E môse sondô, Nisan 16, beyé’é ba wô’ô ate’e nyul. Ba kate wô’ô na, soñ é ne ékôkoé. (Matthieu 28:9, 10; Luc 24:11) Mvuse ya valé, môs ôte Cléopas a ñyé’é mfe ba kôlô Jérusalem na ba ke Émmaüs, bebé bekiliméta 11.

Nté ba wulu, ba kobô mam mese ma te boban. Ane nneñ a nga zu koone be, a sili be na: “Za minlañ mi alaa mi éyoñ mi awulu?” Cléopas nye na: “Ye wo étam ô to Jérusalem, te yem mam me abobane wôé melu ma?” Ane nneñ a sili be na: “Za mame?”​—Luc 24:17-19.

Be na: “Mam me Yésus ya Nazareth. . . . Bi nga to ndi minleme na, nnye a ye nyii bôte ya Israël.”​—Luc 24:19-21.

Cléopas a mvôé jé ba ke ôsu a kañete nye mam ma te boban môse ôte ôbien. Ba jô nye na, binga béziñ ba te kune ke soñ, vôme ba te bôé Yésus a koone na é ne ékôkoé. A binga bete ba te yene asimba a mise map bebien: ba te yene beéngele be kate’e be na Yésus a wômôya. Ba k’ôsu a jô na bôte bevok ba te ke soñ a “yene fo’o ane binga be ate jô.”​—Luc 24:24.

Da yené fo’o na beyé’é bete bebaé be ne fe’e ne vema a mam mete mese. Ane nneñ a yalane be a ngul ése na a sôan asimesane dap a jô’ô na: “A bôt mi ne asuk, a minlem ate’e ya buni mejô mese bekulu mejô be nga jô! Ke Krist a nga yiane yene mam abé mete, a ke tabe éto be awumu nye?” (Luc 24:25, 26) A nga ke ôsu a timine be abui Mintilane mife mi tii a Krist.

Ane bese belal ba su’ulane kui Émmaüs. Beyé’é bebaé ba kômbô beta wô’ô mam a jô, nde ba ye’elane nye a jô na: “Tabe’e; amu ngô’é é nto, a môs ô jaéya lôt.” A kañese tabe a be, a ba tabe na be di. Éyoñe nneñ a nga ye’elan, a be’e fembé a ve be, ane ba yeme nye, nye ve jañe be mise. (Luc 24:29-31) Éyoñe ji be yemeya fo’o na Yésus a vee!

Beyé’é bebaé ba kañete jam be ndôme yen a ava’ ése be jô’ô na: “Ke minlem miangan mi ate yôñ a mevak, éyoñ a te kobô bia zen, a liti bia mejô me ya kalate Zambe?” (Luc 24:32) Ane ba kôlô si a ji’a bulane Jérusalem vôme ba koone minlôman a bôte befe be ne nsamba a be. Ôsusua na Cléopas a mvôé jé be yoé anyu, ba wô’ô bôte bevok be jô’ô na: “Tate a wômôya fo’o, Simon a yeneya nye.” (Luc 24:34) Ane balé bete bebaé ba kañete aval avé Yésus a te yené be be. Ôwé, be’ fe be ne bengaa y’ajô te.

Ve teme na, Yésus émien a nto be zañ! Jam ete é ne fo’o angôndô amu ba te mane fete mimbé mise amu ba ko Bejuif woñ. Ve, Yésus a tele fo’o be mis été. Ane a jô a évôvoé ése na: “Taba’an mvo’é.” Ve, ba fô’ôban a ko woñ. Ba simesan, ane be nga buni môs éziñe na, ‘a ne nsisim.’​—Luc 24:36, 37; Matthieu 14:25-27.

Asu na a liti be na a nji bo jôme ba simesan, na a bili nyule minsôn, Yésus a liti be mo mé a mebo mé a jô’ô na: “Mi afô’ôban amu jé? Tameka yenane me mo a mebo, a ne mamien: bôla’ane ma, mi yen; amu [nsisim] ô se minsôn a bives, ane mi lô me na.” (Luc 24:36-39) Be ngenan te buni a ba kam, ve nlem ô ne be njalan a mevak.

Nde a beta bo jam afe na a volô be na be buni na nye fo’o le; a sili be na: “Ye mi bili  jôme ya di?” A nyoñ étune kos é too mbuban a di je. Ane a jô na: “E jam me mbe me jô’ô mia e nde le éyoñe te bia be mia bi ngenan na: Mam mese me ne ntilan ajô dame metiñe Môze, e be bekulu mejô a besam me nga yiane tôéban.”​—Luc 24:41-44, Mfefé Nkôñelan.

Yésus a te volô Cléopas a mvôé jé na be wô’ô Mintilan, a bo fe de asu bôte bese ba te sulane valé, a jô na: “E ne ntilane na, Krist a yiane wu, a wômô soñ môse lale; a bôt be aye kate meyoñe mese ajô nkôñelane minlem a njamane mam abé, jôé dé, ataté Jérusalem. Mi ne [bengaa] ya mam mete.”​—Luc 24:46-48.

Jam éziñ da te bo na Simon a bo teke tabe valé. Melu ma tôñe valé, bôte ba jô nye a mevak na: “Bi yeneya Nti.” Thomas nye na: “Nge me te kôme yen bifele mesen e mo mé été, me me beme fe ônyu wom e bifel mesen été, me kôme fe nyiñili wo wom e mvaé jé été, me teke yebe.”​—Jean 20:25, Mfefé Nkôñelan.

Mvuse melu mwom, beyé’é ba beta fete mimbé na be bo ésulan, a Thomas a ne valé éyoñe ji. Yésus ve tebe be zañ a batane be a jô’ô na: “Taba’an mvo’é.” Nde a fombô Thomas a jô nye na: “Same’ ônyu viôé, a fombô mo mam; same’ wo wôé, a ke wô mvaé jam: te bo bisô, ve buni.” Thomas nye na: “A Tate wom a Zambe wom!” (Jean 20:26-28) Ôwé, Thomas a nji beta sôô na Yésus a vee. Thomas a jô na “Zambe wom” nalé a tinane na Yésus a ne “zambe,” a to fe valé señe nya Zambee, nye ate a ne Yéhôva.

Yésus nye na: “Amu ô yeneya ma, ô buniya: ébotan a bôt be nji yen, ve buni.”​—Jean 20:29.