Kata obedo ni osehiny Yesu marach kijare, pod kinda ma Pilato oseketo mar gonyo Yesu ok lok chuny jodong-jodolo kod joma riwogi lwedo. Giramo ni Yesu to nyaka tho. Gimedo mana kok niya: “Gure e yath! Gure e yath!” Pilato konegi kama: “Kaweuru un uwegi mondo unege nimar an ok ayudo ketho moro amora kuome.”​—Johana 19:6.

Jo-Yahudi osetemo tiyo gi wach ketho chik sirkal mondo gimi Pilato one ni Yesu owinjore gi tho, to mano ok otiyonegi. Omiyo, gitemo donjone ni oketho chik mar din. Wach onogo e ma ne gisedonjonego e nyim Sanhedrin ni ochayo Nyasaye. Giwacho ne Pilato niya: “Wan gi chik, kendo ka luwore gi chik, onego otho, nimar osetimore owuon ni en wuod Nyasaye.” (Johana 19:7) E nyim Pilato, mano en wach manyien modonjnego Yesu.

Pilato dok e ode mondo otem manyo yo ma dogonygo jal mosenano e sand mager kamano, ma en jal ma kata chi Pilato owuon oseorne lek nikech en. (Mathayo 27:19) To nade wach manyien ma Jo-Yahudi donjonego ni oketore owuon ni en “wuod Nyasaye”? Pilato ong’eyo ni Yesu en Ja-Galili. (Luka 23:5-7) To e ma pod openjo Yesu niya: “Ia kanye?” (Johana 19:9) Dibed ni Pilato penjore kabe Yesu osegadak e kinde moko machon, ma dibed kata ni oa ir Nyasaye?

Pilato nosegawinjo achiel kachiel ka Yesu wacho ni en ruoth ma Pinyruodhe ok en mar pinyni. Nikech Yesu ok dwar medo wach moro e wi gima nosewacho, oling’ aling’a thi. Nikech ok owach gimoro, mano wang’o i Pilato kendo owacho ne Yesu kong’awore gi sunga kama: “Ok idwar wuoyo koda? Be ing’eyo ni an gi teko mar gonyi kendo an gi teko mar negi?”​—Johana 19:10.

Yesu to dwoke mana ni: “Ok da ibedo gi teko moro amora kuoma, mak mana ka nomiyigo koa malo. Mano e momiyo ng’at ma ne oketa e lweti nigi richo moloyo.” (Johana 19:11) Nyalo bedo ni Yesu ok wuo ka en mana gi ng’at achiel e paro. Kar mano, onyiso ni Kayafa, joma riwe lwedo, kod Judas Iskariot nigi ketho maduong’ moloyo Pilato.

Nikech Yesu okue mos kendo wechene bende ng’won, Pilato mor kode. To nikech oneno ni dipo ka Yesu en ng’at moa ka Nyasaye, otemo kendo mondo ogonye. Kata kamano, Jo-Yahudi sieko gi gima chielo ma nyaka bed ni olo koyo e i Pilato. Gisieme kama: “Ka igonyo ng’atni, to ok in osiep Kaisar. Ng’ato ang’ata ma ketore owuon ruoth, okwedo Kaisar.”​—Johana 19:12.

Pilato chiko ni oter Yesu oko kendo, kae to bang’ kosebet e kome mar ng’ado bura, owacho ne ogandano niya: “Neuru! Eri ruodhu!” To mano ok mi Jo-Yahudi dog chien. Giwachone ni: “Gole oa kae! Gole oa kae! Gure e yath!” Pilato sayogi kama: “Udwaro ni aneg ruodhu?” Jo-Yahudi osebedo ka ok mor gi loch mar Jo-Rumi kuom kinde mang’eny; to e ma pod jodong-jodolo ramo gi chir niya: “Waonge gi ruoth mak mana Kaisar.”​—Johana 19:14, 15.

Nikech luoro ma Pilato nigo nimar Jo-Yahudi chune gi dwachgi, ochiwo Yesu e lwetgi mondo gidhi ginege. Askeche lonyo ne Yesu nanga makwar mapichnicha kae to girwakone nangane ma oko. Sama itero Yesu kidhi nege, jogo chune gi ting’o yadh-sand midhi negeeno.

Sani koro en Tich Abich okinyi, Nisan 14. Yesu pok onindo chakre okinyi ma nyoro Tich Ang’wen, kendo osebed mana gisande kuom thuolono duto. Teko Yesu rumo sama ochur gi yath mochune ni oting’no. Kuom mano, askechego chuno jal moro ma kadho kanyo miluongo  ni Simon ma ja piny Kirene manie Afrika, mondo jalno oting’ yadhno nyaka kama idhi negie Yesu. Ji mang’eny luwogi, kendo moko kuomgi goyo nduru ka gin gi kuyo nikech gima timoreno.

Yesu wacho ne mon ma ywak kanyogo kama: “Nyi Jerusalem, weuru ywak nikech an. Kar mano, ywaguru nikech un uwegi kendo nikech nyithindu; nimar neuru! ndalo biro ma ji nowach ni, ‘Mon mamor gin mon ma migumba, gi iye ma ne ok onyuol, kod thunde ma ne ok odhodh!’ Eka ginichak wacho ne gode ni, ‘Podhuru kuomwa!’ kendo ne thuche ni, ‘Umwauru!’ Ka gitimo gigi e kinde ma yath pod numu, ang’o ma biro timore ka yath oner?”​—Luka 23:28-31.

Joma Yesu wuoyo e wigi kanyo gin oganda mar Jo-Yahudi. Ogandano chalo gi yath ma pod numu, nimar Yesu kaachiel gi joma oseyie kuome pod ni kodgi. Sama osegol Yesu gi joma oyie kuomego, winjruok mar ogandano gi Nyasaye dhi dong’ marach mi gibed mana ka yath mosener kendo otho. Ywagruok malich nobedie e kinde ma jolwenj Rumi nobi e lo Nyasaye mondo giketh ogandano!