I kôkôa a bi sôk tégbaha ni baôma bé, Yésu a bi kal bo le: “Ngéda m’a tuglana, m’a bôk bé i bisu nyoo i Galiléa.” (Matéô 26:32; 28:7, 10) Nano ngandak banigil yé i nke nyoo, ndi kii ba nke boñ i Galiléa?

I mbus ndék ngéda, Pétrô a nkal baôma basamal le: “Me nke i lop tjobi.” Bo basamal ba ntimbhe nye le: “Yak bés di nke lôñni we.” (Yôhanes 21:3) Ba ntégbaha u wonsôna ibabé gwel yom. Ndi kiki kel i nkahal ye, Yésu a mpam i ngwañ lép, ndi ba nyimbe bé le nye nu. Yésu a nsébél bo ni ngui, a kal le: “A bon, baa ni gwé yom i je? Ba ntimbhe nye le: “To!” Yésu a nkal bo le: “Leña mbunja i pes walôm i môñgô, ndi n’a gwel yom.” (Yôhanes 21:5, 6) Ba ngwel ngandak tjobi kayéle ba nla bé to nimbil mbunja.

Yôhanes a nkal Pétrô le: “Nwet nu!” (Yôhanes 21:7) Kunda yada, Pétrô a nleñba mbot a bi héya ngéda a bé lop. A kwoo i tuye a hok yom kiki bo môm bôô ma méta ipam i ngwañ. Baa bape ba nlo beñee ni môñgô mu kiki ba nimbil mbunja nyonok ni tjobi.

Ba mbol bañ i ngwañ tuye, ba ntehe “juu li makalak ni tjobi mu ngii lôñni bret.” Yésu a nkal bo le: “Ni lona ndék mu tjobi ni ntip gwel.” Pétrô a nyibil mbunja i i gwé 153 i mbôm tjobi! Yésu a nkal bo le: “Loga i je.” To wada ikété yap a gwé bé makénd i bat le: “U yé njee?” Inyule ba nyi le Yésu nu. (Yôhanes 21:9-12) Hala a yé ngélé yônôs aa le a mpémél ngandak banigil.

Yésu a nti hiki wada wap bret ni hiobi le a je. I mbus, kiki a mbéñge tjobi ba nlop, a mbat le: “A Simôn, man Yôhanes, baa u ngwés me iloo bini?” Baa Pétrô a nlôôha gwés bôlô nlop iloo nson Yésu a gwé ngôñ i ti nye? Pétrô a ntimbhe nye le: “Ñ, a Nwet, u nyi le me ngwés we.” Jon Yésu a nkal nye le: “Jés bon bem ba mintômba.”​—Yôhanes 21:15.

Yésu a ntiimba bat nye le: “A Simôn, man Yôhanes, baa u ngwés me?” Bebek hala a hélés Pétrô, jon ni maliga a ntimbhe le: “Ñ, a Nwet, u nyi le me ngwés we.” Yésu a nti nlélém ndimbhe, a nkal nye le: “Tééda bon bem ba mintômba.”​—Yôhanes 21:16.

Inyu ngélé nyônôs aa Yésu a mbat nye le: “A Simôn, man Yôhanes, baa u ngwés me?” Nano, Pétrô a yé badba too Yésu a mbôdôl bé nye ñem. Ni ngui, Pétrô a nkal le: “A Nwet, u nyi mam momasôna; u nyi le me ngwés we.” Yésu a ntiimba yigye jam Pétrô a nlama boñ: “Jés bon bem ba mintômba.” (Yôhanes 21:17) Ñ, i bet ba nkena ntôñ ba nlama yoñ ngéda ni bet ba yé i bémba i Djob.

Ba bi gwel Yésu, ba nol nye inyule a bi yônôs nson Djob a bi ti nye. A nkal nano le yak Pétrô a ga bana nlélém lisuk. Yésu a nkal le: “I ngéda u bé mañge wanda, u bé haba mbot yoñ wemede, u kenek i homa u ngwés. Ndi ngéda w’a un, w’a sambal moo moñ, mut numpe nyen a ga ha we mbot, a kena ki we i homa u ngwés bé.” Nano, Yésu a nkal nye le: “Noñ me ibabé waa.”​—Yôhanes 21:18, 19.

Pétrô a mbéñge ñôma Yôhanes, a bat Yésu le: “A Nwet, y’a ba lelaa inyu mut nunu?” Ni maliga bimbe bilôl bi mbem ñôma nu Yésu a nlôôha gwés? Yésu a ntimbhe nye le: “Ibale sômbôl yem inyu yé i yé le a yén i niñ letee me lo, hala a mbéñge we ni kii?” (Yôhanes 21:21-23) Pétrô a nlama noñ Yésu ibabé i yéñ yi i yom bana bape ba mboñ. Ndi ni bini bibuk Yésu a ñunda le Yôhanes nyen a ga sôk wo, a ga kôhna ki yiinda i malo ma Yésu kiki Kiñe.

I pot maliga, Yésu a bi boñ ngandak mam ipe, i i nla bé kola ikété ngandak bikaat.