To whèlẹkọ godo tọn he Jesu yizan hẹ apọsteli etọn lẹ, e dọna yé dọmọ: “To whenue yẹn na ko yin finfọn godo, yẹn na jẹnukọnna mì yì Galili.” (Matiu 26:32; 28:7, 10) Todin, hodotọ etọn susu zingbejizọnlin yì finẹ, amọ́ etẹwẹ yé dona yì wà to Galili?

To ojlẹ de mẹ, Pita dọna ṣidopo to apọsteli lẹ mẹ dọmọ: “Yẹn jei whèvi hù gbé.” Yé omẹ ṣidopo lọ lẹ gblọn dọmọ: “Mílọsu na hodo we ga.” (Johanu 21:3) To ozán lọ blebu mẹ, yé ma wle nudepope. Dile ai to hinhọ́n, Jesu sọawuhia to ohù lọ tó, ṣigba yé ma yọ́n mẹhe wẹ. Jesu dawhá dọmọ: “Yọpọ lẹ emi, mì ma tindo nudepope nado dù, kavi e ma yin mọ wẹ?” Yé gblọn dọmọ: “Mọwẹ!” Jesu dọna yé dọmọ: “Mì yìn odọ̀ lọ do adusiwhé tọjihun lọ tọn, mì nasọ mọ delẹ.” (Johanu 21:5, 6) Yé wle whèvi susu sọmọ bọ yé ma tlẹ sọgan dọ̀n odọ̀ yetọn biọ ohún mẹ.

Johanu dọna Pita dọmọ: “Oklunọ wẹ!” (Johanu 21:7) Pita yawu ze awù aga tọn etọn he e de dai to whenue e to whèvi wle lọ do. E biọ ohù mẹ bo lìnsin na nudi mẹtlu 90 wá agé. Mẹhe pò to tọjihun lọ mẹ lẹ hodo e dẹẹdẹ bo to odọ̀ he gọ́ na whèvi lọ dọ̀n.

To whenue yé jẹage, yé mọ “akán-miyọ́n to finẹ bọ whèvi yin titẹ́ do e ji, gọna akla.” Jesu dọmọ: “Mì hẹn delẹ to whèvi he mì ṣẹṣẹ wle lọ lẹ mẹ wá.” Pita dọ̀n odọ̀ lọ, ehe mẹ whèvi daho 153 tin te! Jesu dọmọ: “Mì wá dù núdùdù afọnnu tọn mìtọn.” Dopo tata to yé mẹ ma tindo adọgbigbo nado kanse e dọ, “Mẹnu wẹ hiẹ yin?” na yé mọdọ Jesu wẹ. (Johanu 21:9-12) Whla atọ̀ntọ die he e sọawuhia devi lẹ taidi pipli de.

Jesu yí akla po whèvi po na dopodopo yetọn nado dù. Enẹgodo, vlavo dile e pannukọn whèvi he yin wiwle lọ lẹ wẹ e kanse dọmọ: “Simọni visunnu Johanu tọn, be hiẹ yiwanna mi hú ehelẹ ya?” Be azọ́n whèhuhu tọn lọ yin nujọnu na Pita hú azọ́n he Jesu jlo dọ e ni wà lọ wẹ ya? Pita gblọn dọmọ: “Mọwẹ, Oklunọ, hiẹ yọnẹn dọ yẹn tindo owanyi na we.” Enẹwutu, Jesu dotuhomẹna ẹn dọmọ: “Nọ na núdùdù lẹngbọvu ṣie lẹ.”—Johanu 21:15.

Jesu kanse whla awetọ dọmọ: “Simọni visunnu Johanu tọn, be hiẹ yiwanna mi ya?” Vlavo na Pita biọ bẹwlu mẹ wutu, e gblọn po ahundopo po dọmọ: “Mọwẹ, Oklunọ, hiẹ yọnẹn dọ yẹn tindo owanyi na we.” Diblayin nudopolọ wẹ Jesu sọ gblọn dọmọ: “Nọ yìn lẹngbọ pẹvi ṣie lẹ.”—Johanu 21:16.

Whla atọ̀ntọ, Jesu kanse dọmọ: “Simọni visunnu Johanu tọn, be hiẹ tindo owanyi na mi ya?” Todin, Pita sọgan ko to nuhà dọ vlavo Jesu tindo ayihaawe gando nugbonọ-yinyin emitọn go. Pita gblọn po zohunhun po dọmọ: “Oklunọ, hiẹ yọ́n onú lẹpo; hiẹ yọnẹn dọ yẹn tindo owanyi na we.” Whladopo dogọ, Jesu zinnudo nuhe Pita dona wà ji dọmọ: “Nọ na núdùdù lẹngbọ pẹvi ṣie lẹ.” (Johanu 21:17) Mọwẹ, mẹhe to anadenanu lẹ dona nọ yilizọn na mẹhe yin dindọn wá lẹngbọpa Jiwheyẹwhe tọn mẹ lẹ.

Jesu yin biblá bo yin hùhù, na e wà nuhe Jiwheyẹwhe degbena ẹn nado wà wutu. Todin, e dehia dọ onú mọnkọ wẹ na jọ do Pita lọsu go. Jesu dọmọ: “To whenue hiẹ gbẹ́ yin jọja, hiẹ nọ saba blagbajana dewe bo nọ yì fidepope he a jlo. Ṣigba, eyin hiẹ poyọnho, hiẹ na nọ dlẹnalọ towe lẹ bọ mẹdevo na nọ blagbajana we bo na nọ plan we yì fihe hiẹ ma jlo.” Etomọṣo, Jesu dotuhomẹna ẹn dọmọ: “To hihodo mi zọnmii.”—Johanu 21:18, 19.

Pita mọ apọsteli Johanu bo kanse dọmọ: “Oklunọ, etẹwẹ dawe ehe na wà?” Mọwẹ, etẹwẹ yin sọgodo apọsteli he Jesu tindo owanyi vonọtaun na lọ tọn? Jesu gblọn dọmọ: “Eyin ojlo ṣie wẹ dọ ewọ ni gbọṣi aimẹ kaka yẹn nado wá, etẹwẹ dù we to enẹ mẹ?” (Johanu 21:21-23) Pita dona to hihodo Jesu bo ma dona to nuhà gando nuhe mẹdevo lẹ to wiwà go. Etomọṣo, Jesu to didohia dọ Johanu na nọgbẹ̀ dẹn hú apọsteli he pò lẹ bọ numimọ de na yin nina ẹn gando wiwá Jesu tọn to huhlọn Ahọluduta lọ tọn mẹ go.

Na nugbo tọn, nudevo lẹ tin he Jesu wà, yèdọ hugan nuhe owe-hihá susu lẹ sọgan bẹhẹn.