E lē o taumafai Iesu e natia mai iā Pilato le mea moni o ia o se tupu. Peitaʻi, e lē avea lona Malo ma taufaamataʻu i le malo o Roma. Ua fetalai atu Iesu: “O loʻu malo e lē mai le lalolagi lenei. Ana mai le lalolagi nei loʻu malo, semanū ua tau aʻu auauna, ina neʻi tuuina atu aʻu i tagata Iutaia. A o lenei, e lē mai i inei loʻu malo.” (Ioane 18:36) Ioe, e iai le Malo o Iesu, ae e lē mai i lenei lalolagi.

Ua faaauau ona talanoa atu Pilato e faatatau i le tulaga tautupu, e ala i le fesili atu: “Po o oe ea o se tupu?” Ua faailoa atu e Iesu iā Pilato e saʻo lona manatu e ala i le tali mai: “O lenā tonu lava ua e fai mai ai o aʻu o le tupu. O le mea lea na ou fanau mai ai, o le mea foʻi lea na ou sau ai i le lalolagi, ina ia ou molimau i le upu moni. O i latou uma e fiafia i le upu moni e faalogo i loʻu leo.”—Ioane 18:37.

I se taimi muamua atu, na fetalai atu ai Iesu iā Toma: “O aʻu o le ala, o le upu moni ma le ola.” Ae o lea ua faalogo foʻi Pilato, o le fuafuaga o le auina mai o Iesu i le lalolagi, ina ia molimau i “le upu moni,” aemaise lava le upu moni e faatatau i lona Malo. Ua maumauaʻi Iesu ina ia faamaoni pea i lenā upu moni, e tusa lava pe fasiotia ai o ia. Ua fesili atu Pilato: “O le ā le upu moni?” Peitaʻi ua lē faatali o ia mo se isi faamatalaga, auā ua lava ma totoe faamatalaga ua ia faalogo i ai e faamasinoina ai Iesu.—Ioane 14:6; 18:38.

Ua alu atu Pilato i le motu o tagata o loo faatali mai i fafo. Ua ia faapea atu i le ʻaufaitaulaga sili ma tagata o loo iai i inā: “Ou te lē iloa se mea sesē na faia e lenei tagata.” E foliga mai o le taimi lea o loo tū Iesu i tafatafa o Pilato. Ua feita le motu o tagata ma ua latou finau atu: “Ua ia faavevesi tagata i ana aʻoaʻoga i Iutaia atoa, e amata mai i Kalilaia seʻia oo mai i inei.”—Luka 23:4, 5.

Ua matuā ofo lava Pilato i le maelega valea o tagata Iutaia. A o faaauau pea ona alalaga atu le ʻaufaitaulaga sili ma le ʻautoeaina o le nuu, ua fesili atu Pilato iā Iesu: “E te lē o faalogo atu ea i le tele o mea ua latou tuuaʻia ai oe?” (Mataio 27:13) E leai lava ma se tali atu o Iesu. E ui lava i nei tuuaʻiga lē faavaea, ae ua ia faaalia pea le toʻa, ma o lenā mea ua maofa ai Pilato.

O le faamatalaga a tagata Iutaia e faapea ua “amata [Iesu] mai i Kalilaia,” ua iloa ai e Pilato o Iesu o se tagata Kalilaia. O lea la, ua ia maua ai se auala e ono ʻalofia ai lona faia o se faaiʻuga mo Iesu. O le taimi lea o loo iai Herota Anetipa (le atalii o Herota le Sili) le pule o Kalilaia, i Ierusalema mo le Paseka. O lea, ua auina atu ai e Pilato Iesu iā Herota. O ia lea sa faatonuina le vavaeeseina o le ulu o Ioane le Papatiso. Mulimuli ane, ina ua faalogo Herota o loo faia e Iesu galuega mamana, ona popole ai lea o ia ona ua manatu atonu o Ioane lea ua toe faatūina mai i le oti.—Luka 9:7-9.

Ua matuā fiafia Herota o le a vaai iā Iesu. E lē faapea ona e fia fesoasoani iā Iesu, pe taumafai foʻi e saʻili pe moni nei tuuaʻiga ua faia iā te ia, ae ona o lona fia iloa, ma le ʻfia vaai i se faailoga e faia e Iesu.’ (Luka 23:8) Peitaʻi, ua lē faamalieina e Iesu le naunau fia iloa o Herota. A o tuufesili atu Herota iā Iesu, e lē tali mai lava o ia i se upu e tasi. O lea, ua ita ai o ia ma ua latou “faalumaina” ma ana fitafita Iesu. (Luka 23:11) Ua latou faaofu o ia i se ofu sesega ma ula iā te ia. Ina ua māeʻa lenā, ona ia toe auina atu lea o Iesu iā Pilato. Sa iai le feeseeseaʻiga i le va o Herota ma Pilato i le taimi muamua, ae o lea ua toe lelei lo la va.

Ua toe avatu nei Iesu iā Pilato. Ua faapotopoto e Pilato le ʻaufaitaulaga sili, o taʻitaʻi o Iutaia, o tagata, ma faapea atu: “Ua uma ona ou suʻesuʻeina o ia i o outou luma, ae e leai se mea ua ou maua i lenei tagata e tusa ai ma mea ua outou molia ai o ia. O le mea moni, e leʻi iloa foʻi e Herota auā ua ia toe auina mai o ia iā i tatou; faauta! e leai se mea ua faia e ia ua tatau ai ona oti. O le mea lea, ou te faasalaina ai o ia ma faasaʻoloto o ia.”—Luka 23:14-16.

Ua naunau lava Pilato e faasaʻoloto Iesu, auā ua ia iloa o le lotovale o le ʻaufaitaulaga ua māfua ai ona latou tuuina atu Iesu iā te ia. A o taumafai Pilato e faasaʻoloto Iesu, ua ia maua se isi uunaʻiga atili e faia ai faapea. A o nofo o ia i lona nofoa faamasino, ua auina atu e lana avā se feʻau e faapea: “Aua neʻi e faia se mea i lenā tagata amiotonu, auā ua ou matuā tigāina lava i le asō i se miti [e foliga mai o se feʻau mai i le Atua] ona o ia.”—Mataio 27:19.

E tatau ona faasaʻoloto e Pilato lenei tagata e lē sala. E faapefea?