E Sabath 16 Nisan, itretre dreng a hace hni. Tha trotrohnine kö angatr la kola pë aliene la hua. (Mataio 28:9, 10; Luka 24:11) Itre hawa thupen, hnei Kaleopa me ketre atre dreng, hna tro qa Ierusalema a tro Emao, a traqa koi 11 km la enanyin.

Nyidroti a porotrikëne trootro la itre ewekë ka traqa. Ame hna traqa pi koi nyidro la ketre trenyiwa. Nyidrëti a hnyingëne jë ka hape: “Nemene la hnei epon hna ce ithanatane qaane ekula?” Sa jë hi Kaleopa ka hape: “Ke trenyiwa eö, nge ka lapa casi eö e Ierusalema, matre thatre kö eö la itre ewekë ka traqa eue hi lo?” Önine jë hi la trenyiwa ka hape: “Nemene ewekë lai?”—Luka 24:17-19.

Öni nyidro: “Kolo itre ewekë ka traqa koi Iesu, lo atre Nazareta. . . .  Ngo ame hun, eahuni a mejiun laka, tro la atre cili a amele Isaraela.”—Luka 24:19-21.

Nyidroti a nyiqaane qaja jë koi nyidrë la itre ewekë ka traqa la drai ce. Öni nyidro ka hape, hetre itre föe ka tro kowe la hua i Iesu, nge traqa ju hi angatr a öhne la hua ka pë alien. Nge hnene la itre föe cili hna öhne la kola iamamany—lue angela ka qaja ka hape, mele hmaca ha Iesu. Hnei angatr hna thuemacanyi itre xan, nge hnene la ala lu hna tro kowe la hua, me “öhne la itre ewekë hna qaja hnene la itre föe.”—Luka 24:24.

Eje hi, tha trotrohnine pala kö nyidro la aliene la itre ewekë cili. Matre hnene la trenyiwa hna catr, me amekötine la aqane waiewekë i nyidro, ke kola ajolëne la hni nyidro. Öni nyidrë: “Ekölö hi ni nyipunie itretre hmitre troa trotrohnin, me itre hni ka hmitre troa mejiun! Hnauëne laka, tha mejiune kö nyipunie kowe la itre ewekë hna qaja ha hnene la itre perofeta? Hapeu, tha ka nyipiewekë kö tro la Keriso a pane melëne la itre akötre cili matre kapa jë la lolo hna hnëkën thatraqai angeic?” (Luka 24:25, 26) Nyidrëti a nyiqaane qejepengöne jë la itre hna cinyihan ka qeje Keriso.

Angatre hë e Emao. Ngo aja ne la lue atre dreng troa atre la itre xa ithuemacany, matre nyidroti a alapane jë la trenyiwa me hape: “Pane lapa ju me nyio, ke hejiheji hë la nge easenyi hë matre ase pi la drai.” Kapa jë hi lai trenyiwa, matre angatr a ce elë jë troa xen. Ase jë hi nyidrëti thith, nyidrëti a thupathupa pi la falawa me hamë nyidro. Ngo ame ju hi la nyidroti a trotrohnine ka hape, Iesu, patre ju hi nyidrë. (Luka 24:29-31) Haawe, xecie hnyawa ha koi nyidro ka hape, mele hmaca ha Iesu!

Nyidroti a nyiqaane porotrikëne me hain la ewekë ka traqa, öni nyidro: “Hapeu, tha hna ketre kö la lue hni so lo nyidrëti a ithanata koi nyiso e kuhu gojeny, lo nyidrëti a qejepengöne hnyawa koi nyiso la itre hna Cinyihan?” (Luka 24:32) Nyidroti a canga bëeke jë a tro Ierusalema troa wange la itre aposetolo, me itre ka ce me angatr. Ngo qëmekene tro Kaleopa me sinatronge i angeic a ithanata, canga önine jë hi la ketre ka hape: “Nyipici, mele hmaca ha la Joxu, ke hnei nyidrëti hna mama koi Simona!” (Luka 24:34) Thupene lai, nyidroti a nyixane jë me hape, hnei Iesu fe hna hane mama koi nyidro. Eje hi, öhne fe hë nyidro.

Ngo enehila, angatr asë a sesëkötr, ke Iesu e nyipi angatr! Angatr a goe catr ke hna kiine la qëhnelö. Hnei angatr hna kiin ke xou i angatr la angetre Iudra. Ngo eje hi, Iesu e nyipi angatr. Öni nyidrëti jë hi: “Epi tingetinge nyipunie.” Ngo angatr a isa xou, ke ‘öni angatre pena kö ka hape, ma iamamanyikeu lai.’—Luka 24:36, 37; Mataio 14:25-27.

Iesu a akeukawanyi angatre jë me amamane laka, tha iamamanyikeu kö, maine ketre pu, ngo hetre ngönetrei nyidrëti hi. Iesu a amamane jë la lue im, me lue ca i nyidrë me hape: “Hnauëne  la nyipunieti a xou, nge hnauëne laka, luelue la itre hni nyipunie? Goeëne ju la lue imeng me lue cang, eni hi; ketri ni jë nge trotrohnine ju, ke pëkö u ka trene ijöne me ijun, tune la hnei nyipunieti hna öhne theng.” (Luka 24:36-39) Angatr a isa hain me madrin, ngo hetre itre xane pala kö ka nango luelu.

Nge matre troa xecie hnyawa koi angatr ka hape, ka mele nyidrë, öni nyidrë: “Hetre a i nyipunieti kö?” Angatr a hamë nyidrëti jë la ketre neköi ie hna pekën, nge nyidrëti a öni jë. Thupene lai öni nyidrë: “Ame lo eni petre kö me nyipunie, hnenge lo hna qaja la itre trengewekë celë koi nyipunie, ene laka, ‘Ame asë hi la itre ewekë hna cinyihan ngöne la Trenge Wathebo i Mose, me itre perofeta, me itre Salamo göi ni, tre itre ewekë lai ka troa eatr.”—Luka 24:41-44.

Hnei Iesu hna xatua Kaleopa me sinee i angeic troa trotrohnine la itre hna Cinyihan, ngo enehila, nyidrëti a xatuane la nöjei atr ka icasikeu e celë. Öni Iesu: “Hane hi la hna cinyihan: tro la Keriso a pane akötr, nge tro ha amele nyidrëti hmaca qa hna mec ngöne la hnaakönine drai. Nge ngöne la ëje i nyidrë, tro ha cainöjëne kowe la itre atr qaane Ierusalema uti hë la nöjei nöj asë ka hape, ijije tro angatr a ietra nge troa hane nue la ngazo i angatr. Nge nyipunieti hi la itre ka troa hane sine lai.”—Luka 24:46-48.

Thatre kö së la kepin, ngo patre kö Toma la ijine cili. Matre ngöne la drai thupen, hnei itre xan hna madrin me qaja koi angeic ka hape: “Öhne hë huni la Joxu.” Ngo sa jë hi Toma ka hape: “Maine tha tro kö ni a öhne la thupene itre fao ngöne la hnatrapaime i nyidrë, me lin e cili la hene iwanakoimeng, me imeng kowe la gaa xulu ne la iwengesisila i nyidrë, tha tro jë kö ni a hane mejiun.”—Ioane 20:25.

Thupene la eitre lao drai, itretre drenge hmaca a icasikeu ngöne la hnahage hna kiin. Ce Toma fe me angatr. Iesu a mama jë nyipi angatr ngöne la ngönetrei ne atr, matre öni nyidrë: “Epi tingetinge nyipunie.” Nyidrëti a xei ju koi Toma me hape: “Line pi la hene wanakoime i eö e celë, nge goeëne ju la lue ihnatrapaimeng, nge line jë fe la ime i eö kowe la wengesisilang, nge loi ju hë hna luelu, ngo mejiune ju pe.” Öni Toma jë hi: “Joxung, nge Akötresinge fe!” (Ioane 20:26-28) Eje hi, xecie hnyawa ha koi angeic ka hape, mele hmaca ha Iesu, nge nyidrëti la ketre u ka nyihatre i Akötresie.

Öni Iesu jë hi: “Eö kö a mejiune pine laka, öhnyi ni hë hnei eö. Ngo tro pe a madrine la atre mejiune nge tha öhne kö.”—Ioane 20:29.