Nisan killapa sabado 15 punchawninqa viernes 14 punchawpa inti siqaykusqantam qallariq. Jesusqa wañukurqañam, waqtanpi kaq suwakunam ichaqa manaraq wañurqakuchu. Moisespa chaskisqan kamachikuyman hinaqa manam qirupi wañusqa ayaqa tukuy tutaqa saqisqachu kanan karqa, aswanqa chay punchawllam pampasqa kanan karqa (Deuteronomio 21:22, 23).

Viernes punchawqa alistakunanku punchawmi karqa, chay punchawmi paqarintinpaq mikuyta yanuqku hinaspa imatapas minchantinkama mana suyana kaqkunata ruwaqku. Chay kutipi sabadoqa “hatun punchawmi” karqa nisan killapa 15 punchawninpi tupasqanrayku (Juan 19:31). Chay punchawpim mana levadurayuq tanta nisqanku fiesta qallarirqa. Chay punchaw imay punchawpi tupaptinpas judiokunapaqqa sabado punchaw hinam karqa (Levitico 23:5-7). Chaymi 33 kaq watapi nisan killapa 15 punchawninpas sabado punchawpi tupasqanrayku chay punchawqa ‘hatun punchaw’ karqa.

Chayraykum Jesuswan waqtanpi kaq suwakunapas chaylla wañurunankuta munaspa judiokunaqa Pilatota nirqaku muqu tullunkuta pakiparunankupaq, chaynapi samatyayta manaña atispa chaylla wañurunankupaq. Chaymi suwakunapa tullunkuta pakiparurqaku, Jesuspatam ichaqa manaña pakirqakuchu wañukusqanñarayku. Chaywanmi cumplikurqa Salmo  34:20 nisqan, chaypim nirqa: “Diosmi tullunkunatapas waqaychanqa, manam huk tullullantapas pakinqakuchu”, nispa.

Jesuspa wañukusqanmanta mana iskayrayananpaqmi huknin soldado lanzawan waqtanta tuksirurqa, hinaptinmi chaylla pawarurqa yawarwan yaku (Juan 19:34). Chaywanmi cumplikurqa kayna willakuy: ‘Lanzawan tuksisqankutam qawanqaku’, niq (Zacarias 12:10).

Jesuspa wañukusqan lawpiqa ‘Arimatea llaqtayuq Josey apu runapas’ kachkarqam, payqa tukuy rikchaq autoridadkunamanta hukninmi karqa (Mateo 27:57). Payqa ‘Diospa munaychakuyninta suyaq’ ‘mana huchayuq allin runam’ karqa, ichaqa Jesuspa qatiqnin kasqantam mana riqsichikurqachu judiokunata manchakuspan. Chaywanpas manam Jesusta juzgaqkunamanqa sayapakurqachu (Lucas 23:50; Marcos 15:43; Juan 19:38). Ichaqa kallpata hapispanmi Pilatota mañakurqa Jesuspa ayanta quykunanpaq. Chaymi Pilatoqa capitanta qayachimurqa, hinaptinmi payqa willarqa Jesuspa wañukusqanmanta. Chaymi Pilatoqa Joseyta nirqa Jesuspa ayanta apananpaq.

Joseyqa Jesuspa ayanta qirumanta uraykachispanmi linomanta telawan pampakunanpaq wankuykurqa. Paytaqa ‘ñawpaqtaraq Jesusta tutallan watukuq’ Nicodemopas yanaparqam (Juan 19:39). Aparqam achka qullqipa chanin miskillaña asnaq mirra nisqatawan aloes nisqata yaqa 30 kilota. Chaywanmi Jesuspa ayanta llusiykuspanku wankururqaku, chaynatam judiokunaqa wañuqkunata pampaqku.

Chaymantam Joseyqa Jesuspa ayanta churaykurqa qaqapi uchkuchisqan mana pipapas pampakusqan sepulturapi, hinaspam punkuta hatun rumiwan tapachirqa. Tukuy chaytam utqayllamanña ruwarqa sabado punchaw manaraq qallarichkaptin. Yaqapaschá Maria Magdalenawan sullka kaq Santiagopa maman Mariapas tukuypi yanapakurqaku. Hinaspam wasinkuman chaylla kutirqaku “miski asnaq qurakunatawan aceitekunata alistanankupaq”, chaynapi sabado punchaw pasayta Jesusman hinanankupaq (Lucas 23:56).

Sabadotam riqsisqa sacerdotekunawan fariseokuna Pilatota nimurqaku: ‘Señor, yuyarirunikum kawsachkaspallaraq chay llulla runapa rimasqanta, nirqam: “Kimsa punchawmantam kawsarimusaq”, nispa. Chayraykuyá kamachiy kimsa punchawkama sepulturata alli-allinta cuidanankupaq, yanqañataq qatiqninkuna cuerponta suwaruspa ninmanku: “Wañusqanmantam kawsariramun”, nispa. Hinaptinmi chayqa ñawpaqmantapas aswan mana allinraq kanman’, nispa. Pilatoñataqmi nirqa: “Soldadokunatayá pusaychik sepulturata cuidamunankupaq”, nispa (Mateo 27:63-65).

Domingo achikyaytam Maria Magdalena, Santiagopa maman Maria hinaspa huk warmikunapas sepulturaman rirqaku miski asnaq qurakunawan Jesusman hinaq. Paykunam ninakuqku: ‘¿Piraq asuchipuwasun punkupi rumitaqa?’, nispa (Marcos 16:3). Ichaqa manaraq chayachkaptinkum Diospa angelnin rumita suchurachiptin allpa kuyururqa, soldadokunapas pasakurqaku hinaspa Jesuspa ayanpas manaña kasqachu.