LyaSondo haNyisane 16, tumbaji vahombele chikuma, mwomwo kavatachikijile ovyo vyalingishile muchimbumbe mupwenga mwamupolongwako. (Mateu 28:9, 10; Luka 24:11) Kuheta namusana, Keleyopa nakambaji weka vafumine kuYelusalema nakuya kuEmau, kungalila yize yapwile kafwe jikilomita 11.

Omu vapwile nakuya mujila, vashimutwilile havyuma vize vyasolokele. Mutu umwe avahumanganyine, kaha avahulishile ngwenyi: “Uno vyuma muka evi muli nakulihwojola omu muli nakutambuka mujila?” Keleyopa akumbulwile ngwenyi: “Uno unapu ungeji kaha nawa uli nakutwama uka wove muYelusalema numba uzeneke kutachikiza vyuma vinasoloka munganda kana hamakumbi anoko tahi?” Kaha uze mutu avahulishile ngwenyi: “Vyuma mukovyo?”—Luka 24:17-19.

Vamukumbulwile ngwavo: “VyaYesu wakuNazaleta.” Kaha vambile nawa ngwavo: “Etu twafwelelanga ngwetu, ou mutu ikiye mwakasokola vaIsalele.”—Luka 24:19-21.

Keleyopa nauze mukwavo vatwalileho kumulweza vyuma vyasolokele halikumbi lize. Vambile ngwavo mapwevo vamwe vaze vayile kuchimbumbe kuze vafunjile Yesu vawanyine muchimbumbe mwamupolongwa, kaha nawa ngwavo vamwene vangelo vaze vavalwezele ngwavo Yesu wamutonyi. Vambile cheka ngwavo vatu vamwe vayile kuchimbumbe, kaha ‘vawanyine vene nge muze vambile vaze mapwevo.’—Luka 24:24.

Vaze tumbaji vavali valikomokelele hakuhona kutachikiza mwalumbunukilile vyuma vize vyasolokele. Uze mutu avahumanganyine apwile nawata, kaha olwele vishinganyeka vyavo vyakuhenga vize vyapwile mumichima yavo, ambile ngwenyi: “Enunyi muvatu vakuhona mangana, vamichima yakushipwokela kwitavila vyuma vyosena vize vahanjikile vapolofweto. Uno kachamutelanga Kulishitu kuhita muvihuli evi nakwingila muupahu wenyiko nyi?” (Luka 24:25, 26) Atwalileho lika kuvalumbunwina Visoneka vyavivulu kutalisa kuli Kulishitu.

Kutwala muze, vosena vatatu vahetele kwakamwihi naEmau. Vaze tumbaji vavali vasakile kwivwa vyuma vyavivulu, ngocho vamulwezele ngwavo: “Twama nayetu, mwomwo likumbi hinaliya nakulauka, kaha kunatoko lyehi.” Etavile kutwama navo, kaha valile hamwe vyakulya. Omu uze mutu alombele, nakupazula mbolo nakuvahanayo vamutachikijile jino ngwavo apwile Yesu, oloze ikiye alelanganyine. (Luka 24:29-31) Aha jino hakiko vatachikijile ngwavo kumana Yesu wamutonyi.

Vaze vaposetolo vavali vawahililile chikuma navyuma vamwene, kaha vambile ngwavo: “Uno katwapwanga nakwivwa hyangu kumichima yetuko omu apwanga nakuhanjika kuli etu mujila, nomu apwanga nakutulumbunwina Visoneka nyi?” (Luka 24:32) Valahile nakukinduluka kuYelusalema kuze vakawanyine vaposetolo navatu veka vanalikungulwila hamwe. Shimbu kanda Keleyopa nasepa lyenyi vaule mujimbu, vevwile veka navahanjika ngwavo: “Chamuchano vene Mwata vanamusangula, kaha alisololanga kuli Shimona!” (Luka 24:34) Kaha Keleyopa nasepa lyenyi vambulwile omu Yesu alisolwele kuli vakiko. Chikupu vene, navakiko vamwene Yesu nameso avo kapu.

Jino halwola kana, Yesu alisolwele kuli vakiko muze mukapete, kaha vosena valikomokelele chikuma. Chuma kana chapwile chachikalu kufwelela mwomwo halwola kana vasokele kuvikolo vyosena hakwivwa woma vaYuleya, oloze vakasumukile Yesu nemana mukachi kavo. Ahanjikile nalizu lyakuunda ngwenyi: “Kuunda chipwenga nayenu.” Oloze vakiko valizuzukilile chikuma. Ngana muze chapwile hakavanga, vakiko “vapwile nakushinganyeka ngwavo vanamono shipilitu.”—Luka 24:36, 37; Mateu 14:25-27.

Hakusaka mangana vatachikize nge chuma vamwene kachapwile chipukupuku chipwe hichilota kahako, oloze hichuma chize chapwile namujimba, Yesu avalwekesele mumavoko enyi nakuvilyachilo vyenyi nakwamba ngwenyi: “Mwomwo ika muli nakwivwila woma, kaha muli nakukakasanyina ika mumichima yenu? Talenu kumavoko ami nakuvilyachilo vyami mangana mutachikize ngwenu yami vene. Ngukwatenu mwivwenga, mwomwo shipilitu kayatwama nanyama navifuwa nge omu munangumono amiko.” (Luka 24: 36-39) Vawahililile chikuma nakulikomokela, oloze vapwile lika nakuhuhwasana.

Hakusaka avakafwe mangana vejive ngwavo chamuchano vene apwile ikiye Yesu, avahulishile ngwenyi: “Muliko navyakulya vimwe hano tahi?” Vamuhanyine ishi wakupepela, kaha alile. Ambile jino ngwenyi: “Awa akiko mazu ami ngwahanjikile kuli enu shimbu ngwapwile nayenu hamwe [shimbu kanda ngufwenga] ngwami, vyuma vyosena vasoneka muJishimbi jaMose namuMazu aVapolofweto namuJisamu vyakutalisa kuli ami vyatela kutesamo.”—Luka 24:41-44.

Yesu akafwile Keleyopa nasepa lyenyi vevwishise Visoneka, kaha alingile nawa ngocho kuli vosena vaze valikungulwile muzuvo, ambile ngwenyi: “Omu mukiko vasoneka ngwavo: Kulishitu mwakahita muvihuli nakukasanguka cheka kuvafu halikumbi lyamuchitatu, kaha mulijina lyenyi mukiko navakambulwila vyakupihilila nakwalumuka chakukonekela jishili muli vaka-mafuchi osena, kuputukila vene kuYelusalema. Enu namukapwa muvinjiho havyuma kanevi.”—Luka 24:46-48.

Halwola kanelu kaposetolo Tomase kapwileko. Hamakumbi akavangijileho, vakwavo vawahililile nakumulweza ngwavo: “Tunamono Mwata!” Tomase avakumbulwile ngwenyi: “Ami kuvanga ngunamono jimbandu jajimbambo mumavoko enyi, nakwingisa munwe wami mujimbandu jajimbambo, nakwingisa nawa livoko lyami kuluhachi lwenyi, mokomoko kangweshi kwitavilako.”—Yowano 20:25.

Omu mwahichile makumbi 8, tumbaji valikungulwilile cheka muzuvo nakusoka kuvikolo, oloze halwola kanelu naTomase kwapwile. Yesu asolokele mukachi kavo namujimba wautu, kaha avamenekele ngwenyi: “Kuunda chipwenga nayenu.” Yesu alumukile nakutala Tomase, kaha ambile ngwenyi: “Ingisa munwe wove omu, kaha tala mavoko ami. Neha nawa livoko lyove kuno ulingise kuluhachi lwami. Litwamine kuhuhwasana, oloze itavila.” Tomase amukumbulwile ngwenyi: “Ove Mwata wami, ove Kalunga kami!” (Yowano 20:26-28) Chikupu vene, Tomase jino etavilile ngwenyi Yesu wamutonyi, kaha nawa himutu wakushipilitu uze apwa muka-kwimanyinako Yehova Kalunga.

Yesu amwambile ngwenyi: “Uno unetavila mwomwo unangumono tahi? Vawahilila vaze vanetavila numba tuhu kavamweneko.”—Yowano 20:29.