Gbɔkuɛ ɔ nɛ Yesu ma gbo ɔ, e de e kaseli ɔmɛ ke: “Se ke a tle mi si kɛ ba wami mi ekohu ɔ, ma sɛ nyɛ hlami kɛ maa ya Galilea.” (Mateo 26:32; 28:7, 10) Enɛ ɔ he ɔ, e kaseli ɔmɛ a kpɛti nihi fuu ho Galilea ya. Se ke a ya lejɛ ɔ, mɛni e sa nɛ a pee?

Benɛ a ngɛ lejɛ ɔ, Petro de bɔfo ɔmɛ a ti nihi ekpa ke: “I yaa wo.” Ni ekpa a tsuo he nɔ ke: “Wɔ tsuo waa kɛ mo maa ya.” (Yohane 21:3) Jamɛ a nyɔ ɔ mi tsuo ɔ, a gbi lo kake ngmelu po. Se benɛ je mi ngɛ tsɔe ɔ, Yesu hia si ngɛ wo ɔ nya, se kaseli ɔmɛ yo we lɛ. Yesu kpa ngmlaa ke: “Ye bimɛ, nyɛ ná nɔ́ ko lo?” A he nɔ ke: “Dɛbi!” Yesu de mɛ ke: “Nyɛɛ fɔ ya a ngɛ lɛ ɔ hiɔ nɔ, nɛ nyɛ maa gbe lo.” (Yohane 21:5, 6) Kɛkɛ nɛ a gbe lo babauu, nɛ a nyɛ we nɛ a gbla ya a po.

Yohane de Petro ke: “Nyɔmtsɛ ɔ nɛ daa si ɔ nɛ.” (Yohane 21:7) Nɔuu nɛ Petro wo e tade ɔ, ejakaa benɛ a ngɛ lo ɔ gbe ɔ, e wui tade. E tu kɛ nɔ wo ɔ mi, nɛ e sile maa pee gugue nyingmi enuɔ kɛ ya wo ɔ nya. Kaseli nɛ a piɛ ngɛ lɛ ɔ mi ɔ gbla ya kɛ e mi lo babauu ɔ bɔɔbɔɔbɔɔ kɛ ba kpo.

Benɛ a su wo ɔ nya a, a na kaa “a ngɔ hã kɛ slɛ la ngɛ lejɛ ɔ, nɛ lo pueɔ si ngɛ nɔ, kɛ abolo hulɔ.” Yesu de mɛ ke: “Nyɛɛ ngɔ lo nɛ nyɛ gbe ɔ eko kɛ ba.” Kɛkɛ nɛ Petro ya gbla ya kɛ e mi lo nguahi 153 ɔ kɛ ba! Yesu de mɛ ke: “Nyɛ ba wo nyɛ nya mi nɔ́ ko.” Se a ti nɔ ko nɔ ko nyɛ we nɛ e pee kã nɛ e bi lɛ ke, “Mɛnɔ ji mo?” ejakaa a na kaa Yesu nɛ daa si ɔ nɛ. (Yohane 21:9-12) Enɛ ɔ ji si etɛne nɛ Yesu je e he kpo kɛ tsɔɔ e kaseli ɔmɛ kaa kuu.

Yesu ha a ti nɔ tsuaa nɔ lo kɛ abolo ke e ye. Kɛkɛ nɛ Yesu hyɛ ya kɛ e mi lo babauu ɔ, nɛ e bi ke: ‘Simon, Yohane bi, anɛ o suɔ mi pe ní nɛ ɔmɛ lo?’ Anɛ Petro bua jɔ lo hɛmi ní tsumi ɔ he pe ní tsumi nɛ Yesu suɔ nɛ a tsu ɔ lo? Petro he nɔ ke: ‘Ee, Nyɔmtsɛ, o le kaa i suɔ mo!’ Kɛkɛ nɛ Yesu de lɛ ke: “Lɛɛ ye to ɔmɛ.”​​—Yohane 21:15.

Yesu bi lɛ ekohu ke: “Simon, Yohane bi, o suɔ mi lo?” Eko ɔ, Petro hɛ mi pee lɛ yaa, se e ha heto kɛ nɔ mi mami ke: ‘Ee, Nyɔmtsɛ, o le kaa i suɔ mo!’ Yesu kpale de kaa bɔ nɛ e de lɛ kekle ɔ ke: “Hyɛ ye to ɔmɛ.”​—Yohane 21:16.

Yesu kpale bi lɛ si etɛne ke: “Simon, Yohane bi, o suɔ mi lo?” Enɛ ɔ ha nɛ Petro bɔni susumi kaa eko ɔ, Yesu he we lɛ yi. Enɛ ɔ he ɔ, Petro de kɛ nɔ mi mami ke: “Nyɔmtsɛ, mo nitsɛ o le nɔ́ tsuaa nɔ́; mo nitsɛ o le kaa i suɔ mo.” Si kake ekohu ɔ, Yesu ma nɔ́ nɛ e suɔ kaa Petro nɛ e pee ɔ nɔ mi. E de ke: “Lɛɛ ye to ɔmɛ.” (Yohane 21:17) Ngɛ anɔkuale mi ɔ, e sa nɛ asafo mi nikɔtɔmahi nɛ a hyɛ Mawu to ɔmɛ a nɔ saminya.

A fi Yesu nɛ a gbe lɛ ngɛ ní tsumi nɛ Mawu tsɔ lɛ ke e ba tsu ɔ he. Lɔ ɔ he ɔ, e de nɔ́ ko nɛ tsɔɔ kaa Petro hu kɛ nɔ́ ko kaa jã maa kpe. Yesu de ke: “O nihe mi ɔ, mo nitsɛ o miaa, nɛ o yaa he tsuaa he nɛ o suɔ. Se ke o ba bwɔ ɔ, o ma wo o nine nɔ, nɛ nɔ kpa maa mia mo; nɛ e kɛ mo maa ya he nɛ o sume kaa o maa ya.” Se kɛ̃ ɔ, Yesu de lɛ ke: “Nyɛɛ ye se.”​—Yohane 21:18, 19.

Petro plɛ kɛ ya hyɛ Yohane, nɛ e bi ke: ‘Nyɔmtsɛ, nɔ nɛ ɔ nɛɛ?’ Mɛni lɛ maa ba bɔfo Yohane nɛ Yesu suɔ lɛ wawɛɛ ɔ nɔ hwɔɔ se? Yesu de ke: “Ke i suɔ kaa e hi si kɛ yaa si ma kpale kɛ ba a, mɛni lɔ ɔ kɔɔ ngɛ o he?” (Yohane 21:21-23) E sa nɛ Petro nɛ ya nɔ nɛ e nyɛɛ Yesu se, nɛ e ko hyɛ ni kpahi. Se kɛ̃ ɔ, Yesu ngɛ tsɔɔe kaa Yohane se maa kɛ ngɛ je mi pe bɔfo ɔmɛ tsuo, nɛ e maa na Yesu nɛ ma kaa matsɛ ngɛ nina mi.

Ngɛ anɔkuale mi ɔ níhi fuu ngɛ nɛ Yesu pee nɛ ke a ke a maa ngma a, e be womihi fuu mi yae.