Iesu ena hanuaboi orena ai, aposetolo taudia ida ia noho neganai, ia hamaorodia ia gwau: “Lau toreisi lou murinai, Galilea dekenai do lau lao guna bona umui do lau naria.” (Mataio 26:32; 28:7, 10) Unai dainai ena murinai idia raka taudia momo be Galilea dekenai idia lao, to unuseniai dahaka do idia karaia?

Petero ese aposetolo taudia siks ia hamaorodia: “Lau be lau lao haoda.” Idia danu idia gwau: “Ai be oi ida do ai mai.” (Ioane 21:3) Unai hanuaboi ai gwarume ta idia abia lasi. Kahirakahira daba ia rere neganai, Iesu be kone dekenai ia hedinarai, to idia diba lasi unai be Iesu. Ia be idia dekenai ia boiboi: “Egu natudia e, umui dekenai aniani ia noho, a?” Idia gwau: “Lasi!” Iesu ese ia hamaorodia: “Bouti ena idiba kahanai reke umui negea bona gwarume haida do umui abia.” (Ioane 21:5, 6) Gwarume momo herea idia abia, edia reke idia veria daekau diba lasi.

Ioane ese Petero ia hamaoroa: “Unai be Lohiabada!” (Ioane 21:7) Karaharaga, Petero ese ena atai dabua ia kwatua bena davara lalonai ia paudobi bona 90 mita bamona ia nahu lao kone dekenai. Bouti ai idia noho taudia be reke idia veria lao kone dekenai.

Kone kahirakahira idia mai neganai, “idia itaia lahi gida latanai gwarume bona paraoa idia noho.” Iesu ia gwau: “Hari umui abia gwarume haida umui abia mai.” Petero ese veria reke be gwarume badadia 153 idia noho! Iesu ia gwau: “Umui mai bona aniani.” Idia ta ia hegeregere lasi idia nanadaia, “Oi be daika?” badina idia diba unai be Iesu. (Ioane 21:10-12) Unai be nega ihatoina ena hahediba taudia dekenai ia hedinarai.

Iesu be idia dekenai gwarume bona paraoa ia henia. Bena reana idia abia gwarume ia itaia bona ia henanadai: “Simona, Ioane ena natuna e, lau eiava inai gwarume oi lalokau henia bada?” Petero be haoda gaukarana do ia laloa bada eiava Iesu ese do ia henia gaukarana ia laloa bada? Petero ia haere: “Oibe Lohiabada, oi diba oi lau lalokau henia.” Bena Iesu ese ia hamaoroa: “Lauegu mamoe natudia oi ubua.”​—Ioane 21:15.

Iesu ma ia henanadai: “Simona, Ioane ena natuna e, lau oi lalokau henia, a?” Reana ia daradara, to mai lalogoada ida ia haere: “Oibe Lohiabada, oi diba oi lau lalokau henia.” Iesu ma ia gwau: “Lauegu mamoe natudia oi naria.”​—Ioane 21:16.

Iesu be nega ihatoina ia henanadai: “Simona, Ioane ena natuna e, lau oi lalokau henia, a?” Hari, Petero ia laloa momo reana Iesu be ena badinaia karana ia daradaralaia. Petero be ia haere: “Lohiabada e, oi be gau ibounai oi diba. Oi diba lau be oi lau lalokau henia.” Iesu ese Petero do ia karaia gaukarana ia gwauraia lou: “Lauegu mamoe natudia oi ubua.” (Ioane 21:17) Oibe, gunalaia taudia ese Dirava ena mamoe idia hesiai henia be namo.

Iesu be Dirava ese ia henia gaukarana ia karaia dainai ia idia hamasea. Iesu ia hahedinaraia Petero dekenai unai do ia vara danu. Iesu ia gwau: “Oi matamata neganai, sibona emu dabua oi hahedokilaia bona oi ura gabuna dekenai oi loaloa. To oi buruka neganai, emu imana do oi toia roro bona ta ese oi dekenai emu dabua do ia atoa bona oi ura lasi gabuna dekenai oi do ia abia lao.” To Iesu ese ia hagoadaia: “Lau oi badinaia noho.”​—Ioane 21:18, 19.

Petero ese aposetolo Ioane ia itaia bona ia nanadaia: “Lohiabada e, inai tauna dekenai dahaka do ia vara?” Momokani, Iesu ese ia lalokau henia bada aposetolo tauna dekenai dahaka do ia vara? Iesu ia haere: “Bema lau ura do ia noho  ela bona lau mai, dahaka dainai unai oi lalohekwarahilaia?” (Ioane 21:21-23) Petero ia laloa momo be namo lasi, to Iesu ia badinaia sibona. Iesu ese ia hahedinaraia Ioane be do ia mauri noho ela bona matahanai amo Iesu be Basileia ena siahu ida do ia mai negana ia itaia.

Momokani, Iesu ese gau ma haida ia karaia danu, to unai sivarai ibounai be lokua toretoredia ese ia haboua diba lasi.