Den su kòmbersashon ku Pilato, Hesus no a purba di skonde ku realmente e ta un rei. Pero Hesus su Reino no tabata un menasa pa Roma. Hesus mes a bisa: “Mi Reino no ta parti di e mundu akí. Si mi Reino tabata parti di e mundu akí, mi sirbidónan lo a bringa pa mi no ser entregá den man di e hudiunan. Ma echo ta ku mi Reino no ta djaki.” (Huan 18:36) Sí, Hesus tin un Reino, ma no den e mundu akí.

Pilato tabata ke sa mas. El a puntra Hesus: “Pues anto, bo ta un rei?” Pa laga Pilato komprondé ku su konklushon tabata korekto, Hesus a bis’é: “Ta bo mes ta bisa ku mi ta un rei. Pa esaki mi a nase i pa esaki mi a bini na mundu: pa mi duna testimonio di e bèrdat. Tur hende ku ta na banda di e bèrdat ta skucha mi stèm.”—Huan 18:37.

Anteriormente, Hesus a bisa Tomas: “Ami ta e kaminda, e bèrdat i e bida.” Awor, Pilato tambe a haña sa ku ki propósito Dios a manda Hesus na mundu: pa duna testimonio di “e bèrdat,” spesialmente e bèrdat tokante e Reino. I Hesus tabata desididu pa keda fiel na e bèrdat ei asta si hasiendo esei lo a kost’é su bida. Pilato a puntra Hesus: “Kiko ta bèrdat?” Pero Pilato no a para warda kontesta; el a pensa ku e tabatin sufisiente informashon pa por a dikta sentensia den e kaso di Hesus.—Huan 14:6; 18:38.

Pilato a bolbe bai papia ku e multitut ku tabata warda pafó di e palasio. Probablemente, Hesus tabata pará banda di dje ora el a bisa e saserdotenan prinsipal i e restu di e multitut: “Mi no ta haña ningun motibu pa kondená e hòmber akí.” E multitut a rabia mashá; nan a keda insistí, bisando: “E ta instigá e pueblo i ta siña hende den henter Hudea; sí, el a kuminsá for di Galilea i a yega te akinan.”—Lukas 23:4, 5.

Pilato a keda strañá ora el a mira kon fanátiko i irasonabel e hudiunan tabata. E saserdotenan prinsipal i e ansianonan tabata grita yen di kos. Pilato a puntra Hesus: “Bo no ta tende kuantu kos nan ta testiguá kontra bo?” (Mateo 27:13) Hesus no a kontest’é nada. E echo ku Hesus a keda kalmu apesar di tur e akusashonnan ei a laga Pilato keda sorprendí.

E hudiunan a bisa ku ta for di Galilea Hesus a kuminsá instigá i siña hende. P’esei, Pilato a bai hasi sigur ku di bèrdat Hesus tabata di Galilea i a haña konfirmashon di esei. Anto e informashon akí a duna Pilato un bon chèns pa libra su mes di e responsabilidat di dikta sentensia den e kaso di Hesus. Kon asina? Wèl, Heródes Antipas (yu hòmber di Heródes e Grandi) tabata gobernador di Galilea, i e tabata na Herúsalèm durante e temporada di Pasku Hudiu di e aña ei. Pues, Pilato a manda Hesus serka dje. Ta é, esta, Heródes Antipas, a laga kita kabes di Huan Boutista afó. Mas despues, ora el a tende di e obranan milagroso ku Hesus tabata efektuá, el a haña miedu pasobra el a kere ku podisé ta Huan Boutista a lanta for di morto.—Lukas 9:7-9.

Heródes a bira masha kontentu ora el a haña sa ku e tabata bai mira Hesus. Pero esei no tabata pasobra e tabata bai yuda Hesus ni pasobra e tabata ke investigá e kaso pa wak si di bèrdat tabatin akusashon bálido kontra Hesus. Al kontrario, Heródes tabata kurioso; e tabatin gana di wak ‘Hesus hasi algun milager.’ (Lukas 23:8) Ma Hesus no a satisfasé Heródes su kuriosidat. De echo, ora Heródes a hasié pregunta, e no a kontest’é ni un pia di palabra. Heródes i e sòldánan a keda desapuntá, i nan a kuminsá trata Hesus “ku despresio.” (Lukas 23:11) Nan a bistié un paña briante i a hasi bofon di dje. Anto Heródes a manda Hesus bèk serka Pilato. Promé ku e dia ei, Heródes i Pilato tabata enemigu di otro, pero awor nan a bira bon amigu.

Ora nan a hiba Hesus pa Pilato atrobe, Pilato a manda yama e saserdotenan prinsipal, e lidernan  di e hudiunan i e pueblo i a bisa nan: “Mi a interog’é boso dilanti, ma mi no a hañ’é kulpabel di ningun di e akusashonnan ku boso a presentá kontra dje. De echo, Heródes tampoko no a haña nada, pasobra el a mand’é bèk pa nos; e hòmber akí no a hasi nada ku meresé morto! Pues, lo mi kastig’é i despues pon’é den libertat.”—Lukas 23:14-16.

Pilato tabata kla pa pone Hesus den libertat, pasobra el a mira bon kla ku tabata pa motibu di envidia e saserdotenan a entregá Hesus. Anto Pilato a haña mas motibu ainda pa laga Hesus den libertat. Ora e tabata sintá riba e stul di hues, su esposa a manda bis’é: “No mete ku e hòmber hustu ei, pasobra awe mi a sufri mashá den un soño [aparentemente di orígen divino] pa su motibu.”—Mateo 27:19.

Pues, Pilato tabata sa ku e mester a pone e hòmber inosente akí den libertat. Pero kon e por a logra esei?