Naagbee gbɛkɛ dani abaagbe Yesu lɛ, ekɛɛ ebɔfoi lɛ akɛ: “Shi kɛ́ atee mi shi lɛ, matsɔ nyɛhiɛ kɛya Galilea.” (Mateo 26:32; 28:7, 10) Amrɔ nɛɛ, esɛɛnyiɛlɔi lɛ babaoo etee Galilea, shi mɛni sa akɛ amɛfee yɛ jɛmɛ?

Gbi ko lɛ, Petro kɛɛ bɔfoi lɛ ateŋ mɛi ekpaa akɛ: “Miiya wuo.” Amɛ fɛɛ amɛkɛɛ lɛ akɛ: “Wɔ hu wɔkɛ bo miiya.” (Yohane 21:3) Nakai nyɔɔŋ lɛ mli fɛɛ lɛ, amɛgbeee nɔ ko. Be ni je miihe atsɛre lɛ, Yesu bapue yɛ ŋshɔ lɛ naa, shi amɛyooo lɛ. Yesu bi amɛ akɛ: “Bii, ani nyɛyɛ nɔ ko ni nyɛbaaye?” Amɛhã hetoo akɛ: “Dabi!” Yesu kɛɛ amɛ akɛ: “Nyɛfɔ̃a yaa lɛ yɛ lɛlɛ lɛ ninejurɔgbɛ ni nyɛbaaná nɔ ko.” (Yohane 21:5, 6) Amɛgbe loo babaoo aahu akɛ, amɛnyɛɛɛ yaa lɛ po amɛgbala.

Yohane kɛɛ Petro akɛ: “Nuŋtsɔ lɛ ni!” (Yohane 21:7) Oya nɔŋŋ ni Petro kɔ etade nɔhaanɔ lɛ ewo ni efĩ mli, ejaakɛ ejie efɔ̃ shi. Etu egbee ŋshɔ lɛ mli, ni esere aaafee mitai 90 kɛba kpete. Mɛi ni shwɛ yɛ lɛlɛ lɛ mli lɛ gbala yaa ni loo eyi lɛ obɔ lɛ fiofio kɛnyiɛ sɛɛ.

Be ni amɛkpeleke lɛ, amɛna “ŋai ni akɛshɛre la ni loi jwere nɔ, kɛ aboloo.” Yesu kɛɛ amɛ akɛ: “Nyɛkɛ loi ni nyɛgbe bianɛ lɛ eko abaa.” Petro yagbala yaa lɛ ni loi agboi 153 eyi mli obɔ lɛ kɛba ŋshɔ lɛ naa! Yesu kɛɛ amɛ akɛ: “Nyɛbaa, nyɛbayea nii.” Amɛteŋ mɔ ko náaa ekãa kɛbi lɛ akɛ: “Namɔ ji bo?” ejaakɛ amɛle akɛ Yesu ni. (Yohane 21:10-12) Enɛ ji shii etɛ nɔ ni ejieɔ ehe kpo etsɔɔ kaselɔi lɛ akɛ kuu.

Yesu hã amɛteŋ mɔ fɛɛ mɔ aboloo kɛ loo koni eye. No sɛɛ be ni eeenyɛ efee akɛ eekwɛ loi ni agbe lɛ, ebi Petro akɛ: “Simon, Yohane bi, ani osumɔɔ mi fe enɛɛmɛi?” Ani Petro sumɔɔ wuoyaa nitsumɔ lɛ kwraa fe nitsumɔ ni Yesu miitao ni etsu lɛ? Petro hã lɛ hetoo akɛ: “Hɛɛ, Nuŋtsɔ, ole akɛ midɔɔ ohe.” No hewɔ lɛ Yesu kɛɛ lɛ akɛ: “Lɛɛ migwantɛŋbii lɛ.”​—Yohane 21:15.

Yesu bi lɛ shi kome ekoŋŋ akɛ: “Simon, Yohane bi, ani osumɔɔ mi?” Ekolɛ Petro hiɛ fee lɛ yaa, no hewɔ lɛ ekɛ hiɛdɔɔ hã lɛ hetoo akɛ: “Hɛɛ, Nuŋtsɔ, ole akɛ midɔɔ ohe.” Nɔ ni Yesu kɛɛ lɛ kɛnyiɛ sɛɛ lɛ tamɔ nɔ ni ekɛɛ lɛ momo lɛ nɔŋŋ, ekɛɛ akɛ: “Kwɛmɔ migwantɛŋi bibii lɛ tamɔ tookwɛlɔ feɔ lɛ.”​—Yohane 21:16.

Yesu bi lɛ nɔ ni ji shii etɛ nɔ akɛ: “Simon, Yohane bi, ani odɔɔ mihe?” Agbɛnɛ lɛ, ekolɛ Petro miisusu kɛji Yesu heɔ lɛ eyeɔ lo. Petro wie kɛ nɔmimaa akɛ: “Nuŋtsɔ, ole nibii fɛɛ; ole akɛ midɔɔ ohe.” Shi kome ekoŋŋ lɛ, Yesu ma nɔ ni sa akɛ Petro afee lɛ nɔ mi akɛ: “Lɛɛ migwantɛŋi bibii lɛ.” (Yohane 21:17) Hɛɛ, esa akɛ mɛi ni nyiɛɔ hiɛ lɛ alɛ mɛi ni akɛbaa Nyɔŋmɔ gwantɛŋi atsũ lɛ mli lɛ.

Akɛni Yesu tsu nitsumɔ ni Nyɔŋmɔ fã lɛ akɛ etsu lɛ hewɔ lɛ, afimɔ lɛ ni agbe lɛ. Agbɛnɛ lɛ, ehã Petro le akɛ shihilɛ ni tamɔ nakai nɔŋŋ baaba enɔ. Yesu kɛɛ lɛ akɛ: “Be ni oji oblanyo lɛ, bo diɛŋtsɛ owoɔ otade ni onyiɛɔ kɛyaa he ni osumɔɔ. Shi kɛ́ ogbɔ lɛ obaakpã oniji amli ni mɔ kroko baawo bo atade ni ebaahiɛ omli kɛya he ni osumɔɔɔ.” Kɛ̃lɛ, Yesu wo lɛ hewalɛ akɛ: “Yaa nɔ onyiɛ misɛɛ.”​—Yohane 21:18, 19.

Be ni Petro hiŋmɛi gba bɔfo Yohane nɔ lɛ, ebi Yesu akɛ: “Nuŋtsɔ, shi mɔ nɛ hu?” Hɛɛ, mɛni baaba bɔfo ni Yesu dɔɔ ehe waa lɛ nɔ wɔsɛɛ? Yesu hã lɛ hetoo akɛ: “Kɛ́ miisumɔ akɛ ehi shi kɛyashi maba lɛ, mɛni no kɔɔ yɛ ohe?” (Yohane 21:21-23) Esa akɛ Petro anyiɛ Yesu sɛɛ, ni ekahã nɔ ni mɛi krokomɛi baafee lɛ miigba enaa. Ni kɛ̃lɛ, Yesu miitsɔɔ akɛ Yohane wala sɛɛ baatsɛ fe bɔfoi krokomɛi lɛ fɛɛ, ni akɛ ba ni Yesu baaba akɛ Maŋtsɛyeli lɛ nɔ Maŋtsɛ lɛ he ninaa baahã lɛ.

Yɛ anɔkwale mli lɛ, nibii krokomɛi hu yɛ ni Yesu fee ni fa babaoo bɔ ni wolokpoi nyɛŋ ato.