Mayaca guiluxe 14 de nisán que, ne ra guiaaziʼ Gubidxa, zuzulú sábadu 15 de nisán. Maʼ guti Jesús, peru ca gubaanaʼ cá cueʼbe que caʼruʼ gáticaʼ. Ley que ná: «Cadi naquiiñeʼ guiaana xcuerpu gueʼtuʼ ca lu yaga guidubi gueelaʼ; dxi queca naquiiñeʼ gucaachiluʼ laabe» (Deuteronomio 21:22, 23).

Viernes nga dxi raca preparación, dxi que nga runi ca binni que guendaró para sti dxi que ne riguucaʼ listu guiráʼ ni chiguiquiiñecaʼ dxi sábadu, purtiʼ ora maʼ bizulú dxi riʼ maʼ qué zanda gúnicaʼ xiixa. Peru biaje riʼ guiaaziʼ si Gubidxa ne guzulú sábadu que, zácani ti «dxi roʼ» (Juan 19:31). 15 de nisán que nga primé dxi raca Saa stiʼ Pan sin Levadura. Ne gadxe dxi rindaa saa riʼ. Neca intiica si dxi guiaba ni, siempre ruuyacabe ni casi ti sábadu (Levítico 23:5-7). Peru lu iza 33, biaba 15 de nisán que ti sábadu, ngue runi rábicabe ni «dxi roʼ».

Ngue runi gunabaʼ ca judíu Pilato cuza ñee Jesús ne guiropaʼ gubaanaʼ que ti gáticaʼ nagueenda. Purtiʼ zaqué maʼ qué zanda guicaacabe bi. Para guluza ca soldadu que ñee ca gubaanaʼ que, peru qué nigúzacabe ñee Jesús purtiʼ zándaca maʼ guti. Zaqué nga guca cumplir profecía ni zeeda lu Salmo 34:20: «Laa cayapa dxita ládibe; nin tobi de laacani qué zache».

Para guʼyaʼ ca soldadu que pa dxandíʼ maʼ guti  Jesús, bicuí tobi de laacaʼ ti lanza cueʼ tíʼxhibe dede bilá nindá ni ladxidoʼbe. Oraqueca biree rini ne nisa (Juan 19:34). Zaqué guca cumplir profecía riʼ: «Zuuyadxícabe ni gurí ti lanza cueʼ tiʼxhiʼ» (Zacarías 12:10).

Ora bizaaca ca cosa riʼ, nuu José ti «hombre ricu» de guidxi Arimatea, lade Sanedrín (Mateo 27:57). Nácabe naca hombre riʼ «ti hombre nachaʼhuiʼ ne runi ni jneza» ne cabézabe Reinu stiʼ Dios ne laaca nácabe «ti discípulo stiʼ Jesús, peru nagaʼchiʼ purtiʼ ridxibi ca judíu». Ne laaca «qué ñuube de acuerdu né plan biʼniʼ Tribunal que contra Jesús» (Lucas 23:50; Marcos 15:43; Juan 19:38). Peru biaje riʼ, né stale valor guyebe ne gunábabe Pilato cuerpu stiʼ Jesús. Ngue runi biseendacaa Pilato oficial stiʼ ejércitu que para gabi laabe pa maʼ guti Jesús. De raqué bidii Pilato permisu José chiné cuerpu stiʼ Jesús.

Gundeteʼ José cuerpu stiʼ Jesús ne bichenda ni ti lari de lino chaʼhuiʼ ni guziʼ. Zaqué nga cayuni prepararbe cuerpu stiʼ Jesús para entierru stiʼ. Laaca gucané Nicodemo laabe, «xa hombre guyé ra nuu Jesús ti huaxhinni» (Juan 19:39). Né Nicodemo biaʼ 33 kilu mirra nuchaʼ áloe. Ne bíʼnicabe según costumbre napa ca judíu ora chigucaachicaʼ ti gueʼtuʼ, bichéndacabe cuerpu stiʼ Jesús ti lari ne guluucabe ni guixi rindáʼ naxhi.

Cumu napa José ti baʼ nacubi, ni gulaa lu guié la? raqué gudíxhecabe cuerpu stiʼ Jesús ne biseegube ti guié ngola ruaa baʼ que. Nabé nagueenda bíʼnicabe guiráʼ ngue ante guzulú sábadu que. Zándaca né María Magdalena ne María jñaa Santiago ni Nahuiiniʼ nga gucané para biʼniʼ preparárcabe cuerpu stiʼ Jesús para entierru. Ziguxooñeʼ ca gunaa riʼ «para guni preparárcabe guixi rindáʼ naxhi ne aceite rindáʼ naxhi» para cuʼcaʼ cuerpu stiʼ Jesús tidiʼ si sábadu que (Lucas 23:56).

Sti dxi que, sábadu, guyé ca sacerdote principal ne ca fariseu que ra nuu Pilato ne gúdxicaʼ laabe: «Rietenaláʼdxidu guníʼ hombre rusiguii que dxi nabani: “Ziasaʼ lu guionna gubidxa”. Nga runi, biseendaʼ tu chigapa baʼ que dede ra guizaa chonna gubidxa, ti cadi gueeda ca discípulo stibe cuánacaʼ laabe ne gábicaʼ binni guidxi: “¡Maʼ biásabe lade gueʼtuʼ!”. Ne jmaruʼ si zusiguiicaʼ biaje riʼ que primé que». Para ná Pilato rabi laaca: «Laguicaa ti grupu de soldadu; laché ne lagapa dxiichiʼ ni» (Mateo 27:63-65).

Domingu, siadóʼ guieʼruʼ, guyé María Magdalena, María jñaa Santiago ne xcaadxi gunaa ra baʼ stiʼ Jesús zinduucaʼ guixi rindáʼ naxhi cuerpu stiʼ Jesús. Ne nacaʼ: «¿Tu gacané laanu guiree guié ni nutaaguʼ ruaa baʼ ca pue?» (Marcos 16:3). Peru guca ti xu. Ne laaca beeda ti ángel stiʼ Dios bituubaʼ guié que, maʼ qué guinni ca soldadu cayapa baʼ que ne maʼ guirutiʼ nuu ndaaniʼ baʼ que.