Aita Iesu i huna ia Pilato e arii iho â o ˈna. Eita râ ta ˈna Faatereraa arii e haafifi i te Hau Roma. Parau atura Iesu: “E ere ta ˈu Faatereraa arii no teie nei ao. Ahiri no teie nei ao ta ˈu Faatereraa arii, e aro ïa to ˈu mau taata ia ore au ia tuuhia i te ati Iuda ra. Tera râ, e ere ta ˈu Faatereraa arii no teie nei ao.” (Ioane 18:36) E Faatereraa arii iho â ta Iesu, e ere râ no teie nei ao.

Aita Pilato i tuu, ui faahou maira oia: “E arii ïa oe?” Faaite atura Iesu e ua tano ta Pilato i parau mai ra: “Te reira iho â mai ta oe e parau ra e arii au. Teie te tumu i fanauhia mai ai au e i haere mai ai i teie nei ao: Ia faaite au i te parau mau e tia ˈi. O te pee maite i te parau mau, e faaroo ïa i to ˈu reo.”—Ioane 18:37.

Ua parau aˈenei Iesu ia Toma: “O vau te eˈa e te parau mau e te ora.” No faaroo iho nei Pilato e ua tonohia mai Iesu i te fenua no te faaite i “te parau mau,” no nia iho â râ i ta ˈna Faatereraa arii. Ua faaoti Iesu e turu i taua parau mau ra noa ˈtu e e nehenehe oia e pohe. Ui atura Pilato: “Eaha te parau mau?” Aita râ oia i tiai i te pahonoraa, ua navai ta ˈna i faaroo no te haava i teie taata.—Ioane 14:6; 18:38.

Hoˈi faahou atura Pilato i te nahoa e tiai ra i rapaeau i te aorai. Eita e ore e tei pihai iho Iesu ia ˈna a parau ai oia i te mau tahuˈa tiaau e te feia e turu ra ia ratou: “Aita e hara i itehia mai e au i teie taata.” Riri ihora te nahoa i ta Pilato faaotiraa, e onoono aˈera ia ˈna: “Ua huehue te taata i ta ˈna haapiiraa na Iudea taatoa, na Galilea atoa e tae roa mai i ǒ nei.”—Luka 23:4, 5.

Eaha paha Pilato i te maere i to ratou manaˈo oti noa e te tano ore. A tuô noa ˈi te mau tahuˈa tiaau e aratai ati Iuda, ui maira Pilato ia Iesu: “Aita oe e faaroo ra i ta ratou pariraa e rave rahi ia oe?” (Mataio 27:13) Aita Iesu i pahono aˈe. Ua maere â Pilato no te hau i nia i to ˈna mata a pari mai ai te taata ia ˈna ma te taehae.

Faaite atura te ati Iuda e na Galilea mai Iesu i te haamataraa. Taa ihora ia Pilato e taata Galilea Iesu. Manaˈo ihora oia i te hoê ravea eiaha faahou na ˈna e haava ia Iesu. O Heroda Anitipa (tamaiti a Heroda rahi) te tavana i Galilea, e tei Ierusalema oia no te Pasa. Tuu atura Pilato ia Iesu ia arataihia ia Heroda ra. Na Heroda Anitipa i faaue ia tâpûhia te upoo o Ioane Bapetizo. I to Heroda faarooraa e e faatupu na Iesu i te mau semeio, i haapeapea na oia e e ere anei Iesu o Ioane tei tia mai te pohe mai.—Luka 9:7-9.

E teie nei, te oaoa ra Heroda e ite ia Iesu, eiaha no te tauturu ia ˈna aore ra no te faaroo e ua tano anei te mau parau i parihia ˈi oia. “Te manaˈo ra [râ] oia e ite i te tahi mau semeio ta ˈna e rave.” (Luka 23:8) Aita râ Iesu i faatiatia i to Heroda manaˈo. A uiui mai ai Heroda ia ˈna, aita oia i pahono aˈe. No reira, “vahavaha maira Heroda e ta ˈna mau faehau atoa ia Iesu.” (Luka 23:11) Faaahu maira ratou ia ˈna i te hoê ahu nehenehe, faaooo maira ia ˈna, e faahoˈi atura ia Pilato ra. E enemi Heroda e o Pilato na mua ˈˈe, e hoa râ raua i teie nei.

Faahoˈihia ˈtura Iesu ia Pilato ra, pii atura Pilato i te mau tahuˈa tiaau, aratai ati Iuda e te nahoa, e parau atura: “Ua aratai mai outou i teie taata tei parihia i te orure hau. Inaha, ua uiui au ia ˈna i mua ia outou, aita râ i itehia e au te tahi tumu e pari ai outou i teie taata. Aita atoa i itehia e Heroda, ua faahoˈi mai hoi oia ia ˈna, e a hiˈo na, aita oia i rave i te tahi mea e tano ai ia pohe oia. E hui ïa vau ia ˈna, a tuu atu ai ia ˈna.”—Luka 23:14-16.

Te parahi noa ra Pilato i te vahi haavaraa a  imi ai i te ravea e tuu ia Iesu, ua taa hoi ia ˈna e no te pohehae i aratai mai ai te mau tahuˈa ia Iesu ia ˈna. Tae atoa maira te poroi a ta ˈna vahine: “A vaiiho atu i tena taata parau-tia, te horuhoru nei hoi au i teie mahana no to ˈu moemoeâraa [eita e ore o te Atua te tumu] ia ˈna inapo ra.” (Mataio 27:19) Hinaaro roa ˈtura ïa Pilato e tuu ia Iesu.

Ia tuu iho â Pilato i teie taata aita ta ˈna e hara, e nafea râ?