Ngarngarem lay Biernes, Nisan 14. Kaselek na agew et onggapo lay Sabaton na Nisan 15. Inatey lay Jesus, balet mabilay ni may duaran matakew a kaabay to. Unong ed Ganggan, saray bangkay et ‘agnepeg a mansiansia ed poste a sanlabi,’ noagta iponpon “ed saman lanlamang ya agew.”​—Deuteronomio 21:22, 23.

Say ngarem na Biernes et tatawagen met a Panagparaan lapud ipaparaan na totoo iray panangan tan susumpalen day arum nin kimey da ya agla niyalagar kayari Sabaton. Kaselek na agew, onggapo so doble, odino “espisyal,” a Sabaton. (Juan 19:31) Nibagan ontan ta say Nisan 15 so unonan agew na pitoy agew a Piesta na Andi-lebaduran Tinapay, a say unonan agew na satan et naynay a Sabaton. (Levitico 23:5, 6) Natan, say unonan agew et pinmetek ed sinimban Sabaton, say komapiton agew.

Kanian kinerew na saray Judio ed si Pilato ya pateyen lan tampol si Jesus tan saray matakew ed abay to. Panon? Diad pamuter na saray bikking da. No ontan, agda la naawit so laman da kanian agla ra makaingas. Pinuter na saray sundalo so bikking na duaran matakew. Balet agda la pinuter iray bikking nen Jesus ta inatey la. Diad saya et asumpal so Salmo 34:20: “Proprotektaan Toy amin a pukel to; anggapoy anggan sakey ed saratan so aputer.”

Pian naseguro ya talagan inatey lay Jesus, dinuyok na sakey ed saray sundalo so diking to  diad panamegley na gayang, tan tinmalos itan ed puso to. Et “pinmaway a tampol so dala tan danum.” (Juan 19:34) Asumpal lamet so sananey nin kasulatan: “Onnengneng ira ed samay dinuyok da.”​—Zacarias 12:10.

Si Jose, a “sakey a mayaman a lakin taga Arimatea” tan gagalangen a membro na Sanhedrin, et wadman met sanen impasak si Jesus. (Mateo 27:57) Sikatoy tinukoy a “maong tan matunong a too,” a “manaalagar met ed Panarian na Dios.” Diad tua, sikatoy “sakey a disipulo nen Jesus, balet ta agto imbaga iya ed arum lapud takot tod saray Judio,” kanian agto sinuportaan so desisyon na korte ed si Jesus. (Lucas 23:50; Marcos 15:43; Juan 19:38) Nampakpel si Jose tan kinerew tod si Pilato so bangkay nen Jesus. Kayarin akompirma nen Pilato ed samay opisyal na armada ya inatey lay Jesus, inter toy kerew nen Jose.

Angaliw si Jose na malinis tan marakep a klase na linen tan inyepas tod poste so bangkay nen Jesus. Binalkot to na linen so bangkay pian iparaan parad ponpon. Si Nicodemo, “a linmad [si Jesus] ya aminsan diad labi,” et tinmulong met ed impangiparaan ed bangkay. (Juan 19:39) Angawit na manga 30 kilo a mabmablin impanlaok a mira tan aloe. Sarayan pampabalingit et inyan ed samay impanbalkot ed bangkay nen Jesus, unong ed niyugalin panagponpon na saray Judio.

Si Jose et walaan na agni nausar a lubok ya inungib ed bato, tan ditan imponpon so bangkay nen Jesus. Insan impatulin so sakey a baleg a bato ed puerta na lubok. Mapmaples da yan ginawa, antis ya onggapoy Sabaton. Si Maria Magdalena tan si Maria ya ina nen Santiago a Melag et nayarin tinmulong ed impangiparaan ed bangkay nen Jesus. Natan et nanapura iran sinmempet “pian mangiparaan na saray pampabalingit tan ambalingit a larak” ya iyan da lamet ed bangkay nen Jesus kayari na Sabaton.​—Lucas 23:56.

Diad sinmublay ya agew, diad Sabaton, saray manunan saserdote tan saray Fariseo et linmad si Pilato tan inkuan da: “Anonotan mi ya inkuan na saman ya impostor sanen mabilay ni, ‘Napaoli ak kayari taloy agew.’ Iganggan mo sirin a bantayan a maong so lubok anggad komatlon agew, pian agtakewen na saray disipulo to tan ibaga rad totoon, ‘Sikatoy apaoli manlapud inaatey!’ Insan magmaliw laingen a mas mauges iyan unor a panamalikdo nen samay inmuna.” Inkuan nen Pilato: “Paguardiaan yo sirin. La kayo tan bantayan yon maong.”​—Mateo 27:63-65.

Diad kabkabuasan na Simba, si Maria Magdalena, si Maria ya ina nen Santiago, tan saray arum nin bibii et inawit dad lubok iray pampabalingit ya iyan da ed bangkay nen Jesus. Imbaga rad sakey tan sakey: “Siopa kasi nayarin mangitulin ed baton akasara ed puerta na lubok?” (Marcos 16:3) Balet walay agawan yegyeg. Ontan met, intulin la na anghel na Dios imay bato, anggapo la ray guardia, tan anggapoy karga na lubok!