Tingki di kamar parginjang Jesus dohot angka apostelna, didok ibana ma, “Dung hehe ahu, na laho ma ahu manjoloani hamu tu Galilea.” (Mateus 26:32; 28:7, 10) Alani i, laho ma angka siseanna tu Galilea. Alai ndang diboto nasida aha na ingkon diulahon nasida disi.

Didok si Petrus ma tu onom apostel na asing, “Naeng laho ma ahu manangkup dengke.” Didok nasida ma, “Dohot ma hami.” (Johannes 21:3) Alai ndang adong dapot ni nasida. Dung naeng torang ari, jongjong ma Jesus di topi ni laut i. Alai ndang ditanda angka sisean manang na ise i. Didok Jesus ma, “Adong do siallangon di hamu anaha?” Dialusi nasida ma, “Ndang adong!” Didok Jesus ma muse, “Sampakkon hamu ma jala i tu siamun ni parau i asa dapotmuna dengke.” (Johannes 21:5, 6) Dapot ni nasida ma godang dengke sampe gok jala i.

Didok si Johannes ma tu si Petrus, “Tuan do i!” (Johannes 21:7) Pintor dipangke si Petrus ma abit luarna, ai ndang dipangke i tingki manangkup dengke. Dung i manimbung ma ibana tu laut jala marlange tu topi ni laut i. Hira-hira 90 meter ma daona. Na asing markapal mangihuthon sian pudi mamboan jala na marisi gok dengke.

Dung sahat di topi ni laut i, diida nasida ma “adong dengke dohot roti di atas ni gara”. Didok Jesus ma, “Boan ma deba tuson dengke na dapotmuna i.” Ditarik si Petrus ma jala na marisi 153 ekor dengke na balga. Didok Jesus ma muse, “Ro ma hamu mangan!” Alai ndang barani nasida manungkun ise do ibana. Ai diboto nasida do i Jesus. (Johannes 21:9-12) On ma na patoluhalihon dipatuduhon Jesus dirina tu godang sisean.

Dibagihon Jesus ma roti dohot dengke, jala mangan ma nasida. Dung i diida Jesus ma tu dengke na ditangkup nasida i. Naeng botoon ni Jesus do dia na rumingkot di si Simon. Didok ma, “Simon, anak ni si Johannes, humolong do roham tu ahu sian apala angka on?” Dialusi si Petrus ma, “Olo Tuan, diboto ho do holong ni rohangku tu ho.” Didok Jesus ma tu ibana, “Lehon ma mangan anak ni biru-birungki.”​—Johannes 21:15.

Disungkun Jesus ma muse, “Simon, anak ni si Johannes, holong do roham tu ahu?” Gabe sungkun-sungkun ma roha ni si Petrus, alai didok ibana do, “Olo Tuan, diboto ho do holong ni rohangku tu ho.” Didok Jesus ma muse, “Parmahani ma anak ni biru-birungki.”​—Johannes 21:16.

Disungkun Jesus ma muse patoluhalihon, “Simon anak ni si Johannes, holong do roham tu ahu?” Gabe dirimpu si Petrus ma na so porsea Jesus tu ibana. Didok ma, “Tuan, saluhutna do diboto ho. Diboto ho do holong ni rohangku tu ho.” Didok Jesus ma muse sahali nai, “Lehon ma mangan anak ni biru-birungki.” (Johannes 21:17) Tangkas ma, ingkon diparrohahon angka parmahan do biru-biru ni Debata.

Diuhum mate do Jesus ala mangulahon lomo ni roha ni Debata. Dipaboa Jesus ma tu si Petrus na ingkon songon i do taononna. Didok Jesus ma, “Tingki poso ho, ho sandiri do na mamangkehon bajum jala laho do ho manang na tudia lomo ni roham. Alai molo dung matua ho, lehononmu ma tanganmu jala halak ma mamangkehon bajum, boanonna ma ho tu inganan na so dihalomohon roham.” Nang pe songon i, didok Jesus do, “Tongtong ma ihuthon ahu.”​—Johannes 21:18, 19.

Aha do na laho masa tu apostel Johannes? Disungkun si Petrus ma, “Boha do taringot tu ibana Tuan?” Dialusi Jesus ma, “Molo  lomo rohangku mangolu ibana sahat tu na ro ahu, boasa pola pingkirhononmu i?” (Johannes 21:21-23) Aha pe na diulahon na asing, ingkon tongtong do si Petrus mangihuthon Jesus. Alai hata ni Jesus on patuduhon, umleleng do mangolu apostel Johannes sian apostel na asing. Jala na laho dilehon do parnidaan tu ibana taringot haroro ni Jesus di Harajaonna.

Godang dope na diulahon Jesus. Alai molo sude disurathon, ndang siat be i di portibi on.