Li ti awali so aga ti bâ yâ ti dû ti kuâ ti Jésus akpe kue tongana ala bâ so yâ ni ayeke senge. Marie ti Magdala akpe loro ti gue ti sara tënë ni na “Simon Pierre nga na mbeni disciple ni, lo so Jésus aye lo mingi,” so ayeke bazengele Jean (Jean 20:2). Me, tanga ti awali ni so angbâ ti ala na yanga ti dû ti kuâ ni abâ mbeni ange. Nga, mbeni ange ni ayeke na yâ ti dû ti kuâ ni kâ, “lo yü yongoro vuru bongo”.—Marc 16:5.

Mbeni oko ti a-ange ni angbâ atene na ala, a tene: “Ala sara mbeto ape. Mbi hinga so ala yeke gi Jésus so a fâ lo na ndo ti keke. Lo yeke ge ape, a zingo lo na kuâ awe, gi tongana ti so lo tene lani. Ala ga, ala bâ ndo so a zia lo fade dä. Ala gue hio atene na adisciple ti lo so a zingo lo na kuâ awe. Nga ala tene na adisciple ni: ‘Lo yeke gue ti ku ala na Galilée.’” (Matthieu 28:5-7). Teti so “tere ti [awali ni] ayeke dö dongo, mbeto ahon ndo ti ala”, ala kpe loro ti gue ti fa peko ti aye ni na adisciple.—Marc 16:8.

Fadeso, Marie atingbi na Pierre nga na Jean. Bê ti lo ayeke fâ gi na loro loro, lo ngbâ lo tene na ala: “Azo azi Seigneur na yâ ti dû ti kuâ ni awe, na e hinga ndo so ala zia lo dä ape.” (Jean 20:2). Pierre na Jean atï na loro. Teti so Jean ayapu mingi, lo la lo si kozo na yanga ti dû ti kuâ ni. Lo yôro lê ti lo na yâ ti dû ti kuâ ni kâ, lo bâ gi ayongoro bongo, me lo ngbâ na gigi.

Na ngoi so Pierre asi, lo lï ti lo lingo na yâ ti dû ni, me lo bâ gi bongo ti lin ni nga na bongo so a kanga fade na li ti Jésus. Jean kue angbâ alï, ge la si lo ga ti mä na bê na tënë so Marie atene fade na ala so. Atâa atënë kue so Jésus atene lani na ala, zo oko na popo ti ala ade ti hinga ape so a zingo Jésus awe la (Matthieu 16:21). Li ti ala aga kirikiri, ala ngbâ akiri na yanga-da. Me Marie, so akiri fade na yanga ti dû ti kuâ ni so, angbâ ti lo kâ.

Na oko ngoi ni, tanga ti awali ni ayeke na lege ti gue ti tene na adisciple ti Jésus so a zingo lo awe. Na ngoi so ala yeke na lege, Jésus atingbi na ala, lo tene: “Bara ala!” Ala ngbâ aga nduru na lo, ala gbu gere ti lo na ala kuku na gbe ti lo. Jésus atene na ala: “Ala sara mbeto ape! Ala gue, ala tene na aita ti mbi so ala peut ti gue na Galilée, na ala yeke bâ mbi kâ.”—Matthieu 28:9, 10.

Kozo fade, na ngoi so sese ayengi nga tongana a-ange asi, tere ti aturugu so ayeke bata dû ti kuâ ni “adö na ala ga tongana akuâ.” Na ngoi so ala wara ngangu awe, ala lï na yâ ti gbata ni na ala “fa na aprêtre-mokonzi peko ti aye kue so asi.” Aprêtre ni ague abâ a-ancien ni. Ala pete goro na aturugu ni ti tene tënë ni asigi ape na ti tene ala tene mvene na azo atene: “Adisciple ti lo aga na bï na anzi kuâ ni na ngoi so e ngbâ na lango.”—Matthieu 28:4, 11, 13.

Tongana aturugu ti Rome alango na ngoi so ala yeke sara kua, a lingbi ti fâ ala ndali ni. Ni la, aprêtre ni atene: “Tongana tënë ni [wala tënë ti mvene ni so] atï na mê ti gouverneur ni, e yeke fa na lo peko ti ye ni. Ala yeke na bezoin ti gi bê ti ala ape.” (Matthieu 28:14). Aturugu ni ayeda na goro ni na ala sara ye so aprêtre ni ahunda na ala. Ni la, tënë ti mvene ti ala ni, so a tene a nzi kuâ ti Jésus nzingo so, amû ndo na popo ti aJuif kue.

Marie ti Magdala angbâ encore na yanga ti dû ti kuâ ni, vundu ahon ndo ti lo. Na ngoi so lo ngbâ ti yôro go ti lo ti bâ ndo na yâ ti dû ti kuâ ni, lo bâ ambeni ange use so ayü vuru bongo. Oko aluti na ndo so a zia fade li ti Jésus dä, na mbeni oko ni aluti ti lo na mbage ti ndo so a zia fade gere ti Jésus dä. A-ange ni angbâ ahunda lo atene: “Wali, mo yeke toto ngbanga ti nyen?” Marie angbâ atene na ala: “Azo amû Seigneur ti mbi ahon na ni, na mbi hinga ndo so ala zia lo dä ape.” Na ngoi so Marie atourné tere ti lo, lo bâ encore mbeni zo nde. Zo ni ahunda gi même tënë so a-ange ni ahunda na Marie, na pekoni lo tene: “Mo yeke gi zo wa?” Marie apensé ti lo atene a yeke zo ti sarango kua ti jardin ni la, ni la lo tene: “Kota zo, tongana mo la mo mû lo mo hon na ni, fa na mbi ndo so mo zia lo dä, na mbi yeke mû lo.”—Jean 20:13-15.

Andâ, Marie ayeke sara tënë na Jésus la, so a zingo lo awe, me na ngoi ni so lo hinga ape so a yeke Jésus la. Me, na ngoi so zo ni atene “Marie!”, ge la si lo ga ti hinga a tene a yeke Jésus la, lo hinga ni ngbanga ti so a yeke fason so Jésus ayeke sara ka na tënë na lo la. Marie adekongo na nzerengo tere, lo tene: “Rabbouni!” (so aye ti tene: “Maître!”). Me, teti so Marie apensé ti lo lo tene Jésus aye ti gue na yayu la, lo ngbâ lo gbu Jésus ngangu. Me, Jésus atene na lo: “Zia ti gbu mbi ngangu tongaso, ndali ti so ade mbi monté na Babâ pëpe. Me mo gue, mo wara aita ti mbi, mo tene na ala: ‘Mbi yeke monté na Babâ ti mbi so ayeke nga Babâ ti ala, na Nzapa ti mbi so ayeke nga Nzapa ti ala.’”—Jean 20:16, 17.

Marie akpe loro lo gue na ndo so abazengele nga na ambeni disciple abungbi tere dä. Lo tene na ala, lo tene: “Mbi bâ Seigneur awe!” Tënë ti lo ni akiri aga na ndo ti tënë so ambeni mba ti lo, wali ni, atene fade (Jean 20:18). “Me, ala bâ ti ala atënë ti awali ni so gi tongana asenge tënë.”—Luc 24:11.