Eyi yapwile jino “ola yakusokesa 6,” chipwe lwola lwamusana. Kaha kwejile milima yakukomowesa yize “yafwikile lifuchi lize lyosena palanga nakuola yakusokesa 9,” chipwe lwola lwa 15:00. (Mako 15:33) Eyi milima yayinene kayapwile ufuku wachonga ulambako. Mwomwo ufuku wachonga ulamba weji kupwangako hakumweka chakakweji, oloze lwola kana lwapwile lwachiwanyino chaPaseka luze kakweji asolokele wosena wamuundu. Kaheyi milima kana nawa yashimbwile kuhambakana lwola luze kweji kupwanga ufuku wachonga ulamba. Chikupu vene, Kalunga ikiye alingishile kupwenga milima kaneyi.

Achishinganyekenu omu vevwile vatu vaze valumbilishilenga Yesu. Halwola kanelu kwapwile milima yayinene, mapwevo vawana vayile kwakamwihi nachitondo vapapalilileho Yesu. Mapwevo kana vapwile Salome, nanaye yaYesu, naMaliya wakuMangatala, naMaliya naye yakaposetolo Yowano naYakova wakanyike.

Kaposetolo Yowano apwile nanaye yaYesu uze apwile nakulishona, kaha “vemanyine kwakamwihi nachitondo.” Maliya amwene mwanenyi uze asemene nakwamwisa vanamusukika hachitondo ali nakulyonyinga. Kuli ikiye chapwile kwijiva nge vanamutuvu “poko yamukwale yayisuku.” (Yowano 19:25; Luka 2:35) Chamokomoko nakukola evwile, Yesu azakamine naye. Anengwile kumutwe hakutala Yowano, kaha ambile kuli naye ngwenyi: “Ove pwevo, tala! Mwanove ou!” Kaha nawa anengwile kumutwe hakutala Maliya nakwamba kuli Yowano ngwenyi: “Tala! Noko ou!”—Yowano 19:26, 27.

Yesu alwezele kaposetolo kenyi uze azangile chikuma azakame naye uze pamo apwile tuliwe. Yesu atachikijile ngwenyi vasongo jenyi vamalunga vaze asemene naye Maliya vapwile kanda vachimufwelele. Ngocho Yesu apwile nakulongesela naye vyuma vyakumujimba navyakushipilitu. Echi hichakutalilaho chamwaza.

Omu yize milima yakumine, Yesu ambile ngwenyi: “Ngunevu lipwila.” Ngocho ateselemo visoneka. (Yowano 19:28; Samu 22:15) Yesu atachikijile ngwenyi Ise halwola kana kamukingileko mangana kulonga chaMwanenyi vacheseke chikuma. Kulishitu atambakanyine mulilimi lyachiAlamayiki chakuNgalileya ngwenyi: “Eli, Eli, lama savakatanyi?” kulumbununa ngwenyi, “Ove Kalunga kami, ove Kalunga kami, mwomwo ika unangusezela?” Vaze vemanyine kwakamwihi kavevwishishile vyuma apwile nakuhanjikako, ngocho vambile ngwavo: “Ivwenu! Ali nakusanyika Elija.” Jino mutu umwe alahile, atupikile chiponja muvinyo vingangamina, achihakile kulihongo nakuhana Yesu anwenga. Oloze vamwe vambile ngwavo: “Mwechenu! Manenu tutale numba nge Elija mweza nakumufumisaho.”—Mako 15:34-36.

Yesu jino atambakanyine ngwenyi: “Vyuma vyosena vinatesamo jino.” (Yowano 19:30) Eyo, Yesu ateselemo vyuma vyosena vize Ise amutuminyine hano hamavu. Kufumaho, Yesu ambile ngwenyi: “Ove Tata, nanguseza shipilitu yami mumavoko ove.” (Luka 23:46) Yesu asezele ngolo jenyi jakuyoya mumavoko aYehova, nakwinjikiza ngwenyi Kalunga mwakamukindulwishilajo cheka. Ngocho Kulishitu afwelelele Kalunga, kaha azewile mutwe wenyi, afwile.

Kaha kwejile mundenda waunene, namalolwa apulikile. Mundenda kana wapwile waunene chikuma mwomwo walingishile navimbumbe vimwe vize vyapwile kuweluka waYelusalema vipulike, kaha vafu  vapwilemo vavambilile haweluka. Kaha vatu vaze vapwile nakuhita mujila hakumona mijimba yavatu yakufwa, vengilile “munganda yajila” nakwambulula vyuma vamwene.—Mateu 12:11; 27:51-53.

Omu afwile Yesu, lihina lyalisuku lize lyahandunwine muze Mwajila namuze Mwajila Chikuma mutembele yaKalunga lyapulikile havali kufuma kwilu mbwe nakwishi. Chuma kanechi chakukomwesa chasolwele nge Kalunga apihililile hali vaze vajihile Mwanenyi, nakusolola nawa nge jila yakwingila muze Mwajila Chikuma mwilu, yasokolokele.—WavaHepeleu 9:2, 3; 10:19, 20.

Ngocho vatu vosena vaze vapwileko vevwile woma. Kapitau kamaswalale uze atetekelele vakwavo hakujiha Yesu ambile ngwenyi: “Pundu vene ou mutu apwanga MwanaKalunga.” (Mako 15:39) Atela ou kapitau kwapwile halwola vasopesele Yesu kuli Pilatu omu vapwile nakuhanjika ngwavo Yesu alyambile ivene ngwenyi MwanaKalunga. Halwola luze, etavilile jino ngwenyi Yesu apwile mutu wakwoloka, kaha nawa ngwenyi apwile chikupu MwanaKalunga.

Vavavulu hakumona chuma kanechi chakukomwesa, vayile kumembo avo “oku vali nakuliveta hajitulo javo” kusolola ushona waunene chikuma nasonyi. (Luka 23:48) Vatu vavavulu vaze vemanyinyine hahasuku vapwile tumbaji vamapwevo vaze vatambukilenga hamwe naYesu. Navakiko valikomokelele chikuma havyuma vyosenevi vyasolokele.