Musow kabakoyara kosɔbɛ k’a ye ko kaburu lakolon lo! Magadala Mariyamu, ale bolila ka taga “Simɔn Piyɛri ni kalanden dɔ nin fɛ, min koo tun ka di Yezu ye.” O kalanden ye ciden Zan lo ye (Zan 20:2). Nka muso tɔɔ minw be kaburuda la, olu ye mɛlɛkɛ dɔ ye. Mɛlɛkɛ wɛrɛ be yen kaburu kɔnɔ ni “foroca gwɛman ye a kaan na.”—Mariki 16:5.

Mɛlɛkɛ fila nunu dɔ y’a fɔ u ye ko: “Aw kana siran, bari ne y’a lɔn ko aw be Yezu le yɔrɔ ɲinina, u tun ye min gwengwen lɔgɔ kan. A te yan tugu, bari a kununna i n’a fɔ a tun y’a fɔ cogo min na. Aw ye na a layɔrɔ filɛ. Aw ye teliya ka taga fɔ a ka kalandenw ye ko a kununna, a ko a be taga aw ɲa Galile mara la.” (Matiyo 28:5-7). O kama, u “sirannin n’u nisɔndiyanin” bolila ka taga o kibaru fɔ Yezu ka kalandenw ye.—Matiyo 28:8.

Mariyamu ye Piyɛri ni Zan ye tuma min na, a sɛgɛnninba lo. A y’a fɔ u ye ko: “U ye Matigi suu bɔ kaburu kɔnɔ, an m’a bilayɔrɔ lɔn.” (Zan 20:2). Piyɛri ni Zan ye boli daminɛ. Zan seen teliyara ka tɛmɛ Piyɛri ta kan, a kɔnna ka se kaburuda la. A ye filɛri kɛ kaburu kɔnɔ ka lenfu faniw bilanin ye, nka a ma don.

Piyɛri sera dɔrɔn, a sinna ka don kaburu kɔnɔ. U tun ye lenfu fani ani fani wɛrɛ min kɛ ka Yezu kuun meleke, Piyɛri y’u ye. O kɔ, Zan donna. O tuma na le a lara Mariyamu ka kumaw na. Hali k’a sɔrɔ Yezu tun kɔnna k’a fɔ u ye ko ale bena lakunu, u si m’a faamu ko Yezu kununa ka bɔ suuw cɛma (Matiyo 16:21). U kabakoyaninba kɔsegira soo. Nka, Mariyamu segira ka na kaburuda la ani a tora yen.

O wagati kelen na, muso tɔɔw tun be tagara a fɔ kalandenw ye ko Yezu suu kununa. U tagatɔ,  Yezu y’u kunbɛn ani a y’a fɔ u ye ko: “Aw dansɛ.” U y’u kunbiri gwan a kɔrɔ ka bonya la a kan. O kɔ, Yezu y’a fɔ ko: “Aw kana siran, aw ye taga fɔ n balimaw ye k’u ka taga Galile, k’u bena n ye o yɔrɔ le la.”—Matiyo 28:9, 10.

Dugukoloyɛrɛyɛrɛ tun kɛra tuma min na ani mɛlɛkɛw y’u yɛrɛ yira, sɔrɔdasi minw tun be kaburuda la, olu “yɛrɛyɛrɛla ka kirin.” U kununin kɔ, u donna dugu kɔnɔ “k’o koow bɛɛ lakali sarakalasebagaw ye.” Sarakalasebagaw ye ɲɔgɔnye kɛ ni Yahutuw ka cɛkɔrɔbaw ye. U y’a latigɛ ka wari di sɔrɔdasiw ma walisa u kana tiɲɛn fɔ. U ko sɔrɔdasiw k’a fɔ ko: ‘K’an to sinɔgɔ la sufɛ, a ka kalandenw nan’a suu bɔ ka taga n’a ye.’—Matiyo 28:4, 11, 13.

Ɔrɔmu sɔrɔdasi min tun be sinɔgɔ k’a to kɔrɔsili baara la, o tigi tun ka kan ka faga le. O kama, sarakalasebagaw y’u daa di ko: “O koo mana se masacɛ ka lasigiden ma tuma min na, an bena koo bɛɛ kɛ k’a dusu suma, waasa a kana kojugu kɛ aw la.” (Matiyo 28:14). Sɔrɔdasiw y’o wari minɛ ani sarakalasebagaw ko u ka min kɛ, u y’o kɛ. O cogo la, o ngalon kuma sera yɔrɔ bɛɛ la Yahutuw cɛma ko Yezu ka kalandenw ye Yezu suu soɲɛ.

Magadala Mariyamu, ale bele be kasira kaburuda la. A birila ko a be filɛri kɛ kaburu kɔnɔ ani a ye mɛlɛkɛ fila ye fani gwɛman b’u kaan na! U siginin be Yezu suu layɔrɔ la: kelen b’a kuun layɔrɔ la, kelen b’a seen layɔrɔ la. U ye Mariyamu ɲininga ko: “Muso, mun na i be kasira?” A ko: “Dɔw ye ne Matigi suu ta ka bɔ a layɔrɔ la, ne m’a lɔn u y’a bila yɔrɔ min na.” Mariyamu ko a be yɛlɛma, a ye mɔgɔ wɛrɛ ye. O tigi fana y’o ɲiningali kelen kɛ a ye ani k’a fɔ ko: “I be jɔn le yɔrɔ ɲinina?” Mariyamu tun b’a miiri ko nankɔ kɔrɔsibaga lo. O kama, a y’a fɔ a ye ko: “Baba, ni ele lo y’a ta, e k’a bilayɔrɔ fɔ n ye n be taga ta.”—Zan 20:13-15.

Tiɲɛn na, Yezu min kununa ka bɔ suuw cɛma, Mariyamu tun be kumana n’ale lo ye. A ma sin ka Yezu lɔn. Nka, tuma min na Yezu y’a weele ko “Mariyamu!” a y’a lɔn a kumacogo fɛ ko Yezu lo. Mariyamu kulera ninsɔndiya fɛ ko: “Arabuni,” (o kɔrɔ ko “Karamɔgɔ”). A siranna ko Yezu be yɛlɛla sankolo la le. O kama, a nɔrɔla a la. Yezu y’a fɔ a ye ko: “Ne bila fɔlɔ, katuguni ne ma yɛlɛn ka taa ne Fa yɔrɔ fɔlɔ. Nka taa ne balimaw yɔrɔ k’a fɔ u ye ko ne bɛ yɛlɛn ka taa ne Fa ni aw Fa fɛ, ka taa ne ka Ala ni aw ka Ala fɛ.”—Zan 20:16, 17, ABM.

Yezu ka cidenw ni kalanden tɔɔw lajɛnnin be yɔrɔ min na, Mariyamu bolila ka taga yen k’a fɔ u ye “ko ale ye Matigi ye.” A ka seereya b’a yira ko muso tɔɔw ye min fɔ, tiɲɛn lo (Zan 20:18). Nka, kalandenw tun b’u ka kuma jati “nalomanyakuma ye.”—Luka 24:11.