Nizã rasem 14 yɩɩ arzũm. Baraar wĩndgã lʋɩɩs poor la Nizã rasem 15 sẽn yaa vʋʋsg daarã sɩngda. A Zeezi ra zoe n kiime. La wagda a yiibã sẽn da yɛg-a wã yẽ ra ket n vɩɩme. Tõogã ra wilgame tɩ b sã n luul neda, b pa segd n “bas kũumã tɩɩgã zug yʋng ye.” B tog n mum-a-la “baraar bala.”—Tõodo 21:22, 23.

Bãng-y me tɩ b ra boonda arzũm daar tɩ seglg raare, bala baraare, nebã segenda vʋʋsg daarã rɩɩbo, la b maand tʋʋm nins fãa b sẽn pa tõe n bas n gũ tɩ vʋʋsg daarã loogã. La badaar arzũmã wĩndgã sã n wa kẽ, vʋʋsg ‘da-kãseng’ n na n sɩnge. (Zã 19:31) Bõe yĩnga? Bala Nizã rasem 15 wã yaa bur sẽn pa ning ra-bɩll kibsã pipi daare. Kibsã kaoosda rasem a yopoe. Ra-kãngã sẽn seg raar ning fãa, yaa vʋʋsg daare. (Maan-kʋʋre 23:5, 6) So-kãnga wã, ra-kãng sega rasem a yo-poe-poe vʋʋsg daarã.

Rẽ n so tɩ zʋɩf-rãmbã kos a Pilat t’a kɩt tɩ b tɩ kao a Zeezi ne wagda a yiibã karse, sẽn na yɩl tɩ b ki tao-tao. B sã n kao b karsã, b pa le tõe n vʋʋs sõma ye. Sodaasã tɩ kaoo wagda a yiibã karse. La sẽn mik t’a Zeezi ra zoe n kiime wã, b pa kao a karsã ye. Woto pidsa Yɩɩn-sõamyã 34:21 goamã. B yeela be woto: “Bãmb gũuda b nin-tɩrgã kõbr fãa, la a kõbr ba a yembr kõn kaoog ye.”

Sẽn na yɩl n bãng a Zeezi sã n sɩd kiime, sodaag n kõs a lʋgrã ne kãnde, n kolg a sũurã. La “tao-tao bala, koom ne zɩɩm n yi be.” (Zã 19:34) Rẽ me pidsa bãngr-gomde. B ra yeela woto: “Bãmb na n wẽnemd n gesa soab ning bãmb sẽn dag n kõsã.”—Zakari 12:10.

Rao a ye sẽn yit Arimate, n yaa “arzɛk soab” t’a yʋʋr boondẽ t’a Zozɛf n zĩnd a Zeezi kʋʋbẽ wã. Ra yaa Sanedrẽ wã ned a ye yʋʋr sẽn yi. (Matye 27:57) Biiblã yeelame t’a ra “yaa nin-sõngo la nin-tɩrga,” la t’a ra “gũuda Wẽnnaam soolem waoongo.” A ra “soos n yaa a Zeezi karen-biiga, a sẽn zoet Zʋɩf-rãmbã yĩngã.” Rẽ kɩtame t’a pa kẽes a toog a Zeezi bʋʋdã pʋgẽ ye. (Luk 23:50; Mark 15:43; Zã 19:38) A talla raoodo, n tɩ kos a Pilat a Zeezi kũumã. A Pilat reng n soka soda-naabã n na n bãng a Zeezi sã n sɩd kiime, t’a yet t’a kiime. Zĩig pʋgẽ bala, a saka a Zozɛf kosgã.

A Zozɛf raa peen-peels sẽn yaa sõma, la a sik a Zeezi kũumã ra-lukã zugu. A maneg n vila kũumã ne pɛɛlã n na n tɩ mumi. A Nikodɛm, “sẽn dag n wa-a a Zeezi nengẽ ne yʋngã me” wa n sõngame tɩ b maneg a Zeezi kũumã. (Zã 19:39) A talla miir ne alowɛs sẽn kalem taab n tar yũ-noogo, sẽn ta kɩlo pis-naas la a nu n wa. Wa zʋɩf-rãmbã sẽn minim n maandẽ wã, b maneg n vila a Zeezi kũumã ne pɛɛlã b sẽn sõog kaamã n na n tɩ mumi.

A Zozɛf ra tara yaoog sẽn pa zãr ne be. Yaa yaoog b sẽn tu tãng bokẽ. La b ra nan pa mum kũum be ye. Be la b ning a Zeezi. B rɩka kug-bedr n pag yaoogã. B maana tao-tao tɩ vʋʋsg daarã nan pa sɩng ye. Tõe t’a Maari Madelɛn ne a Zak-bil ma a Maari sõngame n maneg a Zeezi kũumã. Rẽ poore, b zoeeme n kuil n na n tɩ “to tɩdar zom la b maan tɩdar kaam,” sẽn na yɩl tɩ vʋʋsg daarã poor bɩ b wa maneg a Zeezi kũumã n paase.—Luk 23:56.

Vẽkembeoogã sẽn yɩ vʋʋsg daarã, maan-kʋʋdbã kãsem-dãmb ne Fariizẽ-rãmbã kẽnga a Pilat nengẽ n tɩ yeele: “Tõnd tẽrame tɩ bɛlgd-kãngã dag n yeela a sẽn wa n ket n vɩ wã wakat t’a na n vʋʋga dasem a tãabẽ daare. Dẽ wã, bɩ y kɩt tɩ b gũ yaoogã hal tɩ ta dasem a tãab daarã, t’a karen-biisã da wa n zuk a kũumã la b yeel nebã tɩ b vʋʋg n basa kũum ye. Yaoolem belg-kãng na n yɩɩ wẽng n yɩɩg pipi soabã.” A Pilat yeel-b lame yaa: “Yãmb tara gũudba. Bɩ y kẽng n tɩ gũ-a wa yãmb sẽn datã.”—Matye 27:63-65.

Hatã yibeoog pĩnda, a Maari Madelɛn ne a Zak ma a Maari la pagb a taab looga yaoogẽ wã ne kaam n na n tɩ maneg a Zeezi kũumã. B ra sokda taab n na n bãng ned ning sẽn na n lak yaoogã noor kugrã n kõ-ba. (Mark 16:3) Mik tẽn-digimdg n da yõd n maane. Sẽn paase, Wẽnnaam malɛk n wa n lak kugrã sẽn da be yaoogã noorã. Sẽn da gũud-b yaoogã zoeeme. Yaoog me yaa vɩʋʋgo.