Ngô’é a nga su’ulane lôt a minlômane mié, Yésus a nga jô mie na: “Éyoñe me wômôya, ma ye ke mia ôsu e Galilée.” (Matthieu 26:32; 28:7, 10, Mfefé Nkôñelan) Abui minlôman da té fo’o dulu a ke wôé, ve jé ba ke bo e Galilée?

Ane éyoñe ja lôt, Pierre a jô minlôman misamane na: “Me ake wôé kos.” Besaman bete ba yalan a jô nye na: “Bia be wo bi ake.” (Jean 21:3) Ba yobe fo’o ngum alu ve teke bi jôm. Nté tyé ja lende, Yésus a kui mfôm atok, ve minlômane mié mi teke yemelane na a ne nye. Nde Yésus a jô be na: “A bongô, ye mi ne jôme ya di?” Ba yalane nye na: “Momo.” Nde Yésus a jô be na: “Yaan avot mfa’ éfunga ya mbo nnôm wôna mi aye wôé.” (Jean 21:5, 6) Ba wôé fo’o angôndô ya abui kos aval é ne na be kate bete mevot.

Jean a jô Pierre na: “Tate le.” (Jean 21:7) Été été, Pierre a jaé ngômesane jé a nga va asu na a yope kos, a wua nyule jé ôsôé. A jok a kui beméta 90 asu na a ke kui e kindik. Bôte bevo’o ba zu ôte’etek a éfunga amu ba zu ba limeti avot é ne jalane a kos.

Éyoñe ba kui kindik, ba yen ‘ma’a me nduane wôé, kos é bô me yôp, a fembé.’ Yésus a jô be na: “Za’ane kos mi ate wôé.” Nde Pierre a so avot é bili beta bekos 153! Yésus a jô na: “Zaka dian.” Môt a nji bi ngule ya sili nye na, “Ô ne za?” amu bese be nga yeme na a ne Yésus. (Jean 21:10-12) Éyoñe lale ji a yené e be beyé’é bé be to angôs.

Yésus a ve môt ase fembé a kos na a di. Mvuse ya valé, éko éziñ a fombô’ô kos be ndôme wôé nde a jô na: ‘A Simon, mone Jean, ye wo nye’e ma a dañe ésaé ji?’ Ye Pierre a dañe nye’e ésaé ñyobane kos a dañ ésaé Yésus a yi na a li’i a bo? Nde Pierre a yalane na: “Ôwé, a Nti, wo yeme na ma nye’e wo.” Ajô te Yésus a jô nye na: “Ba’ale’e mintômba miam.”​—Jean 21:15, Mfefé Nkôñelan.

Yésus ve beta sili nye na: “A Simon mone Jean, ye wo nye’e ma?” Éko éziñ Pierre a ne fe’e ne vema, nde a yalane nye a nlem ôse na: “Ôwé a Nti, wo yeme na ma nye’e wo.” Yésus a beta nye jô na: “Ba’ale’e mintômba miam.”​—Jean 21:16, Mfefé Nkôñelan.

Yésus a beta sili nye éyoñe lale na: “A Simon mone Jean, ye wo nye’e ma?” Éko éziñ Pierre a taté na a sili émien nge Yésus a to fo’o ndi a nye. A jô nye a ngul ése na: “A Nti, wo wo yeme mame mese, ke womien wo kôme fe yeme na ma nye’e wo.” Yésus a beta yemete jame Pierre a yiane bo a jô’ô nye na: “Ba’ale’e mintômba miam.” (Jean 21:17) Ôwé, bôte ba wulu akônda ba yiane jeñ a ngul ése na be ba’ale’e ba Zambe a dutu abemba dé.

Be nga tibili a wôé Yésus amu a mbe a bo’o ésaé Zambe a nga ve nye. Éyoñe ji, Yésus liti na Pierre a ye fe man avale da. Yésus a jô na: “Éyoñ ô nga to mongô, ô nga jaé ngômesan nyôle jôé, a ke vôm ô nga nye’e ô kelek: ve éyoñ wo aye bo mvendé, wo aye same mo, a môt mfe a ye jalé wo ngômesan a ke wo vôm ô ne te nye’e ô kelek.” Ve Yésus a ve nye melebe ma: “[Kele ôsu a] tôñe ma.”​—Jean 21:18, 19.

Pierre a yene nlôman Jean nde a sili na: “A Nti, nyuna nye a ye bo aya?” Nge na jé ja ye kui nlôman Yésus a dañe nye’e? Yésus a jô nye na: “Nge me aye me’ete na a ye tabe akekui éyoñ me aye zu, ô ne za ajô été?” (Jean 21:21-23) Pierre a yiane tôñe Yésus teke fombô bôte bevok. Ve da, Yésus a liti a zene ya bifia bite na Jean a ye tabe a dañe minlôman mivo’o a bi fe ñyenan Yésus ane Njôô.

Nya ajôô a ne na, abim mame mese Yésus a nga bo é nga ye bo te bi vôm a ne yiane bekalate be nga ye tiliban.