Horuhoru ihora na vahine i to ratou iteraa e aita faahou to Iesu tino i roto i te menema. Horo ihora Maria Magadala ia “Simona Petero ra e i te tahi atu pǐpǐ mea here na Iesu,” te aposetolo Ioane. (Ioane 20:2) Ite aˈera râ te tahi atu mau vahine i faaea ˈtu i te menema i te hoê melahi. E melahi atoa to roto mai, “e ahu roa uouo to ˈna.”—Mareko 16:5.

Na ô atura hoê o na melahi: “Eiaha e mehameha. Ua ite au e te imi nei outou ia Iesu no Nazareta, tei haapohehia i nia i te pou. Ua faatiahia mai oia, aita oia i ǒ nei. A hiˈo i te vahi i vaiihohia ˈi to ˈna tino. A haere râ e parau i ta ˈna mau pǐpǐ e ia Petero: ‘Te na mua ˈtu ra oia ia outou i te haere i Galilea.’” (Mareko 16:6, 7) Horo aˈera na vahine “ma te rûrû e te maere rahi” e faaara i te mau pǐpǐ.—Mareko 16:8.

I te itearaa mai ia Maria Petero raua Ioane, na ô atura oia a paupau ai te aho: “Ua hopoi-ê-hia te Fatu mai roto atu i te menema, e aita matou i ite ihea o ˈna i te tuuraahia.” (Ioane 20:2) Horo aˈera Petero raua Ioane i te menema. O Ioane tei tae na mua, mea vitiviti aˈe hoi oia ia Petero. Na rapaeau noa to ˈna fâaoraa i roto e iteraa i te ahu lino.

I to Petero iho â taeraa ˈtu, tomo ihora oia i roto, e ite atura i te ahu lino e te ahu i vehîhia ˈi to Iesu upoo. Tomo atoa ihora Ioane e tiaturi ihora i ta Maria i parau. Noa ˈtu ta Iesu i parau na mua ˈtu, aita raua i taa noa ˈˈe e ua faatiahia mai oia. (Mataio 16:21) Hoˈi ihora Petero i ǒ ˈna e Ioane i ǒ ˈna ma te taa ore. O Maria râ, tei hoˈi mai i te menema, faaea noa ihora ïa i reira.

Area te tahi atu mau vahine, ua haere ïa e faaara i te mau pǐpǐ e ua faatiahia mai Iesu. A horo noa ˈi ratou, farerei maira ratou ia Iesu e na ô  atura Iesu eiaha ratou e mǎtaˈu, ia haere râ e faaara i ta ˈna mau pǐpǐ ia haere i Galilea, i reira ratou e farerei ai.—Mataio 28:9, 10; Luka 24:8-10.

I te aueueraa te fenua e te faraa mai na melahi i te menema, “rûrû aˈera” te mau faehau “e riro atura mai te taata pohe.” I te hoˈiraa mai to ratou hiroa, tomo aˈera ratou i te oire e “faatia ˈtura i te mau tahuˈa tiaau i te mau mea atoa i tupu.” Putuputu aˈera te mau tahuˈa e te mau aratai ati Iuda, faaoti aˈera e peta i te mau faehau ia huna i te ohipa i tupu e ia parau: “Ua haere mai ta Iesu mau pǐpǐ i te po e ua eiâ i to ˈna tino a taoto noa ˈi matou.”—Mataio 28:4, 11, 13.

Ia taoto noa ˈtu te mau faehau Roma i ta ratou ohipa tiairaa, e nehenehe ratou e haapohehia. Na ô atura ïa te mau tahuˈa: “Ia tae noa ˈtu teie parau [ta ratou haavare e ua taoto ratou] i te tariˈa o te tavana, eiaha outou e haapeapea, na matou e faataa ˈtu ia ˈna.” (Mataio 28:14) Rave aˈera te mau faehau i te moni e parau haere aˈera i tei faauehia ˈtu e te mau tahuˈa. Atutu atura i rotopu i te ati Iuda te parau haavare ua eiâhia to Iesu tino.

Te taˈi noa ra Maria Magadala. A fâao ai oia i roto i te menema, ite ihora oia e piti melahi ahu uouo e parahi ra i te vahi i tuuhia ˈi to Iesu tino, hoê i te pae upoo e hoê i te pae avae. Ui maira raua: “No te aha oe e taˈi ai?” Pahono atura oia: “Ua ravehia to ˈu Fatu e aita vau i ite ihea o ˈna i te tuuraahia.” Hiˈo aˈera oia i muri e ite ihora i te hoê taata tei ui atoa mai: “No te aha oe e taˈi ai? O vai ta oe e imi nei?” Manaˈo ihora Maria e o te taata tamâ aua e na ô atura: “Mai te peu e na oe i hopoi ê ia ˈna, faaite mai ïa ihea to oe tuuraa ia ˈna, e rave hoi au ia ˈna.”—Ioane 20:13-15.

O Iesu hoi tei faatiahia mai ta Maria e paraparau atu ra. Aita â râ oia i ite atura. I to Iesu râ parauraa, “Maria!” taa ihora ia ˈna o Iesu teie na nia i ta ˈna huru paraparau. Na ô atura Maria ma te oaoa: “Raboni!” (“Orometua!” te auraa.) No to ˈna râ taiâ aˈunei oia e reva ˈi i te raˈi i taua taime ra, haru ihora oia ia Iesu. Parau maira Iesu: “A faaea na i te turui noa i nia ia ˈu. Aita â hoi au i haere atura i nia i te Metua ra. A haere na râ i to ˈu mau taeae ra e a parau atu: ‘Te haere nei au i nia i to ˈu Metua ra e to outou Metua e i to ˈu Atua e to outou Atua.’”—Ioane 20:16, 17.

Horo ihora Maria i te vahi i putuputu ai te mau aposetolo e te tahi atu mau pǐpǐ. Na ô atura oia ia ratou: “Ua ite au i te Fatu!” Ua faarooroo aˈenei hoi ratou i te faatiaraa a te tahi atu mau vahine. (Ioane 20:18) No ratou râ, “aita e auraa to teie mau parau.”—Luka 24:11.