Basali bakomokile hahulu kufumana kuli libita liinzi mukungulu! Maria Magdalena umatela ku “Simoni Pitrosi ni ku mulutiwa yomuñwi, yanaalatwa ki Jesu,” yena muapositola Joani. (Joani 20:2) Kono basali babañwi babali kwa libita babona lingeloi. Mi mwahalaa libita la kupulo kunani lingeloi leliñwi ‘leliapezi siapalo sesisweu sesitelele.’—Mareka 16:5.

Leliñwi la mangeloi ao, libabulelela kuli: “Musike mwasaba, kakuli naziba kuli mubata Jesu yanaabulaezwi fa kota. Haayo mo, kakuli uzusizwe kwa bafu, sina mwanaabulelezi. Hamutahe, muto bona sibaka mwanaalobezi. Cwale hamuye kapili muyo bulelela balutiwa bahae kuli uzusizwe kwa bafu, mi hamubone! Uitangetile ku mina kuya kwa Galilea.” (Mateu 28:5-7) Ka mukwa ocwalo, basali ba ‘bangangama mi basaba maswe,’ mi bamatela kwa balutiwa kuyo babihela taba yeo.—Mareka 16:8.

Cwale Maria ufumana Pitrosi ni Joani. Ubabihela taba yeo inze abuyana, uli: “Bazwisize Mulena mwa libita, mi haluzibi koba mubeile.” (Joani 20:2) Pitrosi ni Joani bamatela kwateñi. Joani umata ka lubilo lolutuna hahulu mi uyo fita pili kwa libita. Unangela mwa libita inze ayemi fande mi ubona masila.

Pitrosi yena hafita, ukena mwa libita. Ubona masila a line ni lisila lene litatilwe kwa toho ya Jesu. Joani ni yena cwale wakena mwa libita mi ukolwa taba yabulezi Maria. Kusina taba ni zanaa babulelezi Jesu, kaufelaa bona habautwisisi kuli uzusizwe kwa bafu. (Mateu 16:21) Baya kwa ndu inze bakomokile maswe. Kono Maria yatile kwa libita hape, hakuteli kwa ndu.

 Ka nako ye, basali babañwi baya kuyo taluseza balutiwa kuli Jesu uzusizwe kwa bafu. Habanze bamata kuli bayo biha taba yeo, Jesu ukopana ni bona mi wabalumelisa, uli: “Mulumele!” Bawela kwa mahutu ahae, ni “kumukubamela.” Cwale Jesu ubabulelela kuli: “Musike mwasaba! Hamuye, muyo zibisa banyani baka ilikuli baye kwa Galilea, mi ki kona kobaka yo nibona.”—Mateu 28:9, 10.

Kwamulahonyana, hane kubile ni zikinyeho ni mangeloi hanaabonahezi, masole bane bali kwa libita “bangangama mi bafetuha sina batu babashwile.” Hase bakutezwi ki maata, bakena mwa muleneñi mi “bayo bihela baprisita babahulu lika kaufela zeneezahezi.” Cwale baprisita baikambota ni baana-bahulu ba Majuda. Bautwana kuli baleke kweta masole ilikuli bapate taba ka kupuma kuli: “Balutiwa bahae nebatile busihu kuto muuzwa luna hane lulobezi.”—Mateu 28:4, 11, 13.

Masole ba Roma baakona kubulaiwa haiba balobala fa musebezi, ka mukwa ocwalo, baprisita babasepisa kuli: “Haiba mubusisi autwa taba yeo, [ya kupuma kuli nebalobezi] luna lukaambola ni yena mi hamuna kutokwa kubilaela.” (Mateu 28:14) Masole baamuhela kweta yeo mi baeza zebabulelezwi ki baprisita. Ka mukwa ocwalo, taba ya buhata ya kuli situpu sa Jesu siuzwizwe yahasana mwahalaa Majuda.

Maria Magdalena usalila fa libita. Hanangela mwa libita, ubona mangeloi amabeli aapezi zesweu! Leliñwi liinzi kone kuisizwe toho ya Jesu mi leliñwi lona liinzi kone kuinzi mahutu. Mangeloi ao amubuza kuli: “Musali, ulilañi?” Maria ualaba kuli: “Baangile Mulenaaka, mi hanizibi koba mubeile.” Maria hafetuha, ubona mutu yomuñwi hape. Mutu yo ukutela kubuza puzo yebuzizwe ki mangeloi, mi ubuza puzo yeñwi, uli: “Ubata mañi?” Kakuhupula kuli mutu yo ki mulimi wa mwa simu, Maria umubulelela kuli: “Muñaaka, haiba ki wena yamuungile, nibulelele kou mubeile, mi nika muunga.”—Joani 20:13-15.

Maria uambola ni Jesu yazusizwe kwa bafu, kono ka nako ye, haalemuhi kuli ki yena. Kono hamubiza kuli, “Maria!” ulemuha kuli kanti ki Jesu, kakuli uzibile mwaambolelanga ni yena. Maria wakalumuka uli: “Rabboni!” (yetalusa, “Muluti!”). Kono kabakala kusaba kuli atuha akambamela kwa lihalimu, wamukumalela. Kabakaleo, Jesu umubulelela kuli: “Tuhela kunikumalela, kakuli hanisika kambamela kale ku Ndate. Kono uye kwa banyani baka mi uyo babulelela kuli: ‘Nikambamela ku Ndate yena Ndataa mina ni ku Mulimu waka yena Mulimu wamina.’”—Joani 20:16, 17.

Maria umatela kwa sibaka kobakubukani baapositola ni balutiwa. Ubabulelela kuli: “Niboni Mulena!” ili kuekeza kwa bupaki bobautwile kale kwa basali babañwi. (Joani 20:18) Kono lipiho zeo ‘liutwahala kuba zesina tuso ku bona.’—Luka 24:11.