Jesusqa kamachiq kasqanmantam Pilatoman willakurqa. Qawachirqataqmi Roma nacionpa contranpi mana hatarisqantapas, chaymi nirqa: “Munaychakuyniyqa manam kay pachapi kamachiqkunapa hinachu. Kay pachapi kamachiqkunapa hina kaptinqa serviqniykunam peleanman karqa judiokunaman mana entregasqa kanaypaq. Ichaqa nisqayman hinam munaychakuyniyqa mana kay pachapi kamachiqkunapa hinachu”, nispa (Juan 18:36). Chaynatam Jesusqa riqsichikurqa kamachikuyninqa runakunapa hina mana kasqanta.

Chaynata Jesus willakuchkaptinpas Pilatoqa hinallam iskayrayarqa. Chaymi nirqa: “Hinaptinqa, ¿kamachikuqchu kanki?”, nispan. Jesusñataqmi nirqa: “Qampunim nichkanki kamachikuq kasqayta. Ñuqaqa nacerqani hinaspapas kay pachamanqa hamurqani chiqap kaqmanta willakunaypaqmi. Chiqap kaqman hina kawsaqqa rimasqaytam uyarin”, nispa (Juan 18:37).

Jesusqa Tomasmanmi nirqaña: “Ñuqam kani ñan, chiqap kaq chaynataq kawsay quqpas”, nispa. Pilatopas yacharurqam Jesusqa Diospa munaychakuyninmanta imam kaqta willakunanpaq kay pachaman hamusqanta. Wañuy patanpi kaspanpas Jesusqa munarqam chiqapmanta willakuyta. Pilatoqa tapurqataqmi: “¿Imataq chiqapqa?”, nispa. Ichaqa ima nisqanta uyariytaqa manañam munarqañachu, payqa Jesusta juzgananpaqqa ñam tukuytaña uyarirurqa (Juan 14:6; 18:38).

Chaymantam Pilatoqa hawapi kaq riqsisqa sacerdotekunaman hinaspa chaypi kaq runakunaman kaqmanta asuykurqa, yaqapaschá Jesuspas paywan rirqa. Hinaspam Pilatoqa nirqa: “Manam ima mana allin ruwasqantapas kay runapiqa tarinichu”, nispa. Chayna nisqanwanmi piñakuruspanku kallpawan nirqaku: “Payqa tukuy Judea lawpi yachachispanmi runakunata chaqwachin, Galileamanta qallaykuspanmi kaykama yachachin”, nispa (Lucas 23:4, 5).

Pilatoqa hukmanyarurqachá judiokunapa chaynata rimasqankuwanqa. Chaymi riqsisqa sacerdotekunawan autoridadkuna rimachkaptinku Jesusta Pilato nirqa: “¿Manachu uyarinki tukuy imata contraykipi nisqankuta?”, nispa (Mateo 27:13). Jesusmi ichaqa upallalla karqa, chayna hawkalla kasqanta qawaspanmi Pilatoqa mana ima niytapas atirqachu.

Judiokunapa rimasqanwanmi Pilatoqa musyarurqa Jesusqa Galileamanta kasqanta. Chaymi juzgayta mana munaspan tantearurqa Galilea lawpi kamachiq Herodes Antipas sutiyuq runaña juzgananpaq. Pilatoqa yacharqam Herodesqa pascuarayku Jerusalenpi kasqanta. Herodes el Grande sutiyuq runapa churinmi karqa Herodes Antipasqa, paymi Juanpa umanta qururachirqa, chaymi milagrokunata Jesus ruwasqanmanta yacharuspan hukmanyarurqa Juan kawsarirusqanta piensaspan (Lucas 9:7-9).

Herodesqa munarqam Jesusta riqsiykuyta, ichaqa manamá yanapananpaqchu nitaq yanqa tumpasqankumanta yachananpaqchu, aswanqa ima milagrollatapas Jesus ruwananta qawayta munaspallanmi (Lucas 23:8). Jesusmi ichaqa mana ima milagrotapas Herodespa qayllanpiqa ruwarqachu. Tapuptinpas upallallam karqa. Herodesñataqmi piñakuruspan soldadonkunapiwan “despreciarqa” (Lucas 23:11). Hinaspam asipayaspanku llipipipiq pachawan pacharachirqaku, chaymantam Herodesqa Pilatoman Jesusta kutichirqa. Chaymantapacham Pilatowan Herodesqa allinyanakururqaku.

 Jesusta kutirachiptinkum Pilatoqa riqsisqa sacerdotekunata, judiokunapa kamachiqninkunata hinaspa llapa runakunata huñurachimuspan nirqa: “Kayqaya qayllaykichikpi allinta tapuruni ichaqa manam tumpasqaykichikman hinaqa ima faltantapas tarinichu. Herodespas manamá imatapas tarimurqachu, chaymi ñuqaykuman kutirachimun. Qawasqaykichikpi hinapas payqa manam wañunanpaq hinaqa imatapas ruwarqachu. Chayraykum ñuqaqa castigaruspay kachaykusaq”, nispa (Lucas 23:14-16).

Pilatoqa musyakurqam chiqnisqankurayku Jesusta payman entregaykusqankuta, chaymi kachaykuyta munarqa. Chaymantapas juzgananpi tiyachkaptinmi señoran willachimurqa: “Chay allin ruwaq runataqa ama imatapas ruwaychu. Paypa causanpim chisi tuta musquyniypi llumpayta ñakarirqani”, nispa (Mateo 27:19). Chaywanmi Pilatoqa astawanraq kachariyta munarqa.

Pilatoqa yacharqam Jesusqa mana huchayuq kasqanta. Ichaqa, ¿atirqachu kachariyta?