Ba malam ti penudi Jesus begulai enggau bala rasul iya, Jesus madahka sida: “Pengudah aku diidupka baru, aku deka mupuk dulu ari kita ngagai Galili.” (Matthew 26:32; 28:7, 10) Nya alai, mayuh murid Jesus ngagai Galili. Tang nama patut digaga sida ba dia?

Maya nya, Peter madah ngagai enam iku rasul: “Aku deka mupuk nangkap ikan.” Sida lalu nyaut: “Kami ka enggau nuan.” (John 21:3) Tang sepemanjai malam nya, sida nadai bulih utai. Lebuh hari nyauka pagi, Jesus bediri ba tebing danau. Tang sida enda sedar nya Jesus. Ku Jesus ngangauka sida: “O anak, bisi utai diempa kita?” Ku sida nyaut Jesus: “Nadai.” Jesus lalu madah ngagai sida: “Ulurka pukat kita ngagai sepiak kanan perau lalu kita deka bulih ikan.” (John 21:5, 6) Nyadi, sida bulih mayuh amat ikan nyentukka sida enda tetaritka pukat nya ari ai.

John madahka Peter: “Nya Tuan Jesus!” (John 21:7) Maya nya, Peter enda bebaju. Nya alai, enggau jampat Peter ngerasukka gari luar iya. Iya terejun ke ai sereta nyemerai kira-kira 90 meter ngagai tebing. Bala rasul ke bukai ngirit pukat ke penuh enggau ikan, lalu enggau lubah nitihka Peter ari perau.

Lebuh sida datai ba tebing, sida meda “bisi roti, lalu bisi mega beberapa iku ikan benung dipanggang ba atas bara api.” Jesus madah: “Bai kitu sekeda ikan ke baru diulih kita.” Nyadi, Peter ngirit pukat ke penuh enggau 153 iku ikan ti besai ngagai tebing. Jesus lalu bejaku ngagai sida: “Aram makai.” Tang nadai siku ari sida berani nanya, “Sapa nuan?” laban sida nemu iya nya Jesus. (John 21:10-12) Tu meh kali ti ketiga Jesus ngayanka diri ngagai seraban murid iya.

Jesus meri roti enggau ikan ngagai tiap iku sida. Lalu, Jesus engka malik ngagai ikan ke diulih sida, lebuh iya nanya: “Simon anak John, kati nuan sayauka aku lebih ari semua tu?” Reti iya, kati Peter sanggup ngelengkaka bisnes berikan iya ngambika ulih ngenuluka pengawa ke diberi Jesus ngagai iya? Ku Peter nyaut: “Au, Tuan. Nuan nemu aku sayauka nuan.” Nya alai Jesus meransang iya: “Beri makai bala anak bedus aku.”—John 21:15.

Sekali agi, Jesus nanya iya: “Simon anak John, kati nuan sayauka aku?” Tang Peter engka enda faham nama kebuah Jesus nanya iya baru. Nyadi iya madah: “Au, Tuan. Nuan nemu aku sayauka nuan.” Ku Jesus madah baru: “Ibun bala anak bedus aku.”—John 21:16.

Jesus lalu nanya iya kali ketiga: “Simon anak John, kati nuan sayauka aku?” Tanya tu engka ngasuh Peter ngumbai Jesus kakang ati enggau penetap ati iya. Nya alai Peter nyaut: “Tuan, nuan nemu semua utai. Nuan nemu aku sayauka nuan.” Sekali agi, Jesus madahka utai ke patut digaga Peter: “Beri makai bala anak bedus aku.” (John 21:17) Endang amat, sida ke ngiring patut bebendar ngintu bala bedus Petara.

Jesus udah ditangkap sereta diukum bunuh ketegal iya ngereja pengawa ke diberi Petara ngagai iya. Jesus lalu madah Peter mega deka napi utai ti sama enggau iya. Ku Jesus madah: “Lebuh nuan agi biak nuan ngerasukka gari nuan kediri empu lalu bejalai ngagai sebarang endur ke dikedekaka nuan. Tang lebuh nuan nyau tuai, nuan deka ngunjurka jari lalu orang bukai deka ngerasukka gari ba nuan lalu mai nuan ngagai endur ke enggai digagai nuan.” Tang Jesus madahka tu ngagai iya: “Terus nitihka aku.”—John 21:18, 19.

Udah nya, Peter meda rasul John lalu nanya Jesus: “Baka ni enggau iya deh, Tuan?” Nama deka nyadi ngagai rasul ke dikesayauka Jesus? Jesus madah: “Enti aku deka iya idup nyentuk ngagai aku datai, nama kaul nya enggau nuan?” (John 21:21-23) Peter patut terus nitihka Jesus,  lalu enda ibuh irau pasal utai ke digaga orang bukai. Taja pia, jaku Jesus nunjukka John deka idup lama agi ari bala rasul ke bukai. Lalu John deka nerima genera pasal penatai Jesus maya iya nyadi Raja ba Perintah Petara.

Kebendar iya, bisi mayuh agi utai ke dikereja Jesus. Tang enti semua nya ditulis enggau silik, dunya tu pan enda chukup alai nyimpan semua gulung surat ke ditulis nya.