Apostolonakapamp tantachaskäna uka qhepa arumajja, Jesusajj “jiwatat jaktayatäjjä uka qhepatjja, jumanak nayraw Galilear saräjja” sasaw jupanakar säna (Mateo 26:32; 28:7, 10). Ukhamajj walja arkirinakapaw Galilear sarapjjäna, ukampis ¿kunsa ukan lurapjjañapäna?

Ukanjja Pedrojj akham sasaw mayni sojjta apostolonakarojj säna: “Chawlla katuriw nayajj sarä” sasa. Sojjtanpachaw sapjjarakïna: “Nanakajj jumamp chikaw sarapjjarakëjja” sasa (Juan 21:3). Ukampis uka arumajj janiw kunsa katupkänti. Qhanjtanjjäna ukhajja, Jesusajj qota thiyanwa uñstäna, ukampis jupanakajj janiw Jesusätap amuyapkänti. Jesusajj akham sasaw artʼäna: “Wawanaka, ¿janejjay jumanakan kuna manqʼañas utjkitejja?” sasa. Jupanakajj akham sapjjänwa: “¡Janiw utjapkituti!” sasa. Jesusajj sarakïnwa: “Chawlla katuñ qänjja botet kupi toqer jaqontapjjam, katupjjätawa” sasa (Juan 21:5, 6). Jupanakajj walja chawllanak katupjjäna, janiw chawlla katuñ qänsa apsurjamäpkänti.

Juanajj akham sasaw Pedror säna: “¡Jupajj Tatiturakisä!” sasa (Juan 21:7). Jankʼakiw Pedrojj chawlla katuñatak apsuskäna uka isip uskusïna. Umar thoqontasajj niya 90 metronak qota thiyar mistüna. Botenkirinakajj kʼachatak jupar arkapjjäna, walja chawllanakan qänas qatattʼataw mistupjjarakïna.

Waña oraqer mistupjjäna ukhajja, “kʼillimampi nakhaskir ninwa ukan uñjapjjäna, uka patjjarojj chawllanakaw uchatäskäna, tʼantʼas utjarakïnwa”. Jesusajj jupanakar akham sänwa: “Jichhak katunipkta uka chawllanakat mä qhawqha apanipjjam” sasa. Pedrojj waña oraqeruw qäna qatatsunïna, ¡153 jachʼa chawllanakaw ukan utjäna! “Jutapjjam, manqʼasipjjam” sasaw Jesusajj jupanakar säna. Jesusätap amuyasajja, discipulonakat janiw maynis “¿jumajj khitïtasa?” sasajj jisktʼkänti (Juan 21:9-12). Ukampejj kimsa kutiw Jesusajj tantachtʼat discipulonakapar uñstäna.

Jesusajj sapa mayniruw chawllampi tʼantʼampi churäna. Ukatjja inas Jesusajj chawllanakar uñtasajj Pedror akham jisktʼchïna: “Simón, Juanan yoqapa, ¿jumajj akanakat sipansa jukʼampit nayar munasista?” sasa. Jesusajja chawlla katuñ negociot Pedrotakejj nayrankäna, jan ukajj kuntï Jesusajj lurañap munäna uk lurañach nayrankäna ukwa yatiñ munäna. Pedrojj akham sänwa: “Jïsa, Tata, jumajj yatisktawa, nayajj jumar munassmawa” sasa. Ukatwa Jesusajj jupar säna: “Jiskʼa ovejanakajar manqʼayarapita” sasa (Juan 21:15).

Jesusajj mayampiw jupar jisktʼäna: “Simón, Juanan yoqapa, ¿jumajj nayar munasistati?” sasa. Pedrojj inas jan sum amuykchïnti, ukampis taqe chuymaw akham jaysäna: “Jïsa, Tata, jumajj yatisktawa, nayajj jumar munassmawa” sasa. Jesusajj qalltanjamarakiw akham säna: “Jiskʼa ovejanakajar awatirapita” sasa (Juan 21:16).

Jesusajj “Simón, Juanan yoqapa, ¿jumajj nayar munasistati?” sasin mayampiw jisktʼäna, ukampejj kimsa kutëjjänwa. Uka horasanjja, Jesusajj Pedron taqe chuyma arkatapat pächaskaspas ukham inas jupajj amuychïna. Ukatwa Pedrojj wali chʼamampi akham säna: “Tata, jumajj taqe kunwa yattajja, nayajj jumar munassma uksa sumwa yatiraktajja” sasa. Jesusajj mayampiw Pedror akham säna: “Jiskʼa ovejanakajar manqʼayarapita” sasa (Juan 21:17). Cheqansa khitinakatejj pʼeqtʼapki ukanakajj Diosan tamapankirinakarojj yanaptʼapjjañapawa.

Kuntï Diosajj luram siskäna uk luripanwa Jesusarojj kantuntapjjäna, jiwayapjjarakïna. Jichhasti kunjamsa Pedrojj jan walinakan uñjasirakini ukwa qhanañchäna. Jesusajj jupar akham sänwa: “Jumajj waynäskayäta ukhajja, juma pachpaw isthapisiyätajja, kawkirutï sarañ munkayäta ukaruw sarayätajja. Chuymanëjjäta ukhajja, ampar loqatatasaw yaqhamp isiyasjjäta, kawkirutï jan sarañ munkta ukaruw jupajj aparakïtam” sasa. Ukampirus Jesusajj akham sasaw chʼamañchtʼäna: “Jumajj nayar arkaskakita” sasa (Juan 21:18, 19).

 Pedrosti Juanar uñtasaw akham jisktʼäna: “Tata, ¿jupasti?” sasa. ¿Kunas Jesusan munat apostolopar pasañapäna? Jesusajj sänwa: “Munañajächejja, nayan jutañajkamajj jupajj jakaskaspawa, ¿juman uk yatiñamajj wakisiti?” sasa (Juan 21:21-23). Mayninakat llakisiñat sipansa, Pedrojj jan jitheqtasaw Jesusar arkaskakiñapäna. Ukampis Jesusajj mayni apostolonakat sipansa Juan apostolojj walja maranakaw jakani sasaw säna, juparakiw Jesusarojj Reyjam jutaskir mä visionan uñjañapäna.

Cheqansa Jesusajj jukʼampinak luräna, ukajj qellqat rollonakatsa jilaraspawa.