurujihwe, kuti icinyi. Kwaari zvaazwari basi zvinokwana kuti ateme civaringo.—Johani 14:6; 18:38.

Pirato anohwirira ku mbungano iri kuvetera ngo kunja ko nyumba ya govhernadhori. Zvinoita inga kuti Jesu ari ngo pamutivi pa Pirato paanobvunja vapiri vakuru na vaya vari kumuperekeja kuti: “Andiwani ndava iriyese mu mundhu uu.” Mbungano inonyangajwa maningi ngo civaringo ici, ngo kudaro inovangirira yeciti: “Yena anomusa vandhu, ecijijisa mu Judeya yese, kubvira Galileya mbhera kuno.”—Luka 23:4, 5.

Pirato anokahamara ngo kutama kunasa kurangarira ko vaJudha. Vapiri vakuru no vakuru-kuru vamweni pavaiita joweyowe, Pirato anobvunjisa Jesu kuti: “Auzwi bzakawanda bzo vanorevera kouri, kani?” (Mateu 27:13) Jesu aadaviri. Pirato anokahamara ngo kuthiva kwa Jesu pakati po mapope aya acinari no musoro.

VaJudha vananga kuti Jesu ‘wakatangira ku Garireya.’ Ngo pamusoro po masoko aya Pirato anovona kuti Jesu ngo wo ku Garireya. Ngo kudaro Pirato anorangarira mazano amweni o kuti ambzenge muthwaro wo kutonga Jesu. Herodhi Antipa (mwana wa Herodhi, Mukuru) ndi govhernadhori wo Garireya zve ari ku Jerusarema ku Phasika. Ngo kudaro Pirato wakamutumira ka Herodhi. Ndi Herodhi wakaitisa kuti Johani Mubhabhatiji aguhwe musoro. Nguva yakazotevera, paakazwa ngo pamusoro po mushamaiso jaiithwa ndi Jesu, Herodhi wakathimwa-thimwa, ecijibvunjisa kuti dengani Jesu wainga Johani wamuswa ko vakafa.—Luka 9:7-9.

Herodhi anodakara ngo kuda kuvona Jesu. Asi asipi ngo kuda kumubesera, nee aaripi kuda kuzwisisa kuti zvaari kupumbhwari ngo zvokadi kana kuti haiwa. Herodhi anocidaka-daka basi co kuda “kuvona muxamaiso wakaitwa ndiyena.” (Luka 23:8) Asi Jesu aaiti zvinodari Herodhi. Nee aazivi kudavira ciri cese paaibvunjiswa ndi Herodhi. Herodhi no masoca ake vanonyangajwa, zve ‘vanomushora.’ (Luka 23:11) Ivona vanomusimija nguvo yakaseja maningi perepo vomuita jee. Ngo kudaro Herodhi anotumirazve Jesu kuna Pirato. Herodhi na Pirato vaizondana maningi asi wari vaashamwari no shamwari.

Jesu paanoguma, Pirato anounganija vapiri vakuru, vatungamiriri vo zviara, no vandhu vese, perapo wonanga kuti: “Inini, pakupera kumubvunjisa panyasi penyu, [andizivi] kuwana no ndava imwe yo munomurevera. Na Herodivo aazivi kuwana ndava, ndibzo wakamuhwirija kondiri. Vonanyi, yena aazivi kuita ciro cinofanera kuurawa.  Ndibzo, sure ko kumutambuja, ndinozomusunungura.”—Luka 23:14-16.

Pirato ari kuda kusujunura Jesu, ngo kuti anozvivona kuti vapiri vaimupumbha ngo ndava yo thima ravainga naro na Jesu. Pirato paaieja kuda kumusujunura, panobudazve thangwe rimweni rinoitisa kuti amusujunure. Paanonga ari mu banje, Pirato anoashira masoko abva ku mukaji wake ecinanga kuti: “Ucadonghwinira pakati po murungami uwo, ngokuti usiku, mu kurota, ndakatambujika kukuru ngo ndava yake.”—Mateu 27:19.

Pirato waidikana kusujunura mundhu uwu, ngo kuti aana ndava. Waro anokwanisa kumusujunura here?