“Wĩnto-sʋk” sẽn wa n ta, yel-solemd n maane. “Dũni gill fãa lebga lik bida hal tɩ ta wẽn-kaoore.” (Mark 15:33) Pa yũug-yõk-kiuug buud n maan tɩ zĩigã tiig n sobg ye. Bala yaa kiuugã yiib paalem la rẽ tõe n maane. Yaool n da yaa Pakã wakate, tɩ kiuugã yaa mumdi, n yaa pɛɛlga. Sẽn paase, zĩigã sẽn sobgã, kaoosame n yɩɩd yũug-yõk-kiuugu. Dẽnd yaa Wẽnnaam n kɩt tɩ zĩigã sobge.

Tags-y n ges-y sẽn da yaand-b a Zeezi wã manesem sẽn yɩ to-to, b sẽn yã rẽ wã. Likã sasa, pagb a naas n kolg ra-lukã. Yaa a Zeezi ma, a Salome, a Maari Madelɛn, n paas tʋm-tʋmd a Zak-bil ma a Maari.

Tʋm-tʋmd a Zã ra yasa ne a Zeezi ma wã ra-lukã sɛɛga. A Maari sũ-sãangã pa tõe n bilg ye. A biigã a sẽn dog n zã wã la sẽn be raoogã zug n namsdẽ t’a getẽ wã. Yellã zabd-a-la wa ‘sʋʋg sẽn kõs neda.’ (Zã 19:25; Luk 2:35) La baa toogã sẽn tar a Zeezi wã, a tagsa a ma wã yelle. A modgame n tees a Zã ne a zug n bas n yeel a ma yaa: “Paga, ad f bi-ribla.” La a tees a Maari ne a zug n yeel a Zã yaa: “Ad f ma.”—Zã 19:26, 27.

A Zeezi maana woto sẽn na yɩl tɩ tʋm-tʋmd ning a sẽn nong wʋsgã ges a ma wã sẽn da lebg pʋg-kõorã yelle. A ra miime t’a ma-biisã, sẽn yaa a Maari kom-dibli a taabã ra nan pa tẽed yẽ ye. Rẽ n so t’a rat t’a Zã ges a ma wã yelle, la a sõng-a t’a tẽebã ra koms ye. Woto sɩd yaa mak-sõngo!

Likã sẽn wa n kolg saabã, a Zeezi yeelame: “Ko-yũud n tar maam.” A sẽn yeelã pidsa gomd b sẽn pĩnd n togse. (Zã 19:28; Yɩɩn-sõamyã 22:16) A Zeezi yamẽ, yaa wa a Ba wã basame n pa le kogend-a, a sẽn dat tɩ yẽ burkĩndã paam makr sẽn yaa kãseng n tɩ yɩɩdã. Kirisã zẽka a koɛɛg n yeele: “Eloyi! Eloyi! Lama sabaktani? Sẽn dat n togs tɩ: ‘Mam Wẽnnaam! Mam Wẽnnaam! Yaa bõe tɩ yãmb bas maam?’ ” Neb kẽer sẽn be beenẽ pa wʋm a gomdã võor ye. B yeelame: “Gese, bãmb boonda a Eli.” Ned a yembr wudgame n dɩk neoodgo, n los rã-miisgã n yaag n sel tãnwĩig n kõ a Zeezi. La neb kẽer yeela woto: “Bas-y tɩ d ges a Eli sã n na wa n sik bãmba.”—Mark 15:34-36.

Rẽ poore a Zeezi kelmame n yeele: “Bũmb fãa maan n saame.” (Zã 19:30) Sɩd me, a maana bũmb ning fãa a Ba wã sẽn tʋm-a tẽngã zug t’a wa maanã. A Zeezi baasame n yeel woto: “M ba, m basda m sɩɩgã yãmb nugẽ.” (Luk 23:46) A Zeezi basa a vɩɩmã a Zeova nugẽ, n miẽ t’a Zeova na n lebs n kõ-a lame. A sẽn gom woto n sa wã, a sulga a zugu, n kell n ki. Dẽnd Kirisã teega Wẽnnaam hal n tãag a kũum.

Zĩig pʋgẽ tẽngã rigimdame tɩ pĩisã pusi. Tẽn-digimdgã yɩɩ kãseng wʋsgo, hal tɩ yaadã sẽn be Zeruzalɛm kɩrengã pagse, tɩ kũ-rãmbã pugsi. So-loaadbã sẽn yã kũ-rãmbã sẽn pugsã, b kẽe “tẽn-sõngã pʋgẽ” n togs nebã.—Matye 12:11; 27:51-53.

A Zeezi sẽn ki wã, wẽnd-doogã fu-lilldg-kẽengã sẽn welgd zĩ-sõngã ne zĩ-sõng sẽn yɩɩdã pãrga zĩis a yiibu, yĩngr n tɩ tãag tẽnga. Yel-solemdã wilgame tɩ Wẽnnaam sũur yika ne neb nins sẽn kʋ a Biigã. Leb n wilgdame tɩ rẽ tɛka, sor pakame tɩ neb tõe n paam n kẽng saasẽ sẽn yaa zĩ-sõng sẽn yɩɩdã.—Ebre-rãmbã 9:2, 3; 10:19, 20.

Nebã yɛɛsa wʋsgo, la b bee bʋʋm. Soda-naab ning sẽn lʋɩ taoor tɩ b kʋ a Zeezi wã yeelame: “Hakɩɩka, rao-kãngã yaa Wẽnnaam Bi-ribla.” (Mark 15:39) A Zeezi sẽn da be a Pilat taoor tɩ b kaood a bʋʋdã, tõe tɩ raoã zĩnda be n wʋm b sẽn da baood n na n bãng a sã n sɩd yaa Wẽnnaam Biigã. Masã, a kɩsa sɩd t’a Zeezi yaa nin-tɩrga, la tɩ sɩd-sɩda, yaa Wẽnnaam Biiga.

Yel-soalmã sẽn maanã kẽesa neb kẽer rabeem, hal tɩ b rɩk sor n kuiisẽ la b “pĩisd b yãoodo,” tɩ wilgdẽ tɩ b sũy sãamame, la tɩ yãnd n tar-ba. (Luk 23:48) Pagb wʋsg sẽn da yaa a Zeezi karen-biisi, n da tũud-a n gilgdẽ ra naaga neb nins sẽn da yas yɩɩg n getẽ wã. Yel-soalem nins sẽn maanã kẽesa bãmb me rabeem wʋsgo.