Vanakaji vanokahamara maningi povanovona inga kuti mu guva amucina mundhu. Maria Madharena anogogoma kuenda kuna “Simoni Pedru, no mujiji umweni, wiya Jesu waaidisa”—mupostori Johani. (Johani 20:2) Asi vanakaji vamweni vanoenda ku guva, vanovona ngirozi. Zve mukati mo guvemo muno ngirozi imweni, yakasimira “nguvo jokucena.”—Marco 16:5.

Ngirozi imwe inobvunja vanakaji ava kudari: “Mucathya. Ndinoziva kuti munopsanga Jesu wakakohomehwa pa ciphambano [kana zimiti]. Aapo pano. Wamuka kudari ngo bzaakareva. Vianyi muvone pa ndau paaiva. Endanyi wari, kobvunja vajiji vake kuti wakamuka ko vakafa, no kuti anozomutungamirira kuenda Galileya.” (Mateu 28:5-7) Ngokudaro, “vecitetemera ngo kuthya,” vanakaji ava vanogogoma kuenda kobvunja vajiji.—Marco 16:8.

Pa mukuvo uu, Maria anowanana na Pedhru na Johani. Ecihasaira, anoti: “Vakabvisa Tenji mu guva, atibzizivi ngo kwapi ko vamudira.” (Johani 20:2) Pedhru na Johani vanogogoma kuendeyo. Johani ngaanogogoma maningi, wotungamira kuguma pa guvepo. Anodongorira, wovona nguvo, asi anogara ngo kunja ko guva.

Pedhru anogumira kunghwina mu guvemo. Iyena anovona muceka no nguvo yaifukijwa ndiyona musoro wa Jesu. Wari Johani anonghinavo zve anotenda zvanangaya Maria. Pikija kuti Jesu wakananga kuti anozomuswa, apana anotenda kuti wamuswadi. (Mateu 16:21) Ivona vanohwirira kanyi vacikazwisisi ciricese. Asi Maria wazazve pa guva zve anosarepo.

Pozvinoitika izvi, vanakaji vamweni vanoenda kobvunja vajiji kuti Jesu wamuswa. Povanogogoma kuenda kovabvunja, Jesu anosongana navo,  woti: “Kunyarara komuri.” Ivona vanogwadama panyasi pake. Perepo Jesu anoti: “Mucathya. Endanyi mozivisa hama jangu kuti vaende Galileya; vanozondivoneyo.”—Mateu 28:9, 10.

Pa nguva yaitika kuzungunyika ko nyika, no kuvoneka ngo ngirozi, masoca ainga pa guva ‘akatetemera oita inga vandhu vakafa.’ Masoca aya paazomuka, anghwina mudhorobha “kosumurira bzese bzakaitika, ku vatungamiriri vo vapiri.” Vapiri povanopera kubhuisana no vakuru vo vaJudha, vanotema civaringo co kudyekera masoca kuti atame kunangazve shwiro iyi, vaciti: “Nanganyi ibzi: ‘Vajiji vake vakaza co usiku, vomuba takavata.’”—Mateu 28:4, 11, 13.

Zvecivoneka kuti masoca o Roma angaurawa kudari akavata naari pabasa, vapiri vanovagondesa kudari: “Masoko aya [okuti vaivata pabasa, manyepo,] kudari akaguma mu njeve jo mutongi, itisu tinozomujivirira kuti mucaitihwa ndava.” (Mateu 28:14) Masoca anotendera kudyekehwa, oita zvinonangwa ngo vapiri. Inga muviyo, masoko okuti mutembo wa Jesu wakabiwa anondhandhanika pakati po vaJudha.

Maria Madharena acandocema basi pa guva. Iyena anodongorira mukati wovona ngirozi mbiri jakacena. Imwe yakagara ngo kwainga no musoro wa Jesu, imweni kumakumbo. Ijona jinoti: “Mwanakaji, unocemenyi?” Maria anoti: “Vakabvisa Tenji wangu. Andibzizivi ngo kwapi ko vakamudira.” Paanotendeuka, anovona mundhu umwenizve. Mundhuwo anoitazve mubvunjo wo ngirozi jiya, perapo woti: “Unopsanga ani?” Ecirangarira kuti ari kubhuya no mushandi wo mumunda, anoti: “Tenji, dangani mamutora ndimwi, ndibvunjenyi ngo kwapi ko makamudira. Inini ndinoenda komupsanga.”—Johani 20:13-16a.

Kunasa kunanga, Maria ari kubhuya na Jesu wamuswa, asi aaripi kumuziva pa mukuvo uu. Asi, Jesu paanoti: “Maria!” iyena anozviziva kuti ndi Jesu, ngo mavereketero aanoita nae. Naakadakarisisa, Maria anoti: “Rabuni!” (zvinoreva kuti “Mujijisi!”). Asi, ecithya kuti ari kuda kukhwira kumatenga, Maria anomubata. Ngokudaro, Jesu anoti: “Ucandibata ngokuti andito ndakhwira kuna Baba. Endai ku hama jangu wojibvunja kuti ndinokhwira ka Baba wangu, na Baba wenyu; Mwari wangu na Mwari wenyu.”—Johani 20:16b, 17.

Maria anogogoma kuenda kwakaungana vapostori no vajiji vamweni. Iyena anovabvunja kuti ‘wainga avona Tenji,’ eciengejera ngo zvaakazwa ngo vanakaji vamweni. (Johani 20:18) Asi, masoko aya ‘anovoneka inga o vaphungei [kana mapenji] kovari.’—Luka 24:11.