E hende muhénan a spanta ora nan a haña e graf di Hesus bashí. Maria Magdalena a kore bai serka “Simon Pedro i e otro disipel ku Hesus tabatin kariño p’e,” esta, apòstel Huan. (Huan 20:2) Anto e otro hende muhénan ku a keda na e graf a mira un angel. I den e graf tabatin un otro angel ku “paña largu blanku bistí.”—Marko 16:5.

Un di e angelnan a bisa nan: “No tene miedu, pasobra mi sa ku boso ta buska Hesus, esun ku nan a klaba na staka. E no ta akinan, pasobra el a ser lantá for di morto, manera el a bisa. Bin mira e lugá kaminda e tabata drumí. Anto bai lihé serka su disipelnan i bisa nan ku el a lanta for di morto, i e ta bayendo Galilea boso dilanti.” (Mateo 28:5-7) “Temblando i tur babuká,” e hende muhénan a kore pa bai bisa e disipelnan loke a pasa.—Marko 16:8.

Pa e ora ei, Maria a topa ku Pedro i Huan. Morto kansá, el a bisa nan: “Nan a bai ku Señor for di e graf, i nos no sa unda nan a pon’é.” (Huan 20:2) Mesora Pedro i Huan a sali na kareda. Huan ku por a kore mas duru a yega promé na e graf. Pará pafó, el a tira un bista paden i a mira e pañanan ku Hesus tabata lorá aden.

Ora Pedro a yega, el a kana derechitu bai paden i a mira e pañanan di lenen i e paña ku nan a usa pa lora na Hesus su kabes. Huan tambe a bai paden i a keda konvensí di loke Maria a bisa nan. Ma ainda nan no a komprondé ku Hesus a ser lantá for di morto, maske Hesus a bisa anteriormente ku esei lo a sosodé. (Mateo 16:21) Tur konfundí, nan a bai nan kas bèk. Pero Maria, kende mientrastantu a bini bèk, sí a keda na e graf.

 Entretantu, e otro hende muhénan ku tabata koriendo pa bai konta e disipelnan loke a pasa a topa ku Hesus riba kaminda. El a bisa nan: “Bon dia!” Anto nan a “bùig dilant’i dje.” El a bisa nan: “No tene miedu! Bai konta mi rumannan i bisa nan ku nan mester bai Galilea, i aya nan lo mira mi.”—Mateo 28:9, 10.

Mas promé, ora e temblor a tuma lugá i ku e angelnan a aparesé, e sòldánan ku tabata na e graf “a kuminsá tembla i bira manera hende morto.” Ora nan sustu a baha, nan a bai den stat i “a konta e saserdotenan prinsipal tur loke a sosodé.” E saserdotenan a bai konsultá ku e ansianonan hudiu i a disidí di paga e sòldánan pa nan keda ketu i gaña ku Hesus ‘su disipelnan a bini den anochi i hòrta su kurpa miéntras ku nan tabata drumí.’—Mateo 28:4, 11, 13.

Un sòldá romano por a ser matá si el a pega soño ora e tabata na warda. P’esei, e saserdotenan a primintí e sòldánan: “Si esaki [esta, e mentira di ku e sòldánan tabata drumí] yega na orea di gobernador, nos lo papia kuné pa boso, i boso lo no tin nodi di preokupá.” (Mateo 28:14) E sòldánan a tuma e plaka i a hasi loke e saserdotenan a bisa nan. Asina e rumor falsu ku Hesus su kurpa a ser hòrtá a plama entre e hudiunan.

Ainda Maria Magdalena tabata na e graf ta yora. Dado momento, el a bùk pa lur paden i a mira dos angel bistí na blanku. Un di nan tabata sintá kaminda Hesus su kabes tabata i e otro kaminda su pianan tabata. Nan a puntra Maria: “Pakiko bo ta yora?” El a kontestá: “Nan a bai ku mi Señor, i mi no sa unda nan a pon’é.” Anto Maria a bira wak i mira un hende pará ei banda. E tambe a puntra Maria pakiko e tabata yora. Ademas, el a puntra Maria: “Ken bo ta buska?” Maria a pensa ku tabata e hardinero, p’esei el a kontest’é: “Mi shon, si ta abo a bai ku su kurpa, bisa mi unda bo a pon’é, i lo mi bai kuné.”—Huan 20:13-15.

Bon mirá, Maria tabata papiando ku Hesus, kende a ser resusitá, pero e no a rekonosé Hesus. Ma ora Hesus a bis’é, “Maria,” mesora e tabata sa ku tabata Hesus. El a rekonosé Hesus na e manera ku Hesus tabatin kustumber di papia kuné. Kontentu, Maria a bisa: “Raboni!” (ku ta nifiká: “Maestro!”). Anto Maria a kue Hesus tene duru pasobra e tabatin miedu ku Hesus tabata bayendo shelu. Pero Hesus a bis’é: “No keda tene mi. Pasobra mi no a subi bai serka e Tata ainda. Pero bai serka mi rumannan i bisa nan: ‘Mi ta subi bai serka mi Tata, ku ta boso Tata tambe, i serka mi Dios, ku ta boso Dios tambe.’”—Huan 20:16, 17.

Maria a kore bai kaminda e apòstelnan i e otro disipelnan a reuní i a bisa nan: “Mi a mira nos Señor!” Asina el a konfirmá loke e otro hende muhénan a konta. (Huan 20:18) Ma loke e hende muhénan a konta “a zona manera ko’i loko pa nan.”—Lukas 24:11.