Mahopọnna dọ yè ko yí kanyinylan do sayana Jesu bo ṣàn ẹn kò, vivẹnudido Pilati tọn lẹ nado tún in dote ma dọ nudepope na yẹwhenọgán lẹ po godonọnamẹtọ yetọn lẹ po. Okú Jesu tọn dín wẹ yé te bọ ohó fó. Yé to awhádo mapote dọmọ: “Whè e do núgo! Whè e do núgo!” Pilati gblọn dọmọ: “Mìlọsu ni plan ẹn bo whè e do núgo, na yẹn ma mọ oylan depope to okọ̀ na ẹn.”—Johanu 19:6.

Ju lẹ ma penugo nado diọlinlẹnna Pilati dọ Jesu jẹna okú na owhẹ̀ tonudidọ tọn de wutu, ṣigba etẹwẹ dogbọn owhẹ̀ sinsẹ̀n tọn dali? Yé vọ́ owhẹ̀ nùzinzan tọn he yin sisadokọna Jesu to Whẹdatẹn Daho lọ nukọn fọndote. Yé dọmọ “Míwlẹ tindo osẹ́n de, podọ sọgbe hẹ osẹ́n lọ, ewọ dona kú, na e ylọ ede dọ visunnu Jiwheyẹwhe tọn wutu.” (Johanu 19:7) Whẹsadokọnamẹ yọyọ de wẹ enẹ yin na Pilati.

Pilati lẹkọyi họ̀nmẹ etọn bo tẹnpọn nado kàn ayiha devo nado tún dawe lọ he ko jiya yasanamẹ sinsinyẹn tọn, podọ ehe go asi etọn lọsu ko kudlọ gando lọ dote. (Matiu 27:19) Etẹwẹ dogbọn whẹsadokọnamẹ yọyọ he Ju lẹ detọ́n sọta gàntọ lọ—dọ ewọ yin “Visunnu Jiwheyẹwhe tọn” dali? Pilati yọnẹn dọ Galili wẹ Jesu wá sọn. (Luku 23:5-7) Etomọṣo, e kanse Jesu dọmọ: “Fie wẹ hiẹ wá sọn?” (Johanu 19:9) Be Pilati to nuhà dọ vlavo Jesu sọgan ko nọgbẹ̀ pọ́n, bo wá sọn Jiwheyẹwhe dè to linlẹn de mẹ wẹ ya?

Pilati ko sè sọn onù Jesu tọn mẹ tlọlọ dọ ahọlu de wẹ ewọ yin, ṣigba dọ Ahọluduta etọn ma yin apadewhe aihọn ehe tọn. Na Jesu mọdọ e ma yin dandan dọ emi ni vọ́ nuhe emi ko dọ wayi lẹ dọ wutu, e ma kẹnù. Pilati goyitọ lọ gblehomẹ, na Jesu gbẹ́ nado gblọn wutu, e sọ dọna ẹn dọmọ: “Hiẹ ma kẹnù demẹ na mi wẹ? A ma yọnẹn dọ yẹn tindo aṣẹ nado tún we dote podọ yẹn sọ tindo aṣẹ nado whè we do núgo wẹ ya?”—Johanu 19:10.

Jesu dọ poun dọmọ: “Hiẹ ma na ko tindo aṣẹ de do ji e eyin e ma ko yin nina we sọn aga. Ehe wutu wẹ ylando dawe lọ he ze mi do alọ towe mẹ tọn do klohu.” (Johanu 19:11) E taidi dọ Jesu ma to hodọ gando mẹdopo gee go. Kakatimọ, nuhe dọ e te wẹ yindọ Kaifa, godonọnamẹtọ etọn lẹ, po Juda Iskaliọti po, na mọ whẹgbledomẹ yí hú Pilati.

Na nuyiwa po hogbe Jesu tọn lẹ po hẹn awuji Pilati bọ obu etọn sọ to jijideji dọ Jesu sọgan ko wá sọn Jiwheyẹwhe dè wutu, e tẹnpọn whladopo dogọ nado tún in dote. Ṣigba, Ju lẹ sọ yí nudevo do dobuna Pilati. Yé sìn-adán dọmọ: “Eyin hiẹ tún dawe ehe dote, a ma yin họntọn Sesali tọn. Mẹdepope he hẹn ede zun ahọlu to agọjẹdo Sesali.”—Johanu 19:12.

Ayimatẹn-gán lọ hẹn Jesu tọ́njẹgbonu whladopo dogọ, podọ dile ewọ sinai to whẹdaján lọ ji, e dọna omẹ lọ lẹ dọmọ: “Mì pọ́n! Ahọlu mìtọn!” Ṣigba, Ju lẹ ma jogbe. Yé to awhádo dọmọ: “De e sẹ̀ sọn aimẹ! De e sẹ̀ sọn aimẹ! Whè e do núgo!” Pilati vẹ̀ yé dọmọ: “Be yẹn ni whè ahọlu mìtọn do núgo wẹ ya?” Gandudu Lomu tọn ko sayana Ju lẹ sọn whenu dindẹn die; etomọṣo, yẹwhenọgán lọ lẹ dọ po nujikudo po dọmọ: “Míwlẹ ma tindo ahọlu de adavo Sesali.”—Johanu 19:14, 15.

Pilati joawuna obu Ju he to kọgbidina ẹn mapote lọ lẹ tọn bo ze Jesu do alọ yetọn mẹ nado yin hùhù. Awhànfuntọ lọ lẹ de awù daho vẹẹ ṣẹ́ṣẹ́ lọ sọn e go bo do awugbó etọn lẹ na ẹn. Jesu lọsu wẹ sọ dona ze yatin etọn titi dile yè plan ẹn jei.

Todin, ogàn wiawe whèmẹ tọn ko dibla hò to vendredi Nisan 14tọ tọn. Jesu ko to nukle sọn jeudi afọnnu gbọ́n bo ko jiya awufiẹsa sinsinyẹn tọn debọdo-dego. Dile Jesu to linsinyẹn to yatin pinpẹn lọ glọ, huhlọn etọn vọ̀ pete. Enẹwutu, awhànfuntọ lọ lẹ hẹn aligbọntọ de gánnugánnu, enẹ wẹ Simọni he wá sọn Silene to Aflika, nado  didá yatin lọ yì fihe Jesu na yin hùhù te. Mẹsusu hodo e bọ delẹ to yé mẹ to awubla na ẹn bosọ to avihàndo, na nuhe to jijọ lọ wutu.

Jesu dọna yọnnu he to awubla na ẹn lọ lẹ dọmọ: “Viyọnnu Jelusalẹm tọn lẹ emi, mì viavi na mi ba blo. Kakatimọ, mì viavi na mìde podọ na ovi mìtọn lẹ, na mì pọ́n! azán lẹ ja to ehe mẹ gbẹtọ lẹ na dọmọ, ‘Ayajẹnọ wẹ yọnnu wẹnsinọ lẹ, adọ̀ he ma jivi lẹ po anọ́ he yè ma nọ́ pọ́n lẹ po!’ To whenẹnu, yé na jẹ didọna osó lẹ ji dọ, ‘Mì họ́ jẹ mí ji!’ podọ na okọ́ta lẹ dọ, ‘Mì ṣinyọ́n mí ji!’ Eyin yé wà onú ehelẹ to whenue atin lọ to omú, etẹwẹ na jọ to whenue e hú?”—Luku 23:28-31.

Akọta Ju lẹ tọn wẹ Jesu to alọdlẹndo. Akọta lọ taidi atin de he to kúkú ṣigba bo gbẹ́ pò to omú pẹẹde, na Jesu po delẹ to Ju he yí i sè lẹ mẹ po gbẹ́ pò to finẹ wutu. Eyin omẹ ehelẹ yin didesẹ sọn akọta lọ mẹ, akọta he ko kú to gbigbọ-liho de kẹdẹ wẹ na pò to aimẹ, taidi atin kúkú de. Avi lọ na sinyẹn taun to whenue awhànpa Lomu tọn lẹ na yinuwa taidi nuyizan Jiwheyẹwhe tọn nado hẹn whẹdida ṣẹ do akọta enẹ ji!