Yesu oneto vana fulu kina lukufi ye mbanza, i vau kevondelwa kumosi ye mivi miole. E fulu kiaki kiyikilwanga vo Ngolongota, yovo Valanganza kia Ntu. E fulu kiaki kimonekanga “kuna vala.”—Maku 15:40.

Yesu ye mivi miole bavudilu e mvuatu miau mia ntandu. I bosi, babatwasidi vinyu yasangwa dikaya dia mô ye mbilubisu. Nanga akento a Yerusaleme bevanganga yo. Esi Roma beyambulanga vo e vinyu yayi yavewa kwa abakami ana bevondwa, kimana balembi mona e mpasi za lufwa. O Yesu oyelekele yo, kansi kazolele yo nua ko. Ekuma? Ekuma kadi kazolele kala ku nsi a nkolwa ko muna ntangwa yayi yampasi zisundidi; ozolele zaya mawonso bekumvanga yo sikila ye kwikizi yavana kefwa kwandi.

Yesu olekeso vana nti ampasi. (Maku 15:25) Makesa ma Roma bankomene nsonso muna moko yo malu, zitobuele nitu yo mayikilu, Yesu okungidi ye mpasi. Vava batongekele o nti ampasi, e ndunzi zisakidi diaka, kadi e zitu dia nitu a Yesu ditiazidi e nsuni yo vongesa e mputa. Kansi, o Yesu kabamini makesa ma Roma ko. Osambidi, oku vo: “E Tata, ubaloloka, kadi ke bazeye kwau ko owu bevanganga.”—Luka 23:34.

Esi Roma bena ye fu kia soneka vana baya o nkanu kavovele o muntu bavondele. Mu kuma kia Yesu, Pilato osonekene vana baya vo: “Yesu wa musi Nazarete wa Ntinu a Ayuda.” Masonamene muna nding’a Kiyibere, Kilatini ye Kingerekia kimana wantu awonso batanga mo. Pilato ovangidi wo mu songa vo kayangalele ko wau Ayuda basiandamene kaka vo Yesu kavondwa. Kansi nganga zambuta bafungidi makasi, bavovese Pilato vo: “Kusoneki ko vo ‘Ntinu a Ayuda,’ kansi soneka edi kavova vo, ‘Mono i Ntinu a Ayuda.’” Pilato kazolele vukumunwa ko, ubavutwidi vo: “Dina nsonekene, nsonekene.”—Yoane 19:19-22.

Kuma makasi mawonso, nganga zambuta bavutukidi diaka e kimbangi kia luvunu batele kuna Mbazi a Nkanu. O wantu beviokanga vana fulu kiaki, batiangwini Yesu yo nikuna ntu miau, oku vo: “Ongeye wadi bangula tempelo yo tungulula yo muna lumbu tatu, se ukivuluza yo kulumuka ova nti ampasi.” Diau adimosi mpe, nganga zambuta ye asoneki bayantikidi sakanena Yesu, oku vo: “Yambula Kristu, o Ntinu a Isaele, kakulumuka vana nti ampasi, tukwikila muna yandi.” (Maku 15:29-32) Kana nkutu e mivi miole bakomeno vana nti vana ndambu andi, bayantikidi kuntumba, ke bazeye wo ko vo Yesu kanete kwandi nkanu ko.

Makesa yá ma Roma bayantikidi seva Yesu. Nanga mu nua bena e vinyu ya ngani. Muna veza Yesu, bamvene ndambu, kansi ke lenda yo tambula ko kimana kanua. Makesa ma Roma basevele e mvovo misonamene vana baya dina vana ntandu a ntu a Yesu, bavovele vo: “Avo nge i Ntinu a Ayuda, uyivuluza.” (Luka 23:36, 37) Yindula e diambu edi! O muntu ona wavovele vo yandi i nzila, i ludi yo moyo, owau mumweswa kena e mpasi, sevua yo sakanenwa. Kansi Yesu obutamene kwandi, kabamini Ayuda ko ye makesa ma Roma bekunsevanga, ka tumbidi ko e yimpumbulu yole ikomeno vana ndambu andi.

Makesa yá ma Roma, babakidi mvuatu mia Yesu, bakayanese mio mu tini yá. Batele nkas’a mienze mu zaya e tini kina konso muntu kebaka. Kansi e kinkutu kia Yesu kia ntalu kikilu, “kiakondwa nswiku tuka kuna ntandu yamuna yanda.” Makesa bavovanene vo: “Ke tutiazuni kio ko, tutelela kio nkas’a mienze twazaya nani obonga kio.” Muna vanga wo, balunganese e sono kivovanga vo: “Bakayanene mvuatu ame, batelele kinkutu kiame nkas’a mienze.”—Yoane 19:23, 24; Nkunga 22:18.

Kuna kwa landa, kimpumbulu kimosi, obakwidi vo Yesu ntinu kikilu. Otumbidi nkwandi muna mvovo emi: “Ongeye kuvumina Nzambi ko wau otumbilu tumbu kiau akimosi yo yandi e? Diansongi kwa yeto, kadi oyeto, tutambwidi nsendo wa mavangu meto; kansi muntu ndioyu, kavangidi diambu diambi ko.” I bosi, ovovele mpe vo: “E Yesu, unsungamena vava okota muna Kintinu kiaku.”—Luka 23:40-42.

Yesu umvutwidi vo: “Kieleka, o unu isamunwini vo, okala yame muna Paradiso.” (Luka 23:43) O nsilu wau waswaswana yo una o Yesu kasila kwa ntumwa zandi vo bevuanda yandi vana kunda muna Kintinu. (Matai 19:28; Luka 22:29, 30) Nanga nyuda ndioyo wa kimpumbulu, ozeye vo vakala ye Paradiso ina Yave kakubikila Adami yo Eva ye mbongo au yawonso. O mwivi ndoyo ofwidi ye vuvu kia paradiso muna ntim’andi.