Diri gud makatoo an mga babaye han hinbaroan nira nga waray sulod an lubnganan! Dinalagan hi Maria Magdalena ngadto kan “Simon Pedro ngan ha usa pa nga disipulo nga pinalangga ni Jesus”—hi apostol Juan. (Juan 20:2) Pero an iba nga kababayin-an nga nakadto may nakita nga anghel. Ngan ha sulod han lubnganan may-ada pa usa nga anghel, nga ‘nakabado hin busag.’—Marcos 16:5.

An usa han mga anghel nagsiring: “Ayaw kamo kahadlok, maaram ako nga ginbibiling niyo hi Jesus nga iginraysang ha kahoy. Waray na hiya dinhi kay ginbanhaw na hiya, sugad han iya ginsiring. Kadi, kitaa niyo an ginlubngan ha iya. Kadto kamo dayon ha iya mga disipulo ngan sumati hira nga ginbanhaw na hiya. Mag-uuna hiya ha iyo ngadto ha Galilea.” (Mateo 28:5-7) Salit an kababayin-an nga “nangungurog ngan nahipapausa gud,” nagdadlagan basi magsumat ha mga disipulo.—Marcos 16:8.

Yana, nakit-an ni Maria hira Pedro ngan Juan. Naghahangos nga nagsumat hiya ha ira: “Ginkuha nira an Ginoo ha lubnganan, ngan diri kami maaram kon diin hiya iginbutang.” (Juan 20:2) Dinalagan dayon an duha nga apostol. Mas malaksi dumalagan hi Juan, salit hiya an nauna pag-abot ha lubnganan. Ginhil-ing ni Juan an sulod hito ngan nakita an mga bendahe, pero waray hiya sumulod.

Pag-abot ni Pedro, sinulod dayon hiya. Nakita niya didto an mga tela nga lino ngan an tela nga iginputos ha ulo ni Jesus. Yana, sinulod hi Juan, ngan tinoo hiya ha iginsumat ni Maria. Bisan pa kon ginsumatan na hira ni Jesus hadto, waray masantop nira Pedro ngan Juan nga ginbanhaw na hiya. (Mateo 16:21) Nawuwurok nga inuli hira nga duha ha balay. Pero hi Maria nga binalik ha lubnganan nagpabilin didto.

Hito nga takna, an iba nga kababayin-an lumakat basi sumatan an mga disipulo nga ginbanhaw na hi Jesus. Samtang nagdidinalagan, gintapo hira ni Jesus ngan nagsiring: “Maopay nga adlaw!” Linuhod hira ha iya tiilan ngan yinukbo. Katapos hiya nagsiring: “Ayaw kamo kahadlok! Kadto kamo ha akon kabugtoan, ngan sumati hira basi kumadto ha Galilea, ngan makikita nira ako didto.”—Mateo 28:9, 10.

Diri pa la maiha, han naglinog ngan nagpakita an mga anghel, an mga sundalo nga nakadto ha lubnganan ‘nangurog ngan waray pakakiwa.’ Han naulian, kinadto dayon hira ha syudad ngan “ginsumatan an punoan nga mga saserdote han ngatanan nga nahitabo.” Ginkonsulta han mga saserdote an katigurangan han mga Judio. Nadesisyonan nga suholan an mga sundalo basi diri ito ipanumat ngan magbuwa: “An mga disipulo ni Jesus kinadto han gab-i ngan ginkawat an iya patay nga lawas samtang nangangaturog kami.”—Mateo 28:4, 11, 13.

Mahimo sirotan hin kamatayon an Romano nga mga sundalo kon kumaturog hira samtang nagbabantay, salit nagsaad an mga saserdote: “Kon makabati hini [an ira pagbuwa nga nangaturog hira] an gobernador, kukombinsihon namon hiya ngan ayaw kamo kabaraka.” (Mateo 28:14) Ginkarawat han mga sundalo an suhol ngan gintuman an iginsugo ha ira han mga saserdote. Salit, an buwa nga sumat nga ginkawat an lawas ni Jesus nahibantog ha mga Judio.

Hi Maria Magdalena nga nagpabilin ha lubnganan, nasusubo pa gihapon. Paghil-ing niya ha sulod han lubnganan, nakakita hiya hin duha nga anghel nga nakabusag! An usa nalingkod ha may ulohan ngan an usa ha may tiilan han ginbutangan han lawas ni Jesus. Nagpakiana hira: “Babaye, kay ano nga nagtitinangis ka?” Binaton hi Maria: “Ginkuha nira an akon Ginoo, ngan diri ako maaram kon diin nira hiya iginbutang.” Paglingi niya may nakita pa hiya nga nakadto labot han mga anghel. Gin-utro hito an pakiana han anghel ngan nagdugang: “Hin-o an imo ginbibiling?” Kahuna ni Maria nga an hardinero an nagpakiana, salit hiya nagsiring: “Mano, kon ikaw an nagdara ha iya, sumati ako kon diin mo hiya iginbutang kay kukuhaon ko hiya.”—Juan 20:13-15.

An tinuod, an nabanhaw nga hi Jesus an kaistorya ni Maria, pero hito nga takna waray hiya pakakilala. Pero han nagsiring hi Jesus, “Maria!” nasantop niya nga hi Jesus ito kay pamilyar an iya paagi han pakiistorya. Hi Maria malipayon nga suminggit: “Rabboni!” (nangangahulogan, “Magturutdo!”). Pero tungod kay nahadlok hiya nga sumaka hi Jesus ha langit, iya ginkaptan hi Jesus. Pero ginsidngan hiya: “Ayaw ako pagkapti, kay waray pa ako sumaka ngadto ha akon Amay. Kadto lugod ha akon kabugtoan ngan sumati hira, ‘Masaka ako ngadto ha akon Amay ngan ha iyo Amay, ha akon Dios ngan ha iyo Dios.’”—Juan 20:16, 17.

Dinalagan hi Maria ngadto ha ginkakatirokan han mga apostol ngan mga disipulo. Labot la ha iginsumat na han iba nga kababayin-an, may ginsiring pa hiya ha ira: “Nakita ko an Ginoo!” (Juan 20:18) Pero, ginhunahuna hini nga kalalakin-an nga “waray pulos” ini nga mga sumat.—Lucas 24:11.