Han Domingo, Nisan 16, masurub-on an mga disipulo. Diri nira masabtan kon kay ano nga waray na sulod an lubnganan. (Mateo 28:9, 10; Lucas 24:11) Pagkakulop, hi Cleopas ngan an usa pa nga disipulo binaya ha Jerusalem basi kumadto ha Emaus, nga sobra 11 ka kilometro an kahirayo.

Samtang nagbabaktas, nag-iinistorya hira mahitungod han mga nahitabo. Katapos may estranghero nga inupod ha ira nga nagpakiana: “Ano an iyo gin-iinistoryahan?” Binaton hi Cleopas: “Estranghero ka ba nga naukoy nga nag-uusahan ha Jerusalem amo nga diri ka maaram han nahitatabo didto yana?” Nagpakiana an estranghero: “Ano nga hitabo?”—Lucas 24:17-19.

Binaton hira: “An mahitungod kan Jesus nga Nazareno . . . Naglaom kami nga ini nga tawo ginpili basi talwason an Israel.”—Lucas 24:19-21.

Iginsaysay nira Cleopas an mga nahitabo hito nga adlaw. Nagsiring hira nga may kababayin-an nga kumadto ha lubnganan ni Jesus ngan nakita nira nga waray ito sulod ngan nakita nira mismo an urusahon nga panhitabo—an pagpakita han mga anghel nga nagsiring nga buhi na hi Jesus. Nagsumat hira nga may iba liwat nga kumadto ha lubnganan ngan “pag-abot nira waray na didto hi Jesus, sugad la han ginsiring han kababayin-an.”—Lucas 24:24.

Matin-aw nga nawuwurok an duha nga disipulo kon ano an kahulogan han mga nahitabo. An estranghero nagyakan nga may awtoridad basi tadungon an ira sayop nga panhunahuna nga nakakaapekto ha ira kasingkasing: “O mga tawo nga waray sarabotan ngan diri dayon natoo ha ngatanan nga ginyakan han mga propeta! Diri ba kinahanglan antuson ini han Kristo basi paghimayaon hiya?” (Lucas 24:25, 26) Katapos, iya iginsaysay ha ira an damu nga asoy ha Kasuratan mahitungod han Kristo.

Ha urhi, hira nga tulo inabot hirani ha Emaus. Karuyag han mga disipulo nga mamati pa ha iya, salit ginhawiran nira hiya: “Upod na la ha amon kay tikagab-i na.” Inupod hiya ngan nangaon hira. Han nag-ampo hiya, nagtipik-tipik han tinapay, ngan iginhatag ito ha ira, nakilal-an nira hiya, ngan katapos, waray na nira hiya makita. (Lucas 24:29-31) Yana sigurado na hira nga buhi hi Jesus!

An duha nga disipulo nag-istorya mahitungod han ira eksperyensya: “Diri ba nabantad gud an aton kasingkasing han nakikiistorya hiya ha aton ha dalan, samtang iya iginsasaysay ha aton hin maopay an Kasuratan?” (Lucas 24:32) Nagdagmit hira pagbalik ha Jerusalem, diin nakita nira an mga apostol ngan an iba pa. Antes pa makayakan hi Cleopas ngan an iya kaupod, nagsiring na an iba: “Totoo gud nga an Ginoo ginbanhaw ngan nagpakita kan Simon!” (Lucas 24:34) Katapos, iginsaysay han duha an mahitungod han pagpakita ni Jesus ha ira. Oo, hira liwat mga testigo.

Yana diri makatoo an ngatanan—hi Jesus nagpakita didto ha kwarto! Baga hin imposible ini kay gintrangkahan nira an mga purtahan kay nahadlok hira ha mga Judio. Bisan pa hini, hi Jesus tinindog ha butnga nira mismo ngan kalmado nga nagsiring: “Magmamurayawon unta kamo.” Pero, nahadlok hira. Pariho ha naglabay, “kahuna nira nga espiritu an ira nakikita.”—Lucas 24:36, 37; Mateo 14:25-27.

Basi pamatud-an nga diri hiya bisyon o imahinasyon la, lugod may pisikal hiya nga lawas, iginpakita ni Jesus ha ira an iya mga tiil ngan mga kamot ngan nagsiring: “Kay ano nga nalilisang kamo, ngan kay ano nga nagruruhaduha an iyo mga kasingkasing? Kitaa an akon mga kamot ngan mga tiil, kay ako mismo ini; kapti ngan kitaa ako, kay an espiritu waray unod ngan tul-an, pero ako may-ada sugad han nakikita niyo.” (Lucas 24:36-39) Nalipay gud hira ngan nahipausa pero nagruhaduha la gihapon.

Para mas makombinse hira nga hiya gud hi Jesus, nagpakiana hiya: “May-ada kamo dida makakaon?” Ginkarawat niya an sinugba nga isda ngan ginkaon ito. Katapos nagsiring hiya: “Han kaupod pa ako niyo [antes ako mamatay], nagyakan ako nga kinahanglan matuman an ngatanan nga iginsurat mahitungod ha akon ha Balaud ni Moises ngan ha sinurat han mga Propeta ngan ha Mga Salmo.”—Lucas 24:41-44.

Ginbuligan ni Jesus hi Cleopas ngan an iya kaupod nga masabtan an Kasuratan, ngan ito liwat an iya ginbubuhat para ha ngatanan nga nagkakatirok didto: “An Kasuratan nasiring nga an Kristo mag-aantos ngan babanhawon ha ikatulo ka adlaw, ngan pinaagi han iya ngaran, an mensahe mahitungod han pagbasol isasangyaw tikang ha Jerusalem ngadto ha ngatanan nga nasud, basi mapasaylo an mga sala. Kamo an magpapasamwak hini nga mga butang nga iyo nakita.”—Lucas 24:46-48.

Hito nga higayon, waray didto an apostol nga hi Tomas. Salit han sumunod nga mga adlaw, malipayon nga ginsumatan hiya han iba: “Nakita namon an Ginoo!” Hi Tomas binaton: “Kon diri ko makita an ulat han mga raysang ha iya mga kamot ngan makaptan ito han akon tudlo ngan makaptan an iya kagiliran, diri gud ako matoo.”—Juan 20:25.

Paglabay hin walo ka adlaw, nagkatirok na liwat an mga disipulo ha usa nga balay nga nakatrangka an purtahan, ngan yana kaupod na nira hi Tomas. Nagpakita hi Jesus ha butnga nira nga may pisikal nga lawas ngan nagsiring: “Magmamurayawon unta kamo.” Katapos ginsidngan niya hi Tomas: “Ibutang didi an imo tudlo, ngan kitaa an akon mga kamot. Kapti an akon kagiliran, ngan ayaw na pagruhaduha.” Hi Tomas nagsiring: “Ginoo ko ngan Dios ko!” (Juan 20:26-28) Oo, yana diri na hiya nagruruhaduha nga buhi hi Jesus sugad nga baraan nga persona nga representante ni Jehova nga Dios.

Hi Jesus nagsiring: “Natoo ka ba kay nakita mo ako? Malipayon an mga natoo bisan kon waray makakita.”—Juan 20:29.