Mu nshita ya cungulo kabili pa bushiku bwa kulekeleshako ubo Yesu aali na batumwa bakwe, abebele ukuti: “Ilyo nkabuuka, nkamutangilila ku Galili.” (Mateo 26:32; 28:7, 10) E ico abasambi bakwe abengi baile ku Galili, lelo tabaishibe ico baali no kucita.

Pa nshita imo, Petro aebele abatumwa bambi 6 ati: “Ine nalaya ku kwipaya isabi.” Abatumwa bonse 6 bayaswike abati: “Na ifwe twalaya nobe.” (Yohane 21:3) Ubushiku bonse, tabaiketepo isabi nangu limo. Ilyo bwaile buleca, Yesu alimoneke ku mulundu, lelo abatumwa tabaishibe ukuti e o. Yesu abepwishe ati: “Mwe bana, bushe namukwata ifya kulya?” Bamwaswike abati: “Awe!” Na o abebele ati: “Teyeni isumbu ku kulyo kwa bwato, kabili mulesangako isabi.” (Yohane 21:5, 6) Baliikete isabi ilingi sana kabili balifililwe no kukula isumbu.

Yohane aebele Petro ati: “Ni Shikulu!” (Yohane 21:7) Ilyo Petro aumfwile fye ukuti ni shikulu, afwele ica kufwala cakwe ica ku muulu, ico afuliile ilyo baleipaya isabi no kuipoosa pali bemba kabili aowele amamita 90 mpaka afika ku mulundu. Lyena abatumwa abashele mu bwato balikonkele, uku ninshi baletinta ne sumbu ilyaiswilemo isabi.

Ilyo bafikile ku mulundu, bamwene “pali umulilo wa malasha, ne sabi nalibikwapo, no mukate.” Lyena Yesu atile: “Letenipo isabi ilyo mwaipaya nomba line.” Petro akulile isumbu umwali isabi ilikalamba ilyali 153! Yesu abebele ati: “Iseni mulye.” Tapali nangu umo pa basambi uwamwipwishe ati: “Ni mwe bani?” pantu balishibe ukuti ni Yesu. (Yohane 21:1-25) Uyu wali e muku walenga butatu uo amoneke ku basambi bakwe.

Yesu abapeele umukate ne sabi pa kuti balye. Yesu aloleshe isabi ilyo baikete e lyo aipusha ati: “Simone mwana Yohane, bushe walintemwa ukucila isabi ili?” Bushe Petro alitemenwe sana ukushitisha isabi ukucila umulimo uo Yesu alefwaya ukuti alebomba? Petro ayaswike Yesu ati: “Ee, mwe Shikulu, mwalishiba ukuti nalimutemwa.” E ico Yesu atile kuli ena: “Liisha utwana twandi utwa mpaanga.”—Yohane 21:15.

Yesu aipwishe Petro umuku walenga bubili ati: “Simone mwana Yohane, bushe walintemwa?” Petro alipapile ukuti bamwipwishe imiku ibili, e co amwaswike ati: “Ee, mwe Shikulu, mwalishiba ukuti nalimutemwa.” Yesu amwebele na kabili ati: “Cema utwana twandi.”—Yohane 21:16.

Yesu aipwishe Petro umuku walenga butatu ati: “Simone mwana Yohane, bushe walintemwa?” Petro atontonkenye ukuti nalimo Yesu aletwishika ukuti taali uwa cishinka, e ico ayaswike na kabili ati: “Mwe Shikulu, mwalishiba ifintu fyonse; mwalishiba ukuti nalimutemwa.” Yesu na kabili aebele Petro ifyo alingile ukulacita. Atile: “Liisha utwana twandi utwa mpaanga.” (Yohane 21:17) Kanshi twamona ukuti bonse abakwata umulimo wa kutungulula icilonganino bafwile ukulacema impaanga sha kwa Lesa.

Yesu balimwikete no kumwipaya pantu alebomba umulimo wa kwa Lesa. Yesu aebele Petro ukuti na o, baali no kumwipaya pa mulandu wa kubomba umulimo wa kwa Lesa. Atile: “Ilyo wali umwaice, waleifwalila we mwine no kuya uko ulefwaya. Lelo ilyo ukakota, ukalatambalika amaboko yobe no muntu umbi akalakufwika no kukutwala uko ushilefwaya.” Yesu amwebele no kuti: “Ulenkonka.”—Yohane 21:18, 19.

Ilyo Petro amwene umutumwa Yohane, aipwishe Yesu ati: “Mwe Shikulu, ngo yu ena?” Petro alefwaya ukwishiba icali no kucitikila umutumwa uo Yesu atemenwe sana. E ico Yesu ayaswike ati: “Nga nafwaya ukuti ekale mpaka nkese, bushe mulandu kuli iwe?” (Yohane 21:21-23) Petro alingile fye ukulabomba umulimo uo Yesu amwebele ukwabula ukulailinganya kuli bambi. Na kuba, ico Yesu alelandapo ca kuti Yohane taali no kufwa bwangu pa batumwa bambi kabili e o Yesu aali no kulanga icimonwa ca fyo akesa mu Bufumu bwakwe.

Kanshi kwaliba ifintu ifingi ifyo Yesu acitile, ifishali no kukumana mu mabuuku nga ca kuti fyalilembelwe.