Lebuh bala indu datai ba kubur Jesus, sida tekenyit meda kubur nya kusung! Nya alai, Maria Magdalin belanda mansang ngagai “Simon Peter enggau ngagai siku murid ke dikesayauka Jesus,” iya nya rasul John. (John 20:2) Tang, bala indu ke bukai meda siku melikat ba kubur nya. Lalu dalam kubur nya, bisi siku da agi melikat ke “ngena baju jubah burak.”—Mark 16:5.

Siku ari melikat nya madah ngagai sida: “Anang takut. Aku nemu kita ngiga Jesus, ke udah diukum bunuh ba tiang. Iya nadai ditu laban iya udah diidupka baru ari mati, munyi ti udah dipadahka iya. Datai kitu, lalu peda endur bangkai iya diengkahka. Udah nya, jampat kita mupuk lalu padah ngagai bala murid iya, iya udah diidupka baru ari mati. Diatu, iya benung mansang ngagai Galili dulu ari kita.” (Matthew 28:5-7) Bala indu nya “balat alit ati sereta balat takut,” lalu sida rari madahka utai tu ngagai bala murid.—Mark 16:8.

Udah nya, Maria betemu enggau Peter seduai John. Ku Maria madah: “Sida udah mansutka Tuan ari kubur, lalu kami enda nemu dini endur sida udah ngengkahka iya.” (John 20:2) Peter enggau John lalu mupuk ngagai kubur. Seduai iya sama belanda kin, tang John belanda laju agi ari Peter lalu dulu agi datai ba kubur. Iya nilik dalam kubur lalu meda kain linin ba dia, tang iya enda tama ke dalam kubur nya.

Lebuh Peter datai, iya terus tama ke dalam kubur nya. Iya meda kain linin enggau kain ke dikena malut pala Jesus. John mega tama, lalu iya pechaya utai ke dipadahka Maria. Taja pan Jesus kala madahka pekara tu, tang sida agi enda mereti iya udah diangkatka idup baru. (Matthew 16:21) Sida tusut runding, lalu pulai ke rumah. Tang Maria mengkang ba kubur nya.

Ba maya ti sama, bala indu ke bukai deka madah ngagai bala murid pasal Jesus ke udah  diangkatka idup baru. Ba rantau jalai, Jesus betemu enggau bala indu nya lalu meri jaku tabi! Sida lalu megai kaki iya sereta “besugang ba mua iya.” Udah nya Jesus madah: “Anang takut! Mupuk lalu padahka utai tu ngagai bala menyadi aku. Asuh sida mupuk ngagai Galili, lalu sida deka betemu enggau aku ba din.”—Matthew 28:9, 10.

Sebedau tu, lebuh tanah berenyang nyadi lalu bala melikat datai, bala soldadu ke nyaga kubur nya “nyau getar-getar, lalu nyadi baka orang ke mati.” Udah nya, bala soldadu nya ngagai nengeri lalu “madah ngagai bala tuai imam pasal semua utai ti udah nyadi.” Pengudah nya, bala tuai imam baum enggau bala tuai bansa orang Judah. Sida meri mayuh duit pirak ngagai bala soldadu nya, ngambika ulih ngelalaika pekara nya. Sida ngasuh bala soldadu madah munyi tu: “Maya kami tinduk malam hari, bala murid iya datai lalu ngenchuri bangkai iya.”—Matthew 28:4, 11, 13.

Kebendar iya, bala soldadu ulih diukum bunuh enti sida tinduk maya gawa. Nya alai, bala imam besemaya ngagai sida: “Enti gabenor ninga pasal pekara tu [pemula pasal sida ke tinduk] kita enda ibuh irau. Kami deka nerangka pekara tu ngagai iya.” (Matthew 28:14) Bala soldadu ngambi duit pirak nya lalu ngereja utai ke diasuh bala imam. Nya alai, cherita bula pasal bangkai Jesus ke dichuri udah ditusui ngagai orang Judah ba mayuh endur.

Maria Magdalin agi nyabak ba kubur Jesus. Iya nilik ke dalam, lalu meda dua iku melikat ke ngena gari burak! Sida duduk ba endur bangkai Jesus ke diengkahka sebedau tu. Siku ba senentang pala lalu siku da agi ba senentang kaki. Sida nanya: “Nama kebuah nuan nyabak?” Disaut Maria: “Bisi orang udah ngambi bangkai Tuan aku, lalu aku enda nemu dini endur sida udah ngengkahka iya.” Udah nya, iya nguing lalu meda siku da agi lelaki. Ku lelaki nya nanya Maria: “Sapa digiga nuan?” Tang Maria ngumbai iya tukang kebun. Ku iya: “Tuan, enti nuan udah ngambi bangkai iya, padahka ngagai aku endur bangkai iya diengkahka ngambika aku ulih ngambi iya.”—John 20:13-15.

Kebendar iya, Maria benung bejaku enggau Jesus ke baru udah diangkatka idup baru. Tang maya nya, iya enda ngelala Jesus. Taja pia, lebuh iya ngangau: “Maria!” nya baru iya nemu iya Jesus, laban nya meh chara Jesus bejaku enggau iya. Enggau gaga ati, Maria ngangau: “Rabboni!” (reti nya “Pengajar!”), tang iya takut Jesus deka niki ke serega maya nya. Nya alai, iya megai Jesus. Taja pia, Jesus madahka iya: “Anang megai aku, laban aku bedau agi mupuk ngagai Apai. Mupuk meh ngagai bala menyadi aku lalu padah ngagai sida, ‘Aku deka mupuk ngagai Apai aku ke mega Apai kita, ngagai Petara aku ke mega Petara kita.’”—John 20:16, 17.

Udah nya, Maria belanda ngagai endur bala rasul enggau bala murid ke bukai begelumu. Maria madahka sida: “Aku udah meda Tuan!” Maya nya, sida mega udah ninga pasal pekara tu ari bala indu ke bukai. (John 20:18) Tang, sida “ngumbai jaku sida ke indu nya cherita ngapa.”—Luke 24:11.