E ngae ngke e a tia ni bwainikirinaki Iesu n te aro ae iowawa ma ni bwainingareaki ma a bon aki kuba mataniwi n ibonga ao taani boutokaiia n ana kakorakora Birato ni kani kainaomataa. A aki kani karaoa te bwai teuana ae e na kamaiuaki iai Iesu are e a motikaki taekana bwa e na kamateaki. A tatakarua ni kangai: “Kamatea i aon te kai! Kamatea i aon te kai!” E kaeka Birato ni kangai: “Kairianako ngkami ao kamatea, bwa akea ana bure ae I kunea.”​—Ioane 19:6.

A aki angani Birato te bwai ni kakoaua ibukin Iesu bwa e tau ni kamateaki n ana bure ni kaitaraa te tautaeka. Ma iai aia bukibuki ni kaineti ma te Aro? A a manga okira aia bukibuki ibukin te bakannatua are a kaitaraa iai Iesu ngke e kaboowiaki i matan te Tanirim. A taku: “Iai ara tua ao e riai ni mate ni kaineti ma ara tua, ibukina bwa e taku bwa natin te Atua ngaia.” (Ioane 19:7) E boou irouni Birato te bukibuki aei.

E a manga rinnako n ana baareti ao ni kataia n ukera te anga ae e na kainaomataa iai te mwaane aei, are e a kaitaraa motikan taekana ae iowawa ao bon teuaei are e miia naba buuni Birato. (Mataio 27:19) Ma tera aron te bukibuki ae boou aei are a taekinna I-Iutaia ae teuare e taku bwa bon “Natin te Atua” ngaia? E ataia Birato ae Iesu boni kaaini Kariraia. (Ruka 23:5-7) Ma e titirakina Iesu ni kangai: “Ko roko mai ia?” (Ioane 19:9) E koaua bwa e kona n iangoia Birato bwa tao e a kamani maiu Iesu ao n iangoia naba bwa boni mairoun te Atua?

E a tia n ongo Birato mairoun Iesu bwa bon te uea ngaia, ma tiaki man te aonnaba aei ana Tautaeka n Uea. E teimatoa n aki kakarongoa Iesu bwa e aki kani kabwarabwaraa riki are e a tia n taekinna. E a kainikatonga Birato ngke e rawa ni kaeka Iesu ao e a taetae ma te un nakoina ni kangai: “Ko rawa ni kaekaai? Ko aki ataia ae iai mwaakau ni kainaomatako ao iai mwaakau ni kamateko?”​—Ioane 19:10.

E kaeka Iesu ni kangai: “E na bon akea mwaakam ni karaoa te bwai teuana nakoiu ngke arona bwa ko aki anganaki mai eta. Aei bukina ae e rawawata riki iai ana bure teuare kabureai nakoim.” (Ioane 19:11) E bae Iesu n aki iangoa temanna te aomata. Ma e nanonna bwa boni Kaiaba, taani boutokaia, ao Iuta Itekariota, aika a na tuuraki n rawawatan te mwakuri are a karaoia nakon ae e na tuuraki iai Birato.

Ibukin anaakin nanona n aron Iesu n taetae, ao maakuna ae bati bwa tao boni mairoun te Atua Iesu, e a kataia riki Birato ni kainaomataa. Ma a a manga taekina te bwai teuana riki I-Iutaia ae e na maaku iai Birato. A kakamaakua ni kangai: “Ngkana ko kabwaraa teuaei, ao tiaki raoraoni Kaitara ngkoe. Te aomata nako are e karaoia i bon irouna bwa te uea, e bon ekaanako Kaitara.”​—Ioane 19:12.

E a manga kaotinakoa riki Iesu te kowana, e tekateka i aon te bao ni motikitaeka, ao e tuangia aomata ni kangai: “Noria! Ami uea!” Ma e bon aki bitaki aia iango I-Iutaia, ma a tatakarua ni kangai: “Kairianako! Kairianako! Kamatea i aon te kai!” E a titiraki Birato ni kangai: “N na kamatea ami uea?” A a maan ni maraki nanoia i aan aia kairiri kaain Rom, ma a kamatoaa n taekinna mataniwi n ibonga ni kangai: “Akea ara uea ma tii Kaitara.”​—Ioane 19:14, 15.

E a kariaia Birato aia kairoro I-Iutaia ao e a anga Iesu nakoia bwa e na kamateaki. A buuta ana kunnikai Iesu ae uraroo tautia ao a karin ana kauaatao i aona. E riai n uota ana kai ni kammaraki Iesu ngke e a kairakinako.

Ai moaningabongin te Kanimabong ngkai n Nitian 14. E bon aki matu Iesu mani moaningabongin te Kaabong ao n tia naba n rinanon te karawawataaki ae korakora teuana imwin teuana. Ngke e kabokorakora i aan rawawatan te kai, ao e a tabe ni kerikaaki korakorana. Ngaia are a kairoroa temanna ae rikekei ae Timon te I-Kurene i Aberika tautia bwa e na uota te kai nakon te tabo are e na kamateaki iai. A a bati ake a ira Iesu, ao iai ake a tang ma n ororei bwanibwania ao ni bwaebwaeti ibukin Iesu.

E taku Iesu nakoia aine ake a nanokawaki: “Natin Ierutarem aika aine, katoka tangimi ibukiu. Ma kam na tang i bon ibukimi ao ibukia natimi, bwa noria! ane a na roko boong ake a na kangai iai aomata, ‘A a kukurei aine aika kanoabo, ao akana aki bung, ao akana aki kammamma!’ Ao ane a na kangai aomata nakoni maunga, ‘Bwakarira!’ ao nakon taian tabuki, ‘Rabunira!’ Ngkana a karaoa aei nakon te aroka ae maiureirei, ao tera ae e na riki ngkana e a rai?”​—Ruka 23:28-31.

E taetae Iesu ibukin te natannaomata ae I-Iutaia. A katotonga te kai ae maiu teutana bwa e mwaimwai teutana n te ran, bwa e tuai ni kitanaki iroun Iesu ao iai naba I-Iutaia tabeman i buakoia aika onimakinna. Ngkana a kairakinako koraki aikai mai buakon te natannaomata aei, ao a na tii tiku ngkanne te koraki aika ai aron te aroka ae mate. E na bati te tangiroaa ngkana a a riki kaain ana taanga ni buaka Rom bwa taani motikitaeka ibukin te Atua ni kaitaraa te natannaomata anne!