Aval mbia jam ete na éyoñe binga ba ke vôm soñ é ne, ba ke koone na é yoo! Nde Marie Madeleine a ji’a ke na a ke kate de “Simon Pierre a ñyé’é mbo’o Yésus a nga nye’e,” nnye ate ba loene na Jean. (Jean 20:2) Binga ba yen ange a to fefele soñ. Ange mfe a ne soñ été wôé a be’e “éfumulu ngômesan.”​—Marc 16:5.

Nde ange wua a jô be na: “Te koone woñ, ma yem fo’o na mia jeñe Yésus nyô be nga tyelé [élé] yôp. A nji bo va, a wômôya fo’o ane a nga jô, Zakan a yenane vôm a nga bôô. Kelan avô a katane beyé’é bé na a wômôya miñwuan a mi lôô a keya mia ôsu e Galilée.” (Matthieu 28:5-7, Mfefé Nkôñelan) Binga bete ba mate a ke kate beyé’é foé éte “njalan a woñ, mbunda’an a abui mevak.”​—Marc 16:8.

Éyoñe ji, Marie a yene Pierre ba Jean. A jô be a abu’u ése na: “Be vaaya Nti e soñ, a bi nji yem e vôme be keya nye.” (Jean 20:2, Mfefé Nkôñelan) Été été, Pierre ba Jean ba té mimbil. Jean nnye a ne môt ôsu a taté kui soñ amu a mate avôl. Éyoñ a kuiya, a wua ve mis été wôé a yene bibab biyé bi bôô, ve teke nyiin.

Éyoñe Pierre a kui, a nyiine soñ été. A yene bibab biyé bi bôô a ndombo be nga vule Yésus e nlô. Jean fe a nyiine mvuse ya valé, ane a buni mejô Marie a nga kate be. Akusa bo jam Yésus a nga kate be ôsu, be nji kui na be yemelane na Yésus a wômôya fo’o. (Matthieu 16:21) Fe’e é ne be njañan a jam ete; nde ba bulane nda. Ve Marie nye a te beta so vôme soñ é né, nye a li’i fo’o valé.

Nté ôse wu, binga ba te ke na, ba ke kate beyé’é foé na Yésus a wômôya, be ngenane zen. Yésus émien a tôbane be a jô be na: “Mbôlane wôé!” Bese ba ku fo’o a kute nye meboñ si.  Yésus a ve be ngule nyul a jô’ô na: “Te koone woñ; kela katane bobenyañe bam na be ke Galilée, nne ba ye yene ma wôé.”​—Matthieu 28:9, 10, Mfefé Nkôñelan.

Mvus, éyoñe si é nga fô’ôsan a na beange be nga yené, bezimbi be mbe be ba’ale soñ “be nga fô’ôban amu woñ, a bo ane mimbim.” Éyoñe be nga beta mane mine metyi, be nga nyiin étison, a be nga “kate bemie beprêtre mam mese me nga boban.” Éyoñe be maneya laan a bivete Bejuif, bemie beprêtre be nga tyi’i na ba zu ya’ane bezimbi bete asu na be solé jam ete a viane jô na: “Beyé’é bé be ate zu wupe nye alu, bi to ôyo.”​—Matthieu 28:4, 11, 13.

Nya ajôô a to ke na, nge mone bezimbi ya Rome a ve’ele ke ôyo éyoñ a bo ésaé mba’ale be ne wôé nye asu jam ete. Ajô te bemie beprêtre ba bo be ngaka’a nyi be jô’ô na: “Nge ngovina a wô’ô jame te, bia ye bo nye na a yebe njôane te a mia mia ye bo te tyelé minleme yôp.” (Matthieu 28:14, Mfefé Nkôñelan) Nde bezimbi bete ba nyoñe moné a bo fe aval bemie beprêtre ba yi. Nde ñhe, minsose ya na be nga wup mbime Yésus mia mane yametane Bejuif bese.

Marie Madeleine a ngenan a yône vôme soñ é ne. Éyoñ a nyiine soñ été, a yene beange be be’e bifumulu mengômesan! Wua a too vôme nlô Yésus ô mbe ô bôô, nyi mbo’o ki mfa’a ya mebo. Nde ba sili nye na: “A minga, wo yône jé?” Marie a yalan a jô’ô na: “Amu be zuya vaa Nti wom, a me nji yem vôm be keya bôé nye.” Éyoñ a fombô mvus, Marie a yene môte mfe. Nye’ fe a beta sili nye nsili beange, a jô’ô na: “A minga wo jeñe za?” Mbôl a simesane na a ne mba’ale afup, ajô te a sili nye na: “A monti, nge wo wo te to’é nye, kate ma vôm wo te ke bôé nye, mamien ma ye ke be’e nye.”​—Jean 20:13-15, Mfefé Nkôñelan.

Môt émien Marie a kobô a nye a ne Yésus, nnye ate a wômôya, ve a nji ji’a kui na a yeme nye. Ve éyoñ a tot éyolé jé, “Marie,” a yemelane na a ne Yésus a tyiñe nkobô jé. Nde Marie a jô a meva’a mese na: “A Rabbouni (e ne na, A Ñye’ele!)” Mbôl a ko woñ a buni’i na a mbeme ke yôp nde a bi nye. Ve Yésus a jô nye na: “Te nambe ma: amu me ngenan te ke be Tate a ne yôp. Kele’ be bobejañe bam, a jô be na, me ake be Ésa wom a Éso wônan, a Zambe wom a Zambe wônan.”​—Jean 20:16, 17.

Marie a mate a ke vôm minlôman a beyé’é bevo’o be ne a jô be na: “Me yeneya Tate!” Nkañete wé wo tu’a beta zu yemete wu binga bevok. (Jean 20:18) Ve da, mame ba jô ba yene me ve “ane ma me ne momo.”​—Luc 24:11.