Jesuseʼ maʼ tu taʼakaj tiʼ Pilato wa reyiʼ. Baʼaleʼ u Reinoeʼ maʼatech u tsʼáaikuba tu contra Roma. Jesuseʼ tu yaʼalaj: «In reinoeʼ maʼ yóokʼol kaabiliʼ. Wa yóokʼol kaabil in reinoeʼ, le máaxoʼob meyajtikenoʼ tsʼoʼok kaʼach u baʼateloʼob utiaʼal maʼ in kʼuʼubul tu kʼab le judíoʼoboʼ. Baʼaleʼ jeʼex tsʼoʼok in waʼalikoʼ, in reinoeʼ maʼ tiʼ le yóokʼol kaab u taalaʼ» (Juan 18:36). Jach beyoʼ, Jesuseʼ juntúul Rey, baʼaleʼ u gobiernoeʼ maʼ yóokʼol kaabiliʼ.

Pilatoeʼ seguernaj u kʼáatiktiʼ: «Jeʼeloʼ ¿reyech wa túun?». Jesús túuneʼ tu yaʼalaj maʼalob le baʼax tu tukultoʼ, tu yaʼalajtiʼ: «Tak teech aʼalik reyen. Teneʼ yoʼolal le jeʼel síijenaʼ yéetel yoʼolal le jeʼel taalen way yóokʼol kaabaʼ: utiaʼal in tʼaan tu yoʼolal le jaajoʼ. Tuláakal máax uts tu tʼaan u yuʼubik le jaajoʼ ku yuʼubik in tʼaan» (Juan 18:37).

Jesuseʼ tsʼokaʼaniliʼ u yáax aʼalik tiʼ Tomaseʼ: «Teen le bejoʼ, teen le jaajoʼ yéetel teen le kuxtaloʼ». Beoraaʼ Pilatoeʼ tsʼoʼok u yuʼubik Jesuseʼ taal utiaʼal u tʼaan tiʼ «le jaajoʼ», u jaajil yoʼolal le Reinooʼ. Jesuseʼ u chʼaʼtukultmaj u tsʼáaik kʼaj óoltbil u jaajil kex ka yanak tak u tsʼáaik u kuxtal tu yoʼolal. Pilato túuneʼ tu kʼáatajtiʼ: «¿Baʼax le jaajoʼ?», baʼaleʼ maʼ tu páaʼtaj u tsoʼolol u maasil tiʼ tu yoʼolaliʼ. Ku tuklikeʼ tsʼoʼok u yuʼubik tuláakal utiaʼal u páajtal u juzgartik Jesús (Juan 14:6; 18:38).

Pilatoeʼ kaʼa jóokʼ yiknal le máakoʼob aktáan tiʼ u palaciooʼ. Maʼ xaaneʼ tak Jesús bin tu yéetel, ka tu yaʼalaj tiʼ u nuuktakil le sacerdoteʼob yéetel u maasil máakoʼob yanoʼob tu yiknaloʼoboʼ: «Mix baʼal kʼaas kin wilik u beetmaj le máakaʼ». Le máakoʼoboʼ pʼuʼujoʼob yoʼolal le baʼax tu yaʼaloʼ, ka joʼopʼ u yaʼalikoʼob: «Le máakaʼ táan u pʼuʼujsik le kaaj ikil u máan kaʼansaj tiʼ tuláakal Judea, desde Galilea tak wayeʼ» (Lucas 23:4, 5).

Pilatoeʼ jaʼakʼ u yóol yoʼolal le baʼaxoʼob ku yaʼalik le máakoʼob tu contra Jesusoʼ. Ka tu yuʼubaj Pilato le baʼax ku yaʼalik u nuuktakil le sacerdoteʼob yéetel u nuuktakil le judíoʼoboʼ, tu yaʼalaj tiʼ Jesús: «¿Maʼ wa ta wuʼuyik bukaʼaj baʼaloʼob ku yaʼalaʼal ta contra?» (Mateo 27:13). Jesuseʼ mix baʼal tu núukajtiʼ kex yaʼab baʼaloʼob maʼ jaajtak ku yaʼalaʼal tu contraiʼ. Lelaʼ tu beetaj u maas jaʼakʼal u yóol Pilato.

Le judíoʼoboʼ tu yaʼaloʼobeʼ Jesuseʼ ku «máan kaʼansaj tiʼ tuláakal Judea, desde Galilea». Bey túunoʼ tu tsʼáaj cuenta Jesuseʼ Galilea u taal. Lelaʼ tu taasaj tu tuukul baʼax ken u beet utiaʼal maʼ u juzgartik Jesús. Herodes Antipas (u hijo Herodes le Nojochoʼ), letiʼ ku gobernar Galilea yéetel taaljaʼan Jerusalén utiaʼal u kʼiinbesajil le Pascuaoʼ. Pilato túuneʼ tu túuxtaj Jesús yiknal Herodes Antipas, le máax beet u kúulxotʼtaʼal u pool Juan Bautistaoʼ. Le oʼolal sajakchaj ka tu yojéeltaj táan u beetaʼal milagroʼob tumen Jesús, tumen tu tuklaj tsʼoʼok u kaʼa kuxtal Juan ichil le kimenoʼoboʼ (Lucas 9:7-9).

Beoraaʼ Herodeseʼ kiʼimakchaj u yóol, tumen yaan u yilik Jesús. Baʼaleʼ maʼ tumen wa taak u yáantik Jesús utiaʼal ka chíikpajak maʼ jaaj le baʼaxoʼob ku yaʼalaʼal tu contraoʼ. Baʼaxeʼ letiʼeʼ chéen taak u yilik «u beetik junpʼéel» milagro (Lucas 23:8). Baʼaleʼ Jesuseʼ maʼ tu beetaj mix junpʼéel milagro u yiliʼ. Mix le kʼáatchiʼob beetaʼabtiʼ tumen Herodes tu núukoʼ. Le oʼolaleʼ Herodes yéetel u soldadoʼobeʼ joʼopʼ u taaskoʼob Jesús «mix baʼalil» (Lucas 23:11). Tu tsʼáajoʼob u búukint junpʼéel jatsʼuts nookʼeʼ ka joʼopʼ u pʼaʼastikoʼob. Ka tsʼoʼokeʼ Herodeseʼ tu kaʼa beetaj u bisaʼal yiknal Pilato. Herodes yéetel Pilatoeʼ u pʼekmubaʼob kaʼachi, baʼaleʼ beoraaʼ tsʼoʼok u joʼopʼol u kaʼa biskubaʼob.

Ka kʼujsaʼab Jesús yiknal Pilatoeʼ tu tʼanaj u nuuktakil le sacerdoteʼob yéetel u nuuktakil le judíoʼob bey xan u maasil máakoʼoboʼ ka tu yaʼaloʼob: «¡Ileʼex!, teneʼ ta táaneʼex tsʼoʼok in beetik  kʼáatchiʼob tiʼ, yéetel tsʼoʼok in wilik mix baʼal kʼaas u beetmaj utiaʼal a takikeʼex u pool. Tak Herodes tu yilaj mix baʼal kʼaas u beetmaj, le oʼolal tu kaʼa túuxtaj wayeʼ; le beetkeʼ, ¡ilawileʼex!, maʼ u beetmaj mix baʼal ka u náajmat u kíimsaʼaliʼ. Le oʼolaleʼ yaan in castigartik, ken tsʼoʼokkeʼ kin jáalkʼabtik» (Lucas 23:14-16).

Pilatoeʼ taak u jáalkʼabtik Jesús, tumen tsʼoʼok u yilik chéen pʼektaʼan tumen u nuuktakil le sacerdoteʼoboʼ ka tu kʼuboʼob tiʼ. Teʼ súutuk taak u jáalkʼabtik Jesusoʼ anchaj uláakʼ junpʼéel baʼal beet u maas taaktal u beetik. Le kulukbal tuʼux ku juzgartik Jesusoʼ, túuxtaʼab aʼalbiltiʼ tumen u yatan: «Maʼ a woksikaba yéetel le utsul máakaʼ, tumen bejlaʼeʼ yaan junpʼéel baʼax tin wayakʼtaj yaan yil tu yéetel; lelaʼ jach tu beetaj u jaʼakʼal in wóol» (Mateo 27:19).

¿Bix kun páajtal u jáalkʼabtik le máak mix baʼal kʼaas u beetmoʼ?