Omu mapwevo vakawanyine muchimbumbe mwamupolongwa, valikomokelele. Maliya wakuMangatala alahile nakuya kuli “Shimona Petulu nakuli kambaji mukwavo uze vazangilenga kuli Yesu,” kaposetolo Yowano. (Yowano 20:2) Oloze mapwevo veka vaze vasalile kuchimbumbe vamwene kangelo. Mukachi kachimbumbe mwapwile kangelo mukwavo, uze avwalile “chikuto chitoma.”—Mako 16:5.

Kangelo umwe alwezele vaze mapwevo ngwenyi: “Kanda namwivwa womako. Ngunatachikiza ngwami muli nakutonda Yesu uze vasukikanga hachitondo. Kuno wauchiko, mwomwo vanamusangula lyehi nge muze ambile. Twayenu mutale muchihela asavalanga. Yenunga washiwashi mukalweze tumbaji twenyi ngwenu vanamusangula lyehi kuvafu, kaha ikiye natetekela lyehi kuNgalileya.” (Mateu 28:5-7) Ngocho vaze mapwevo “vachikimine nakulikomokela chikuma,” kaha vayile nakulweza tumbaji twenyi.—Mako 16:8.

Halwola kanelu, Maliya awanyine Petulu naYowano. Avalwezele oku ali nakuhwimasana ngwenyi: “Mwata vanamufumisamo muchimbumbe, kaha katwatachikijile okwo vanamusavalikako.” (Yowano 20:2) Petulu naYowano valahilile kuchimbumbe. Yowano alahile chikuma, kaha alivangile kuheta kuchimbumbe. Anonokelemo, kaha amwene mahina aze vamujingile, oloze kengililemoko.

Omu Petulu ahetele, engilile muchimbumbe. Amwene mahina alinyu nalihina lize vajingile Yesu kumutwe. NaYowano jino engililemo, kaha etavilile mazu ahanjikile Maliya. Chamokomoko navyuma ahanjikile Yesu hakavanga, naumwe wauchi atachikijile ngwenyi Yesu vanamusangula. (Mateu 16:21) Vakindulukile kwimbo oku vanalikomokela. Oloze Maliya asalile kuze kuchimbumbe.

Oloze vaze mapwevo vakwavo vayile nakulweza tumbaji ngwavo Yesu vanamusangula. Omu vapwile nakuya jimbushi, Yesu avawanyine nakwamba ngwenyi:  “Mwoyo wenu!” Vafukamine kumahinji enyi, kaha “valifukwile kuli ikiye.” Jino Yesu avalwezele ngwenyi: “Kanda namwivwa womako! Yenu mukalweze vandumbwami vayenga kuNgalileya, kukiko navakangumwena.”—Mateu 28:9, 10.

Hakavanga omu kwejile mundenda, vangelo vasolokele, kaha maswalale vaze vapwile kuchimbumbe “vandendele nakufwa zazauta.” Omu vakatukile, vayile munganda “nakulweza vapilishitu vavakulwane vyuma vyosena vize vyasolokele.” Vapilishitu vayile nakushimutwila navakulwane vavaYuleya. Kaha valikashile kuhana maswekeza maswalale vasweke chihande kana nakuvalweza vambenga ngwavo: “Tumbaji twenyi vezanga naufuku nakumwivamo shimbu twapwanga etu mutulo.”—Mateu 28:4, 11, 13.

Maswalale javaLoma vavajihilenga nge navasavala oku vali nakuzata, ngocho vapilishitu vavafwelelesele ngwavo: “Nge chuma kana [kulumbununa makuli akupwa mutulo] nachiheta mumatwitwi anguvulu, etu natukamulumbunwina chihande chosena. Shikaho enu kamwatela kulizakaminako.” (Mateu 28:14) Maswalale vatambwile aze maswekeza, kaha valingile nge muze vavalwezele vapilishitu. Ngocho chihande chamakuli chakwamba ngwavo mujimba waYesu vawivile chatandakanyine muli vaYuleya mwosena.

Maliya wakuMangatala apwile lika nakulishona kuze kuchimbumbe. Anongamine nakunonoka muchimbumbe, kaha amwenemo vangelo vavali vanavwale uvwalo utoma. Kangelo umwe atwamine kuze kwapwile mutwe waYesu muze vamusavalikile, kaha kangelo mukwavo atwamine kuze kwatalikishile mahinji. Vamuhulishile ngwavo: “Ove pwevo, uli nakulila ika?” Maliya akumbulwile ngwenyi: “Mwata wami vanamufumisamo, kaha kangwatachikijile okwo vanamusavalikako.” Omu alumukile Maliya, amwene mutu weka. Ou mutu ahulishile chihula chize vamuhulishile vaze vangelo, ambile ngwenyi: “Uli nakutonda iya?” Ikiye ashinganyekele ngwenyi pamo ou mutu apwile muka-kulima mumilemba, ngocho ambile ngwenyi: “Ove mwata, kachi nge yove unamumbate, ngulweze okwo unamusavalika, kahami nangumufumisako.”—Yowano 20:13-15.

Maliya apwile nakuhanjika kuli Yesu uze vasangwile, oloze halwola kana kamutachikijileko. Oloze omu Yesu ambile ngwenyi, “Ove Maliya!” ikiye atachikijile jino ngwenyi kumana apwile nakuhanjika naYesu. Maliya atambakanyine oku nawahilila ngwenyi: “Ove Laponyi!” (kulumbununa, “Ove Muka-kunangula!”). Oloze Maliya alizakaminyine mwomwo ashinganyekele ngwenyi Yesu mwaya mwilu hahaze vene, kaha amukwachile. Ngocho Yesu amulwezele ngwenyi: “Kanda kungukakachilako, mwomwo kanda nguchiye mwilu kuli Tata. Oloze yako kuli vandumbwami ukavalweze ngwove, ‘Ami nguli nakuya mwilu kuli Tata uze apwa Senu nayenu, kuli Kalunga kami uze apwa Kalunga kenu nayenu.’”—Yowano 20:16, 17.

Maliya alahile nakuya kuze kwalikungulwilile vaposetolo natumbaji veka. Avalwezele ngwenyi: “Ngunamono Mwata!” Mazu kana alifwanyine nawaze vavalwezele kuli vaze mapwevo veka. (Yowano 20:18) Oloze mujimbu vavalwezele kuli vaze mapwevo wapwile ‘nge wamokomoko kuli vakiko.’—Luka 24:11.