Pod en Tich Abich Nisan 14, to piny koro olewo. Bang’ podho chieng’, Sabato mar Nisan 15 biro chakore. Yesu to koro osetho. Kata kamano, jomecho man e bathe to pod ngima. Ka luwore gi Chik, ok onego ‘owe kitundugi e yath kanyo otieno duto.’ Kar mano, onego oyikgi “mana chieng’no.”​—Rapar mar Chik 21:22, 23.

E wi mano, Jo-Yahudi ne luongoga Tich Abich odiechieng’ ni Chieng’ Ikruok nikech ne giikoga chiemo kendo tieko tije mamoko ma ok nyal rit mondo otim bang’ Sabato. Sa podho-chieng’, sabato miluongo ni Sabato “maduong’” biro chakore. (Johana 19:31) Mano en nikech Nisan 15 biro bedo odiechieng’ mokwongo mar Sawo mar Makate Maonge Thowi ma kawoga odiechienge abiriyo. Kinde mang’eny, odiechieng’ mokwongo mar sawono bedoga Sabato. (Tim Jo-Lawi 23:5, 6) Wang’ni to odiechieng’ mokwongono odhi riat gi chieng’ Sabato ma jumano, ma en odiechieng’ mar abiriyo.

Omiyo, Jo-Yahudi nyiso Pilato ni otim gima nyalo miyo Yesu kod jomecho ariyo me bathe otho piyo. E yo mane? Kuom turo tiendegi. Mano biro miyo tiende joma ogurgo kik sir dendgi mondo gidhi nyime gi yueyo. Askeche biro to gituro tiende jomecho ariyogo. Kata kamano, nikech nenore ni Yesu to osetho, ok gitur tiendene. Mano chopo weche ma ne okor e Zaburi 34:20 ma wacho kama: “Orito chokene duto: Onge moro kuomgi motur, kata achiel.”

 Mondo ong’ere maler ni adier Yesu osetho, askar moro chwowo ng’etne gi tong’, kama chiegni gi adundone. Mano miyo ‘remo gi pi wuok kuome gie sano.’ (Johana 19:34) Mano bende chopo weche mamoko ma ne okor niya: “Mi giniteg wang’gi kuom en ma ne gichwowo.”​—Zekaria 12:10.

Kanyo bende nitiere “jamwandu moro” miluongo ni Josef ma Ja-Arimathea, ma en jakanyo mar Sanhedrin kendo humbe ber. (Mathayo 27:57) Ji ong’eye kaka “ng’at maber kendo makare,” ma “rito Pinyruodh Nyasaye.” Adier en ni en ‘japuonjre Yesu ma ling’ling’ nikech oluoro Jo-Yahudi.’ Mano e momiyo ne ok oriwo lwedo bura ma ne ong’ad ne Yesu. (Luka 23:50; Mariko 15:43; Johana 19:38) Josef choko chir kae to okwayo Pilato ringre Yesu. Pilato luongo jatend-askeche mochung’ ne nek Yesu mondo ong’e kabe Yesu osetho. Askarino dwoke ni kamano. Bang’ mano, Pilato miyo Josef ringre Yesu.

Josef dhi to ng’iewo law kitani maber kae to ogolo ringre Yesu e yath. Oboyo ringreno gi law kitani koike ne yik. Nikodemo “ma e ng’at ma ne yande osebiro [ir Yesu] gotieno,” konyo e iko ringre Yesu. (Johana 19:39) Okelo modhi mokikie poda mag manemane gi aloe ma nengogi tek ahinya. Modhigo dirom kilo 33 kama. Ringre Yesu onal gi lewni moketie modhigo ka luwore gi kaka Jo-Yahudi timoga.

Josefno niga gi liel mosekuny e lwanda man machiegni gi kanyo to liendno pok oyikgae ng’ato nyaka nene. Kanyo e kama iyikoe ringre Yesu. Kae to ing’ielo kidi maduong’ e dho liendno. Itimo mano mapiyo ka Sabato pok ochakore. Nyalo bedo ni Maria Magdalin kod Maria min Jakobo Matin bende osebedo ka konyo e iko ringre Yesu ne yik. Koro gireto ka gidok pacho “mondo giik yien kod modhi ma nigi suya mamit” mondo gilosgo ringre Yesu bang’ Sabato.​—Luka 23:56.

Kinyne ma en chieng’ Sabato, jodong-jodolo kod Jo-Farisai dhi ir Pilato kendo giwachone niya: “Waparo kaka jawuondno nowacho ka pod ongima ni, ‘Bang’ odiechienge adek ibiro chiera.’ Omiyo, gol chik mondo odhi orit liel nyaka e odiechieng’ mar adek, po nono jopuonjrene dibi mi gikwale kae to giwach ne oganda ni, ‘Osechiere oa kuom joma otho!’ Eka wuond ma achienno biro bedo marach moloyo mokwongo.” Pilato to wachonegi kama: “Unyalo keto jarit. Dhiuru urite kaka un uwegi ung’eyo.”​—Mathayo 27:63-65.

Jumapil gokinyi mang’ich, Maria Magdalin, Maria min Jakobo, kod mon mamoko obiro gi poda kod modhi ma nigi suya mondo gilosgo ringre Yesu. Gipenjre e kindgi kama: “Ng’ano ma biro ng’ielonwa kidi a e dho liel?” (Mariko 16:3) Kata kamano, yiengni mar piny oa timore. E wi mano, malaika mar Nyasaye oseng’ielo kidi a e dho liel, jorit ma ne ni kanyo koro onge, kendo nenore ni ringre Yesu onge e liel!