Sesusi kumwe novifuanga vivali avatualwa komphangu ankho ikala popepi nepunda-umbo opo vakaipawe. Omphangu oyo ankho itiwa o Gologota, ine Otyikola Tyomutwe iya ankho imoneka “kokule.” — Maluku 15:40.

Ovalume ovo vetatu avalulwa ovikutu viavo. Konyima, aveveavela ovinyu imwe yahonyekwa nomafo akoleswa. Tyipondola, opo veheive omaluihamo tyina vaipawa, ovakai vamwe vomo Selusalei avevepongiyila ovinyu. Iya ova Loma, mokonda ononkhuatwa ombo mambuipawa-le, avehevetyilika. Mahi etyi Sesusi eimakela, ehetavela okuinwa. Mokonda yatyi? Sesusi ankho kahande okunyona onondunge mbae putyina ekahi nokulolwa; ankho uhanda okutualako noukuatyili alo kononkhia.

Pahe Sesusi avemulangeka komuti na apapelwe.(Maluku 15:25) Omafualali aemupapela nonopeleku komavoko no konomphai, ambunyingila molutu lwae, otyo atyiihama unene. Tyina vaumphula omuti oo, atyimuihama vali unene mokonda olutu lwae ankho luayendyelela monopeleku, ambunane vali ovipute. Mahi no ngotyo, Sesusi ahapopi omapita omafualali oo. Elikuambela ati: “Tate, veevela mokonda etyi vekahi nokulinga kavetyii.” — Luka 23:34.

Ova Loma ankho tyina vamaipaa omunthu una etyi alinga vetyihoneka pokavai. Monthiki oyo, Pilatu ahoneka onondaka mbati: “O Sesusi omu Nasalee Ohamba yova Sundeu.” Ankho mbahonekwa melaka lyo Hebeleu no Latii no Geleku opo ovanthu aveho vembunoñgonoke. Etyi Pilatu alinga tyalekesa okuti kahandele etyi ova Sundeu vemuita opo Sesusi aipawe. Ovanene-nakwa avanumana, avati: “Wahahoneke okuti ‘Ohamba yova Sundeu,’ honeka okuti wati, ‘Ame, ame Hamba yova Sundeu.’” Pilatu ankho kahandele vemuhongiliye vali okulinga etyi tyapenga, ati: “Etyi ame nahoneka, nahoneka.” —Suau 19:19-22.

Ovanene-nakwa ankho vanumana, avawane vali etyi vemutendeleyile Mombonge yova Sundeu. Ovanthu ankho vakuata-po, otyo vapuka komutwe monkhalelo yokupenya Sesusi nokumulinga omukuele, avati: “Ove wokuti moteye-po ondyuo ya Huku oitungu mononthiki ononthatu, liyovola momuti wemone, tuluka-mo.” Novanene-nakwa kumwe novahoneki vovitumino avahimbika okulipopila poyavo okuti: “Ha Kilisitu Ohamba yo Isilayeli, pahe atuluke momuti wemone opo onthue tumutavele.” (Maluku 15:29-32) Alo umwe vana ankho vapapelwa ponthele yae avahimbika okumupopia omapita. Mahi Sesusi ankho kalingile etyi tyapenga.

Omafualali nao aalingi omukuele Sesusi. Tyipondola ankho ekahi nokunwa ovinyu, otyo anyanena ku Sesusi, aemulingi omukuele ngatyina maemuavela, mahi ngwe ankho kavasi-ko opo anwe. Ova Loma avahimbika okukuela Sesusi mokonda yonondaka mbahonekwa kokavai ankho kekahi peulu liomutwe wae, avati: “Inkha ove Hamba yova Sundeu, liyovola ove muene.” (Luka 23:36, 37) Nkhele soka: Sesusi ankho walekesa okuti oe ondyila, oe otyili, oe omuenyo, mahi pahe ankho ukahi nokukuelwa, nokulingwa onya. Namphila amoneswa ononkhumbi ombo ambuho, mahi kapopile omapita ova Sundeu ankho vekahi nokumutala, nii omafualali ova Loma emulinga omukuele, nii ovifuanga vina viapapelwa ponthele yae.

Omafualai ekuana, aapolo ovikutu vya Sesusi vyo kombanda, aeviyapula ovinthimbu vikuana. Pahe aayumbu owela na atale otyinthimbu patyi kese wike mapolo-po. Mahi otyikutu tya Sesusi tyo kohi, ankho otyiwa unene, “tyitupu ominyiko okupolela keulu alo kombuelo.” Ngotyo, omafualali aasoko okuti: “Tuhetyitandulei, tuyumbei owela opo tutale olie makala natyo.” Otyo atyifuisapo ovihonekwa viokuati: “Veliyapaulila omuvalo wange, avayumbu owela mokonda yovikutu viange.” — Suau 19:23, 24; Salmo 22:18.

Pahe otyifuanga tyimwe atyinoñgonoka okuti Sesusi tyotyili ohamba. Atyiviyula otyikuavo okuti: “Ove ñgana ukahi mononkhumbi mbehitiso lielifwa no liae, ngotyo nii kutili owoma Huku? Iya ekoyeso lietu tukahi nokutambula liaviuka, mokonda tukahi nokutambula etyi tyatokala muetyi tualinga. Mahi omulume ou natyike alinga tyapenga.” Moluotyo, atyiiti Sesusi okuti: “Nthyinangele tyina wamanyingila Mouhamba wove.” — Luka 23:40-42.

Sesusi etyikumbulula ati: “Tyotyili, ame hono ndyikupopila okuti: Ove mokakala na ame Momphangu Yombembwa,” kapopile okuti mokakala keulu. (Luka 23:43) )Ekevelelo olio ankho lielikalela neli Sesusi aavelele ono apositolu mbae, etyi ati mavakatumina nae Mouhamba wa Huku. (Mateusi 19:28; Luka 22:29, 30) Mahi, omu Sundeu oo otyifuanga, tyipondola weivile-ale okuti Siovaa walingile Omphangu Yombembwa pano pohi, opo Andau na Eva, novana vavo vakale-mo. Pahe otyifuanga otyo ankho matyinkhi, mahi tyina ekevelelo.