Qué guirá guidxagayaa ca gunaa que ni cayuuyacaʼ: guirutiʼ nuu ndaaniʼ baʼ que. Ne oraqueca biree guxooñeʼ María Magdalena zeʼ «ra nuu Simón Pedro ne ra nuu sti discípulo, ni nabé nadxii Jesús que», apóstol Juan (Juan 20:2). Ne xcaadxi gunaa ni biaana que biiyacaʼ ti ángel. Ne ndaaniʼ baʼ que nuu sti ángel, «nacu ti lari ziuulaʼ color blancu» (Marcos 16:5).

Para ná tobi de ca ángel que rabi laacabe: «Cadi guidxíbitu; nannaʼ cuyúbitu Jesús, ni gutiʼ lu yaga. Qué guínnibe raríʼ, purtiʼ maʼ biásabe, casi guniʼbe. Latáʼ, laguuyaʼ ra gútabe. Yanna, laché nagueendaca ne lagabi ca discípulo stibe: “Maʼ biásabe lade gueʼtuʼ, ne maʼ zanírube lutu Galilea; raqué zuuyatu laabe”» (Mateo 28:5-7). Nagueendaca biree ca gunaa que «zidxíbicaʼ peru guizáʼ ziyéchecaʼ, ne ziguxooñecaʼ zitídxicaʼ ni ca discípulo stibe» (Mateo 28:8).

Ora bizaaca ca cosa riʼ, mápeca bidxaaga María Pedro ne Juan. Dede nin qué ganda guiníʼ María tantu cadxaga, ná rabi laacabe: «¡Maʼ guleecabe Señor ndaaniʼ baʼ que, ne qué gánnadu paraa gudíxhecabe laabe!» (Juan 20:2). Para biree Pedro ne Juan ziguxooñecaʼ ra baʼ que. Cumu jma reciu ruxooñeʼ Juan la? yendá primé. Guluu lú ndaaniʼ baʼ que ne biiyaʼ nexheʼ ca venda que raqué peru qué niná ñuu.

Peru ora bedandá Pedro nagueenda guyuu ndaaniʼ baʼ que. Biiyabe ca lari de lino que ne lari ni birenda ique Jesús. Para biuu Juan ndaaniʼ baʼ que ne oraqueruʼ biʼniʼ cré ni gudxi María laa. Neca maca gudxi Jesús laacabe ziasa de lade gueʼtuʼ, nin tobi de laacaʼ cadi cudiicaʼ cuenta maʼ guca ni (Mateo 16:21). Cumu cadi cayene Pedro ne Juan ni cazaaca, biguétacaʼ ra lídxicaʼ. Peru biaana María ra baʼ que.

 Laga cazaaca ndiʼ, biree xcaadxi gunaa que ziguxooñecaʼ zitídxicaʼ xcaadxi discípulo que nabani Jesús. Bidxaaga Jesús laacabe neza ne «bigapadiuxi laacabe». Para bidxiña ca gunaa que bizuxíbicaʼ xañeebe ne cusisácacaʼ laabe. Para ná Jesús rabi laacabe: «Cadi guidxíbitu. Laché, lagabi ca bicheʼ checaʼ Galilea; raqué zuuyacaʼ naa» (Mateo 28:9, 10).

Ante guizaaca ndiʼ, ora guca ti xu ne bihuinni caadxi ángel ra baʼ que, guizáʼ bidxibi ca soldadu ni cayapa raqué «gucadíticaʼ ne biaanacaʼ casi gueʼtuʼ». Biasa si ca soldadu que guyecaʼ ndaaniʼ guidxi que ne gúdxicaʼ ca sacerdote principal guiráʼ ni bizaaca. Despué de guca reunircaʼ né ca ancianu de guidxi que, gudixe ca sacerdote ca soldadu que para guiniʼcaʼ: «Beeda ca discípulo stibe huaxhinni ne guláʼnacaʼ cuerpu que laga nisiáʼsidu» (Mateo 28:3, 4, 11, 13).

Cumu zanda guuticabe ti soldadu pa gasiʼ laga cayuni guardia. Ngue runi rabi ca sacerdote que laacabe gusiguiicabe, ne nacaʼ: «Ne pa gueeda ganna gobernador ni la? [gucuá bacaandaʼ laacabe] laadu gusiénedu ni laa. Cadi chuʼtu xizaa» (Mateo 28:14). Gucuaa ca soldadu que bueltu bidii ca sacerdote que laacaʼ ne bíʼnicaʼ guiráʼ ni nácabe. Ne zaqué bireeche guendarusiguii riʼ lade ca judíu.

Peru cayuunaruʼ María Magdalena cueʼ baʼ que. Ora gutagudaabe para gúʼyabe ndaaniʼ baʼ que biiyabe chupa ángel zúbacaʼ ra gutaʼ cuerpu stiʼ Jesús, tobi neza ra gutaʼ íquebe ne stobi neza ra gutaʼ ñeebe. Para gunabadiidxacabe laa: «Gunaa, ¿xiñee cayuunaluʼ pue?». Para rábibe laacaʼ: «Purtiʼ zinécabe Señor stinneʼ ne qué gannaʼ paraa gudíxhecabe laa». Guníʼ si María ndiʼ, bidxiguetalú ne biiyabe sti binni. Para gunabadiidxaʼ binni que laabe laaca ni gunabadiidxaʼ ca ángel que laabe ne ná: «¿Tu cuyúbiluʼ?». Zácaxa María jardineru que ngue, ná rabi laabe: «Señor, pa lii yeneluʼ laabe, gudxi naa paraa gudíxheluʼ laabe ti chicaaʼ laabe» (Juan 20:13-15).

Jesús nga caniʼné María, peru cadi cayunibiáʼ María laabe. Peru ora gudxi Jesús laabe: «¡María!», óraque bidiibe cuenta Jesús ngue caniʼné laabe, purtiʼ binibiaʼbe stidxi. Guizáʼ cayecheʼ María bicaa ridxi: «¡Rabbóni!» (ni raca significar «maestru»). Peru cumu cadxíbibe cheʼ Jesús guibáʼ la? ngue runi gunaazebe Jesús. Para ná Jesús rabi laabe: «Bindaa naa, purtiʼ caʼruʼ quibaʼ ra nuu Bixhozeʼ. Guyé ra nuu ca bicheʼ ne gudxi laacaʼ: “Chichibaʼ ra nuu Bixhozeʼ ne Bixhózetu, ra nuu Dios stinneʼ ne Dios stitu”» (Juan 20:16, 17).

Bizuubaʼ María diidxaʼ ne ziguxooñeʼ ra nuu ca apóstol ne ca discípulo. Maʼ gudxi xcaadxi gunaa que laacabe xi bíʼyacaʼ. Ne yanna gudxi María laacabe: «¡Maʼ biiyaʼ Señor!». Ne gúdxibe laacaʼ ni gudxi Jesús laabe (Juan 20:18). Peru para laacaʼ ruluíʼ guendahuati si ngue ni caníʼcabe (Lucas 24:11).