Hapwile haChitanu halikumbi lyaNyisane 14 namusana. Hakulauka chalikumbi, Sambata yaNyisane 15 yaputukile. Halwola kana, Yesu afwile, oloze vaze vihwanga vavali vapwile lika vavatonyi. Kweseka naJishimbi, mijimba yakufwa kayatelele ‘kusavala hachitondo ufuku wosenako,’ oloze vatelele kuyifunda “likumbi vene lize.”—Lushimbi lwamuchivali 21:22, 23.

Kaha nawa likumbi lyaChitanu namusana lyapwile Likumbi lyaKulongesa Vyuma, mwomwo vatu vawahishilenga kulya nakukumisa kala mulimo uze kavatelele kuzata hanyima yalikumbi lyaSambatako. Hakulauka chalikumbi, likumbi “lyalilemu” lyaSambata lyaputukile. (Yowano 19:31) Echi chapwile ngocho mwomwo likumbi lyaNyisane 15 lyapwile likumbi lyatete hamakumbi 7 aChiwanyino chaJimbolo Jakuzeneka Chimbalwila, likumbi kaneli lyapwilenga lyaSambata. (VyavaLevi 23:5, 6) Halwola kana, likumbi kaneli lyalitombwele nalikumbi lyaSambata yamuchalumingo, likumbi lyakusokesa 7.

Ngocho vaYuleya valombele Pilatu anguhwise kufwa chaYesu navaze vihwanga vavali vapapalilile naikiye hamwe. Mujila muka? Hakuvahokola mahinji avo. Ngocho nachivakaluhwila kuhwima nakuvalingisa vafwenga. Kaha maswalale vejile, vahokwele mahinji avaze vihwanga vavali. Oloze vawanyine Yesu nafu lyehi, ngocho kavamuhokwele mahinji enyiko. Echi chateselemo mukanda waSamu 34:20 uze wamba ngwawo: “Eji kulamanga vifuwa vyenyi vyosena. Kakweshi chifuwa numba chimwe vanahokolako.”

Hakusaka kutachikiza nge chikupu vene Yesu nafu, liswalale umwe amutuvile likunga kuluhachi nakukatuvasana kumuchima. Ngocho “hahaze vene kwalovokele  manyinga nameya.” (Yowano 19:34) Echi chateselemo chisoneka chikwavo chakwamba ngwavo: “Navakatala kuli uze vatuvile.”—Zekaliya 12:10.

Lunga umwe “muka-luheto,” Yosefwe wakunganda yaAlimateya, uze nawa apwile muzango yaSunendeline, naikiye kwapwile omu vajihile Yesu. (Mateu 27:57) Vamuvulukilenga ngwavo “lunga umwe wamwaza, wakwoloka,” uze “apwilenga nakuvandamina Wangana waKalunga.” Hakuwana nge “apwilenga kambaji kaYesu oloze kalisolwele hatoma hakwivwa woma vaYuleya,” kakundwijile vyuma valikashile vaka-zango omu vasopesele Yesuko. (Luka 23:50; Mako 15:43; Yowano 19:38) Yosefwe omikile nakulomba mujimba waYesu kuli Pilatu. Kaha Pilatu alwezele kapitau kamaswalale ayenga amone numba nge chikupu vene Yesu nafu. Ngocho Pilatu etavishile Yosefwe vyuma alombele.

Yosefwe alanjile lihina lyamwaza lyalinyu nakufumisa mujimba waYesu hachitondo. Avungilile uze mujimba haze halihina mangana vayenga nakuufunda. Nyikotemu, “uze hakavanga ejile kuli Yesu naufuku,” akafwile Yosefwe kuwahisa mujimba waYesu. (Yowano 19:39) Anehele mila yakufutula namalowe yize yalemene jipaundu 100 javaLoma (kafwe jikilongalamu 33). Mujimba waYesu vauvungililile kumwe namila kaneyi yakufutula namalowe, ngana muze mwayile chisemwa chavaYuleya chakufunda mutu.

Yosefwe afunjile mujimba waYesu muchimbumbe chenyi chakusendeveka chize kanda vazachisengaho lyehi, chize chapwile mulilolwa. Kaha ashindumwinyine lilolwa lyalinene kukanwa kachimbumbe. Vyumevi vavilingile washiwashi shimbu kanda likumbi lyaSambata liputuke. Atela Maliya wakuMangatala naMaliya naye yaYakova wakanyike kuvapwile hakuwahisa mujimba waYesu. Vakindulukile washi kwimbo “vakawahise vyuma vyalivumba lyamwaza namaji alivumba” mangana omu nayikakuma Sambata vakawahise mujimba waYesu.—Luka 23:56.

Lyacheleko, halikumbi lyaSambata, vapilishitu vavakulwane navaFwaliseu vayile kuli Pilatu nakwamba ngwavo: “Tunanuka vyuma ahanjikile uze muka-kuhungumwisa vatu omu apwile wamutonyi ngwenyi, ‘Omu namukahita makumbi atatu navakangusangula.’ Shikaho hana lushimbi mangana fuka yize vayikinge kanawa palanga nakulikumbi lyamuchitatu, kuchina tumbaji twenyi naveza nakumwiva nakulweza vatu ngwavo, ‘Vanamusangula lyehi kuvafu.’ Kaha makuli kana awa akukuminyina nawasweza chikuma kuhambakana akulivanga.” Pilatu avakumbulwile ngwenyi: “Mbatenu vaka-kulama. Yenunga mukakinge fuka kweseka nomu namuhashila.”—Mateu 27:63-65.

Kuheta lyaSondo nachimene Maliya wakuMangatala, naMaliya naye yaYakova, namapwevo veka vambachile vyuma vyalivumba lyamwaza nakuya kuchimbumbe mangana vakakwite mujimba waYesu. Omu vapwile nakuya mujila, valihanjikishile ngwavo: “Iyaze mwatushindumwina lilolwa kuchikolo chachimbumbe?” (Mako 16:3) Oloze kwejile mundenda waunene. Kangelo kaKalunga ejile nakufumisako lize lilolwa, vaze vaka-kulama kuchimbumbe vafumineko, kaha chimbumbe nawa chapwile chamupolongwa.