E a moanna n airoo ni bwakantaain te Kanimabong n Nitian 14. E na moanaki te bongi n Taabati ni bungintaai n Nitian 15. E a kamani mate Iesu ma a teimatoa ni maiu kamwarua ake uoman ake i rarikina. N te Tua, ao a ‘aki riai n tiku i aon te kai ni karokoa ae ngaina’ rabwataia maate ma a riai ni kaiiaki “n te bong anne.”​—Te Tua-Kaua 21:22, 23.

Irarikin anne, e aranaki te Kanimabong bwa te bong ni Katauraoi, ibukina bwa aia kabanea n tai aomata ni katauraoi amwarake, ao ni katiai mwakuri riki tabeua ake a aki kona n tiku n uaa banen te bongi n Taabati. E na moanaki ni bungintaai te bongi n Taabati ae taboro ke e “kakannato.” (Ioa­ne 19:31) E riki aei ibukina bwa Nitian 15 boni moani bongin te Toa ae te Bwerena ae aki karikaki ae itibong bongina, ae moani bongina n taai nako bon te bongi n Taabati. (Nakoaia Ibonga 23:5, 6) N te tai aei ao te moani bong anne, e bwakara raoi kaitiuani bongin te wiki ae bon te bongi n Taabati.

Ngaia are a a tuanga Birato I-Iutaia bwa e na kataweaki maten Iesu ma kamwarua ake uoman ake i rarikina. N te aro raa? N otean rangaia. Ni karaoan anne, a aikoa kona iai n tabekirake rabwataia n rangaia ngkana a na ikeike. A roko tautia ao a otei rangaia kamwarua ake uoman. Ma e taraa ni kamani mate Iesu ngaia are a aikoa otei rangana. E a kakororaoaki n aei Taian Areru 34:20 ae kangai: “E kawakin riina ni kabane, ao akea teaina mai buakoia ae mwaoto.”

Ibukini kakoauaan are e a boni mate Iesu, e ewara rarikina te tautia temanna ao e teke rarikini buroona. “E a tiinako naba te raraa ao te ran.” (Ioane 19:34) E kakororaoaki naba iai te kibu aei. “A na taraa teuare a ewaria.”​—Tekaria 12:10.

E mena naba ikanne ngke e kamateaki Iesu, Ioteba ae te I-Arimataia ae “te mwaane ae kaubwai” ao kaain te Tanirim. (Mataio 27:57) E taekinaki teuaei bwa “te aomata ae raoiroi ma n eti” are e “kakantaningaa naba ana Tautaeka n Uea te Atua.” Bon “te tia rimwin Iesu teuaei ma e karabaa bwa e maakuia I-Iutaia,” ao e aki boutokaa ana moti te boowi ibukin Iesu. (Ruka 23:50; Mareko 15:43; Ioane 19:38) E ninikoria Ioteba ao e bubutiia Birato rabwatan Iesu. E wetea te tautia ae te mataniwi Birato bwa e na kakoauaa raoi bwa e boni mate Iesu. Imwina e a kariaia Birato ana bubutii Ioteba.

E kabooa Ioteba te rinen ae raoiroi ae itiaki ao e karuoa rabwatan Iesu man te kai, ao e nira rabwatana n te rinen ni katauraoia imwaini kaiiana. E buokaki teuaei ni katauraoi iroun Nikotemo ae “teuare moani kawara ngkoa Iesu n te bong.” (Ioane 19:39) Ma ngkai e a uotii baika boiarara aika te mura ae renganaki ma te aroe ae tao 33 te kirokuraem tinebuna. E a niraki rabwatan Iesu n ninira aika kaboiararaaki ni baikai bwa aio aroia I-Iutaia ni katauraoa aia mate imwaini kaiiana.

Iai ana ruanimate Ioteba ae boou ae te bwaa ae kaaraki are e a kaweneaki iai rabwatan Iesu. Ao e a karabinoaki te atibu ae bubura nako matan te ruanimate. E kawaekoaaki ni karaoaki aei imwaini moanakin te bongi n Taabati. A bae naba ni buoka katauraoan rabwatan Iesu Maria te I-Maketara ao Maria are tinan Iakobo are uarereke riki. A kawaekoaia ngkai n okira mwengaia “ni katauraoi baika boiarara ma bwaa aika boiarara” bwa a na kabira riki rabwatan Iesu imwin te bongi n Taabati.​—Ruka 23:56.

N te bong are imwina ae bon te bongi n Taabati, ao a a kawara Birato mataniwi n ibonga ao Baritaio ao a taku: “Ti uringnga bwa ngke e maiu te tia mwamwanaa te aba arei ao e taku, ‘Imwin tenibong ao N na manga kautaki.’ Mangaia are tuua bwa e na kamatoaaki raoi te ruanimate ni karokoa te katenua ni bong, bwa a na aki roko taan rimwina ni kimoaia ao ni kangai nakoia aomata, ‘E a kautaki mai buakoia maate!’ Ao e na korakora riki mwamwanaakin te aba iai nakon are rimoa. E taku Birato nakoia: ‘Kairiia tautia ao naako karaoa ami kabanea ni konaa ni kamatoaa.’”​—Mataio 27:63-65.

Ni karangainan te Taabati, a uotii boiarara nakon te ruanimate Maria te I-Maketara, Maria are tinan Iakobo, ao aine riki tabeman bwa a na kabira iai rabwatan Iesu. A taetae i marenaia ni kangai: “Antai ae e na karabinoa te atibu mani mataroan te ruanimate ibukira?” (Mareko 16:3) Ma e a tia n riki te mwaeiei. Irarikin anne e a tia ana anera te Atua ni karabinoaanako te atibu, a a nako tautia, ao e a taraa n akea kaain te ruanimate!